Makatukilu 7 - O Mikanda Ikola

¹ Jihova anga u ambela Mozé, uixi: Aluka-ze, nga ku bhange kala u Nzambi kua Falaó; kota dié Alá u kala-phe polofeta ié.

² Eie u zuela kioso ki ngi ku tuma; phange ié Alá-phe muene u ambela Falaó kuila ehe anʼa Izalaiele, a tunde mʼoxi iê.

³ Eme-phe ngi kolesa o muxima ua Falaó, ngi vudisa ijimbuete iami ni madiuanuʼami mʼoxi ia Ijitu.

⁴ Falaó-phe ka-nda ku mʼivua, eme ngi tula lukuaku luami ku thandu dia Ijitu, hinu ngi tundisa ilombo iami, o mundu uami ua anʼa Izalaiele mu ixi ia Ijitu, ku isunji ia vulu i bhita-bhu.

⁵ O akua Ijitu-phe a kejiia kuma eme ngi Jihova, kioso ki ngi sunununa lukuaku luami ku thandu dia Ijitu, mu katula anʼa Izalaiele muʼaxaxe kâ.

⁶ Mozé ni Alá anga a ki bhanga; kala kioso kia a tumu Jihova kiene muene kia bhange.

⁷ Mozé anga u kala mu makuinhi nake a muvu, Alá mu makuinhi nake a muvu ni itatu, kioso kia zuela ni Falaó.

⁸ Jihova anga u ambela Mozé ni Alá, uixi:

⁹ Kioso Falaó kia kà zuela ni enu, kia kèla idikiza hanji kidiuanu kienu; bhenhobho ua kʼambela Alá, uixi: Kuata mbangala, u i takuile bhoxi bhu pholo ia Falaó i kituke nhoka.

¹⁰ Mozé ni Alá anga a bokona kua Falaó, anga a ki bhanga, kala kia a tumu Jihova; Alá anga u takula o mbangala bhoxi bhu pholo ia Falaó ni bhu pholo ia akua mbèle iê, anga i kituka nhoka.

¹¹ Bhenhobho Falaó ue u ixana jihete ni jinganga, ene o imbanda ia Ijitu, ene anga a ki bhanga ue ni uanga uâ.

¹² Mukonda ene uâ kala muthu ua takula o mbangala iê bhoxi, anga ji kituka jinhoka; mbangala ia Alá-phe anga i minha jimbangala jâ ene.

¹³ Falaó-phe bhenhobho u kola muẋma, ka ẋikina ku a evua; kiene kia tange Jihova, kiene.

Kuthathamana kua Falaó

¹⁴ Jihova anga u ambela Mozé, uixi: Muxima ua Falaó ua thathamana, ka ẋikina kueha o mundu kuiâ.

¹⁵ Eie-phe ndeie kua Falaó mu kimenemene; kuma muene ua-nda kuila ola ioio ku menha; eie-phe ua kʼèmana ku kubumu kia Nilu, u takane-nê; o mbangala ia kitukile o nhoka uia na-iu uê bhu maku.

¹⁶ Ua kà mu ambela kiki, uixi: Jihova, Nzambi ia Jihebeleu, ua ngi tumu ko kué uixi: Eha o mundu uami phala aie ku ngi bhikila mu kikangalakata; ua mono-phe katé ni kiki kua ẋikina kuívua.

¹⁷ Jihova uambe kiki: Bhene bhu ua-nda ku ngʼijidila kuma eme Jihova; bheniabha-phe, mbangala i nga kuatʼiii nga-nda kubeta na-iu ku menha ala mu honga, ene-phe a-ndu kituka manhinga.

¹⁸ O jimbiji jala mu ngiji ji fua, honga ioso i bola; katé akua Ijito anda kutala hadi mu sota menha a kúnua.

Dibhebhu dia dianga. Menha a kituka manhinga

¹⁹ Jihova anga u ambela Mozé, uixi: Ambela Alá, uixi: Kuata mbangala ié, u sununune lukuaku lué ku thandu dia menha ma Ijitu, ni ala mu jihonga, ni ala mu milombo, ni ala mu mazanga ni mu majiia, ene oso a kituke manhinga; ku kale manhinga mʼoxi ioso ia Ijito ni mu itutu ia miẋi, ni ia matadi.

²⁰ Ni Mozé ni Alá anga a bhanga kala kia a tumu Jihova; Alá anga u zenga o mbangala u beta menha mala mu honga, bhu mesuʼa Falaó, ni bhu mesuʼa akua mbèle iê; menha oso ala mu honga anga a kituka manhinga.

²¹ O jimbiji jala mu menha anga ji fua; menha ene oso a bola akua Ijitu anga a lémbua kúnua menha mu honga; mʼoxi ioso ia Ijito anga mu iibha ni manhinga.

²² O imbanda ia akua Ijitu anga a ki bhanga uê ni uanga uâ; anga ki bhekela Falaó ku kola o muxima, ka ẋikina ku a evua, kala kia tange Jihova.

²³ Falaó anga u tunda-bhu, uia ku bhata diê, iene iosoʼii ka ẋikina ngó ku i ta muxima.

²⁴ Akua Ijitu oso anga a kala mu kanda jifiẋi bhu mbandu ia honga, mu sota menha ma kúnua; kuma menha mu ngiji a lémbua ku a nua.

²⁵ Kienhokio sambuadi dia izuua anga i tena, tunde Jihova kia beta honga ia Nilu.