Makatukilu 8 - O Mikanda Ikola

Dibhebhu dia mazote

¹ Jihova anga u ambela dingi Mozé, uixi: Bokona kua Falaó u mu ambela, uixi: Jihova uambe kiki: Eha o mundu uami, aie a ngi bhikile.

² O ki u dituna ku a eha, ngi ku beta ni dibhebhu dia mazote ma bhiẋila muoso mua suku jimbámbe jé joso.

³ O mazote mu honga a di vuala, a banda, a bokona monzo ié, ni mu dizekelu dié, ni bhu hama bhene, ni mu jinzu ja akua mbèle ié, ni mundu ué uoso, ni ku majiku ni mu jímbia ja kulambela.

⁴ O mazote a ku kuma ni ku mukutu ué, ni ku ifuẋi ié ioso, ni ku akua mbèle ié ioso.

⁵ Johova anga u ambela dingi Mozé, uixi: Tangela Alá, a sununune lukuaku ni mbangala ié ku thandu dia jihonga ni milombo ni majiia, a bhangese mazote kutunda-mu nʼeze mʼoxi ioso ia Ijitu,

⁶ Alá anga u sununa lukuaku luê ku thandu dia menha ma Ijitu; mazote anga a banda, hé ezalesa ixi ioso ia Ijito.

⁷ O imbanda ia uanga ue anga a ki bhanga ni uanga uâ, a bheka ue mazote mʼoxi ia Ijitu.

⁸ Bhenhobho Falaó u ixana Mozé ni Alá, uixi: Diondenu Jihova, a katule o mazote kokuaʼami ni ku mundu uami. Kiene kiua ki ngʼeha o mundu nʼaie mu satela Jihova.

⁹ Mozé anga u ambela Falaó, uixi: Eie muene u ki âmba, eme ki ngi zuela; ngi ku diondela thembu iahi, ni mbele ié ni kifuẋi kié phala o mazote a ku batuke, ni mu jinzu, a xale ngó mu honga?

¹⁰ Muene, uixi: Mungu. Mozé uixi: Ki bhita muene, kala ki ua tange eie; phala eie u kʼijiie kuma kana-ku dingi u soka ni Johova, Nzambi ietu.

¹¹ Mungu mazote a ku batuka ku mukutu ué, ni mu jinzu, ni ku mbèle ié, ni ku ifuẋi ue; a xalela ngó mu honga.

¹² Bhenhobho ni Mozé ni Alá anga a tunda kua Falaó, Mozé anga u dikola kua Johova mukonda dia mazote ma bheka kua Falaó.

¹³ Jihova anga u bhanga kala kia zuela Mozé; mazote hé a fua mu jinzu, ni mu malumbu, ni ku mikáu.

¹⁴ Anga a a bhongolola jimvumbu-jimvumbu; ixi ioso anga i nuha kibuzu.

¹⁵ Falaó-phe kia mono kuila kuala hanji kunhoha, u kola dingi o muxima, ka ẋikina ku a evua; kiene kia tange Jihova, kiene.

Dibhebhu dia jina

¹⁶ Jihova anga u ambela dingi Mozé, uixi: Tangela Alá a leke o mbangala iê, a bete o fufutila ia mavu bhoxi, phala i biluke jina mʼoxi ioso ia Ijitu.

¹⁷ Anga a ki bhanga; kuma Alá ua leka o lukuaku ni mbangala, iú ua beta of fufuta ia mavu bhoxi anga muiza jina ni ku mikutu ia athu, ni ku mikutu ia ibhaku; fufutila ioso ia mavu ia biluka jina mʼoxi ioso ia Ijitu.

¹⁸ O imbanda ue anga a ki fikisa ni uanga uâ, maji a lémbua; jina-phe anga ji kala ku athu oso ni ku ibhaku.

¹⁹ Bhenhobho-phe o imbanda ambela Falaó, exi: Iú mulembu ua Nzambi kiá; Falaó-phe u kola muxima, ka ẋikina ku a evua, kala kia tange Jihova.

O dibhebhu dia jihamue

²⁰ Jihova anga u ambela dingi Mozé, uixi: Mungu u fundumuka mu kimenemene, uimane bhu pholo ia Falaó; uejiia iene ola iê ia kutunda kuia ku menha; u mu ambela, uixi: Jihova uambe kiki: Eha o mundu uami, phala a ngi bhikile.

²¹ O ki uila kana, povo iami ngué ku a eha, ngi tuma jinzungule ja jihamue ku thandu dié, ni ku thandu dia mbèle ié, ni ku mundu ué, ni mu jinzu jé; o jinzo ja akua Ijitu jʼizala jinzungule ja jihamue, katé ni bhoxi bhua diota.

²² Kizuua kienhókio o ixi ia Ngozene mua tungu o mundu uami ngi i tungula, dibhebhu dia jihamue ki di kala-mu; phala eie u kʼijiie kuma eme ngi Jihova mu ngongo ioso.

²³ Ngi ta mbámbe mu kaẋi ka mundu uami ni mundu uê; mungu ki kúkia kiene ki bhita o kijimbuete kiki.

²⁴ Jihova anga u ki bhanga; hé kuiza matuta a makota a jihamue mʼonzo ia Falaó, ni mu jinzo ja akua mbèle iê; o ixi ioso ia Ijitu anga i sekala mukonda dia jinzungule ja jihamue jenʼiji.

²⁵ Falaó anga u ixana Mozé ni Alá, uixi: Ndenu, mu satele Nzambi ienu mʼoxi muenhumu.

²⁶ Mozé-phe, uixi: Ki kiene kia tokala kubhanga; kuma jisata jetu ji tu satela Jihova, Nzambi ietu, kisunji ku akua Ijitu; kifua ku sata kisunji bhu mesu ma akua Ijitu, ene ka-nda ku tu bûba ni matadi?

²⁷ Tu ehe tuie njila ia izuua itatu mu kikangalakata, phala tu satele Jihova Nzambi ietu kala kia tumu muene.

²⁸ Bhenhobho, kuala Falaó: Nga-nda ku mi eha ni mu-iii, phala mu satele Jihova, Nzambi ienu, mu kikangalakata; maji ki muie dikanga diavulu; ngi diondedienu ue eme.

²⁹ Mozé-phe uixi: Eme ngi tundʼó, mga-nda ku dionda Jihova phala mungu a ku katule jinzugule ja jihamue, ni ko kué u Falaó, ni ku mbèle ié ni ku mundu ué; Falaó-phe ka ngi nganale dingi, nʼa kambe kueha o mundu kuia mu satela Jihova.

³⁰ Bhenhobho Mozé anga u tunda kua Falaó, u dionda kua Jihova.

³¹ O Jihova anga u bhanga kala kia zuela Mozé; jinzungule ja jihamue u ji katula kua Falaó, ni ku mbèle iê, ni kifuẋi kiê; né lumoxi ngó ki lua xala-ku.

³² Maji Falaó anga u tona dingi kukola muxima uê, nguê kueha o mundu nʼaiâ.