Makatukilu 9 - O Mikanda Ikola

Dibhebhu dia uhaxi ua ibhaku

¹ Kienhókio o Jihova anga u ambela dingi Mozé, uixi: Bokona kua Falaó u mu ambele, kuma Jihova, Nzambi ia Jihebeleu, uambe kiki: Eha mundu uami, phala aie a ngi bhikile.

² Mukonda ki u dituna ku a eha, hé u jijila ku a kuata mu nguzu,

³ talesa o lukuaku lua Jihova lua-nda kutuluka ku thandu dia ibhaku ié iala mu mukáu, ni ku jikabalu, ni jibulu, ni ku jikamelo, ni ku jingombe, ni ku jimbudi, ni ku jihombo; ku kala muene dibhebhu dia iibha.

⁴ Jihova ua-nda kutungula ue o ibhaku ia Izalaiele ni ibhaku ia akua Ijitu; phala ki ku fue kima ku ibhaku ioso ia tokala ku anʼa Izalaiele.

⁵ Jihova anga u xinda kithangana, uixi: Mungu, ki kúkia ngó, Jihova kiene kia bhanga kima kiki mʼoxi mumu.

⁶ Kúkia ni kimene, Jihova anga u ki bhanga; ibhaku ioso ia akua Ijitu i fua, ku ibhaku ia anʼa Izalaiele ni kimoxi ngó, ki kiafu-ku.

⁷ Falaó anga u tuma kutala ku ibhaku ia anʼa Izalaiele, u sanga kidi muene ni kibhaku kimoxi ngó ki kiafu-ku. Maji o muxima ua Falaó-phe ua thathamana, o mundu nguê ku u eha.

Dibhebhu dia mabhuna

⁸ Bhenhobho-phe Jihova, anga u ambela Mozé ni Alá, uixi: Votenu uthókua, muizalese o makuʼenu ni mabhubhu a utókua, ua fólono, Mozé a u kuue bhulu bhu mesu muene a Falaó.

⁹ Utókua-phe, o fufuta iê i di uanena mʼoxi ioso ia Ijitu, anga i di bhanga jihana ni mâmbu aia ni kukituka mabhuna ni ku athu ni ku ibhaku mʼoxi ia Ijitu.

¹⁰ Ene anga a katula o utókua ua fólono, emana bhu pholo ia Falaó, Mozé anga u u kuua bhulu, anga u di bhanga mâmbu ni maveve aia ni kufuafua ku mikutu ia athu ni ku mikutu ia ibhaku.

¹¹ Anga o imbanda ia akua Ijitu a lémbua kuimana bhu pholo ia Mozé, mukonda dia maveve; kuma a fuluka ni ku imbanda ni ku akua Ijito oso.

¹² Maji o Jihova ua kolesa o muxima ua Falaó, ka ẋikina ku a evua; kiene kia tange Jihova kua Mozé, kiene.

O jindumu ja Nzambi

¹³ Bhenhobho Jihova anga u ambela Mozé, uixi: Ki kúkia, u di meneka dingi ua kèmane bhu pholo ia Falaó, u mu ambela, kuma: Jihova, Nzambi ia Jihebeleu, ua-mbe kiki: Eha o mundu uami, phala aie ku ngi bhikila.

¹⁴ Mukonda o kiki kiá nga-nda kutumikisa o mabhebhu ami oso ku thandu dia muxima ué, ni ku thandu dia akua mbèle ié, ni ku mundu ué; phala eie u kʼijiie kuma eme ki ngi moneka mukuetu nga soko-nê mu ngongo ioso.

¹⁵ Kuma kindalʼiki, se ngʼedile ngi sunununa o lukuaku luami ni kibuika, hé ngi ku kuama ni eie ni mundu ué uoso, hinu mu ngongo enu oso mua bhu-mu;

¹⁶ maji-phe kiene ki nga ku bhakela ku muenhu, phala ku ku idikiza kutena kuami, mbé o dijina diami di fumane mu ngongo ioso.

¹⁷ Ki ualʼokio kifua eie hanji ua thathamena o mundu uami, nguaʼié ku a eha ni aiʼâ?

¹⁸ Talesa-phe, mungu mu ola kala iii, nga-nda ku nokesa mvula ia matadi a kuama, i bhinga kuila mʼoxi ia Ijitu mumu kiluua i kala-mu, tundé ku dimatekenu diê katé ni kiki.

¹⁹ Kala kiki-phe, tuma lusolo o ibhaku ié ioso iala ku mukáu u i bhongoluele ku bhata; kuma a kale muthu, a kale kibhaku, mungu u xala ku mukáu, ua kambe ku mu bhongoluela ku bhata, matadi a mvula nʼa mu kuatela koko, ua kà fua.

²⁰ Bhenhobho oso ku akua mbèle ia Falaó ala ni uoma ia Jihova, a tumu ngunza jâ, ni ibhaku kulenga-ku ku mukáu nʼeza ku bhata;

²¹ Maji-phe oso ahuku, nguaʼuâ kusuua kizuelu kia Jihova, ni ngunza jâ, ni ibhaku iâ, a i xalesa ku mukáu.

²² Jihova anga u ambela Mozé, uixi: Sunununa o lukuaku lué, u lu talese mu diulu, phala ku sonoke mvula ia matadi mʼoxi ioso ia Ijitu, i bete athu, i bete ibhaku, i bete idima ku mábhia, mʼoxi ioso ia Ijitu.

²³ Mozé anga u zenga o mbangala iê, u i londekeza mu diulu, Jihova anga u tumikisa mvula ia inuminu ni matadi, ni túbhia tuenda ni ku di loza mu mavu; Jihova anga u nokesa mvula ia matadi mʼoxi ioso ia Ijitu.

²⁴ Kala kiki, ku kala matadi a mvula, ni túbhia tua di lungu-nâ kumoxi, ma kuama muene kiavulu, kia bhingi mʼoxi ia Ijitu kiluua kibhita-mu tunde muʼandekela kutunga-mu athu.

²⁵ Matadi anga ma beta oso ala ku mukáu mʼoxi ioso ia Ijitu, akale athu, a kale ibhaku; matadi ma beta ue o idima ioso ku mábhia, ni miẋi ioso ku mukáu ia bukujuka o jithangu.

²⁶ Kikale ngó mʼoxi ia Ngozene, muala anʼa Izalaiele, muene ngó mua kambe kunoka o mvula ia matadi.

²⁷ Bhenhobho Falaó u tuma kuixana Mozé ni Alá, u a ambela, uixi: Kumbʼidi nga te muene kituxi; Jihova kidi kiê, ualunguʼê, ni eme ni mundu uami tua bhukumuka.

²⁸ Diondenu-phe kua Jihova, inuminu ioso iii ni matadi, kuabhu, ibhue-ku; phala ngi mi ehe mu ienu, ki ngi mi fudisa dingi.

²⁹ Mozé anga u mu ambela, uixi: Ngʼila ngi tunda ngó mu mbonge, ngi leka o maku mami kua Jihova; ua-nda mona-phe inuminu ia batuka, o matadi a bhuê-ku; phala eie u kʼijiie kuma ixi ioso iangene ia Jihova.

³⁰ Eie-phe ki ualʼokio, ni akua mbèle ié, nga kʼijiia muene kiambote kuma ki mua-ndo ẋikina luua kukala ni uoma ua Jihova Nzambi.

³¹ Bhenhobho ni linhu ni sevada a i beta ue; kuma sevada ia kexile ia sangununa kiá, o linhu ia tûluka.

³² Ni tidiku-phe ni senteio, ka i beta-ku mukonda kiluua i kula.

³³ Mozé anga u tunda mu mbonge, kia zubha kutunda kua Falaó, u sanzumuna maku mê kua Jihova; ni inuminu ni matadi anga a bhua-ku, o mvula i batuka kunoka mu ngongo.

³⁴ Falaó-phe kia zubha kumona kuma mvula ni matadi ni inuminu ia bhu-ku, u tona dingi kuta kituxi, u kola o muxima, ni muene ni akua mbèle iê.

³⁵ Kienhiki o muxima ua Falaó anga u kola muene, ngueiê kueha anʼa Izalaiele kuiâ; kiene kia tange Jihova kua Mozé, kiene.