Makatukilu 6 - O Mikanda Ikola

¹ Jihova anga u ambela Mozé, uixi: Eie ua-nda ki mona-ke, kioso ki ngi bhanga Falaó, kuma ku a eha kikale lukuaku lua nguzu lu bhita-bhu, mu kuívua lukuaku lua nguzu kiene kia-nda ku a kaia mʼoxi iê.

Nzambi u bhana kizuelu kia kukudila anʼa Izalaiele

² Nzambi anga u zuela ni Mozé, u mu ambela, uixi: Eme Jihova.

³ Nga tukulukila jinga Mbalahamu, ni Izake, ni Jakobo, kala ngi Nzambi, Muteni-a-ioso; maji ka ngʼijidile mu dijina diami dia Jihova.

⁴ Nga kuatesa kikutu kiami ni ene, mu ku a bhana ixi ia Kanana, ixi ia unhunginu uâ mua kexi kunhungina.

⁵ O kukema kua anʼa Izalaiele nga ku ivu, a a bhake mu ubhika kuala akua Ijitu; eme nga lembalala o kikutu kiami.

⁶ Kala kiki, ambela anʼa Izalaiele, kuma: Eme Jihova, mu imbamba ia mi xina akua Ijitu nga-nda ku mi katula-mu, ngi mi jituna mu ubhika uâ, ngi mi kula ni lukuaku lua sununuka, hé ngi londekeza ubatuilu ua kidi ni isunji ia makota;

⁷ eme anga ngi mi tambula kukala mu mundu uami, anga ngi kala ngi Nzambi ienu; hinu mu kʼijie kuma eme Jihova, Nzambi ienu, nga tena ku mi katula bhoxi dia imbamba ia mi xina akua Ijitu.

⁸ Hinu ngi mi bhiẋidisa mʼoxi i nga lokela Mbalahamu, ni Izake, ni Jakobo, ku a bhana-iu; ngi mi bhana-iu muene mu undundu uenu, mukonda eme Jihova.

⁹ Mozé anga u ambela anʼa Izalaiele kala kia mu ambelʼiki: Ene-phe ka ẋikina kuívua Mozé, mukonda dia kikote ku muxima ni kubhondalala mu ubhika.

¹⁰ Jihova anga u zuela dingi ni Mozé, uixi:

¹¹ Bokona kua Falaó, u zuele-nê, kuila ehe anʼa Izalaiele, a tunde mʼoxi iê.

¹² Mozé anga u zuela bhu pholo ia Jihova, uixi: Tala kuma anʼa Izalaiele ka mu ẋikina ku ngʼivua; Falaó-phe ua-nda ku ngʼivua kiebhi, ngi kiximba kia kuzuela?

¹³ Jihova anga u zuela dingi ni Mozé ni Alá u a tendelela kioso kia zuela ni anʼa Izalaiele ni Falaó muenexiʼa Ijitu, phala kukatula anʼa Izalaiele mʼoxi ia Ijitu.

Ingu ia vumu ia Lubene, ni Ximinhá, ni Levi

¹⁴ Enʼiá ene ala ku pholo mu mabhata a jitata jâ. Anʼa Lubene a mala, muene monʼa Izalaiele ua phande-kumbi: Hanoke ni Palu, Hezelone ni Karmi; ene o mabhata ma Lubene.

¹⁵ Anʼa Ximinhá a mala: Jemuuele ni Jamini, Ohade ni Jakini, Zohale ni Saúlo maniʼâ mukua Kanana; iá o mabhata ma Ximinhá.

¹⁶ O iá ene o majina ma anʼa Levi a mala, kioso kia di kaiejela mu ku a vuala: Ngelexone, ni Kohate, ni Meladi; o mivu ia Levi ia bhange ku muenhu, hâma ia muvu ni makuinhi atatu ni sambuadi.

¹⁷ Anʼa Ngelexone a mala: Libini ni Ximei, ku mabhata mâ.

¹⁸ O anʼa Kohate a mala: Amlame, ni Izahale, ni Hebolone, ni Uziiele; o mivu ia Kohate ia bhange ku muenhu, hâma ia muvu ni makuinhi atatu ni itatu.

¹⁹ O anʼa Meladi a mala: Mahali ni Muẋi. Iá ene o mabhata a jilevita mu kiubha-kiubha, kioso kia di kaiejela mu ku a vuala kuâ.

²⁰ Amlame anga u bhenga muhatu, Jokebede phange ia tatʼâ; muene anga u mu vualela Alá ni Mozé: o mivu ia Amlame ia bhange ku muenhu, hâma ia muvu ni makuinhi atatu ni sambuadi.

²¹ O anʼa Izahale a mala: Kola, ni Nefange, ni Zikidi.

²² Anʼa Uziiele a mala: Mizaiele, ni Elizafane, ni Sitadi.

²³ Alá anga u bhenga muhatu, Eliseba monʼa Aminadabe, phange ia Nasone; muene anga u mu vualela Nadabe; ni Abihu, Eliiazale ni Itamale.

²⁴ O anʼa Kola a mala: Asidi, ni Elikana, ni Abiasafo; ene o mabhata ma akua Kola.

²⁵ O Eliiazale, monʼê Alá ua diiala anga u bhenga muhatu ku anʼa Putiiele; muene anga u mu vualela Finehase. Enʼiá ene ala ku pholo mu mabhata a jitata jâ ku jilevita, kioso kia di sokesa mu madiembo mâ.

²⁶ Enʼiá-phe Alá ni Mozé, a ambela kuala Jihova, uixi: Mu katula anʼa Izalaiele mʼoxi ia Ijitu, ni ku a ta mu ilombo iâ.

²⁷ Mozé ni Alá ene a zuela ni Falaó, muenexiʼa Ijitu, phala kukatula anʼa Izalaiele mu Ijitu.

Ngana u suinisa Mozé kuzuela dingi ni Falaó

²⁸ A nga ki bhita kuila, mu izuuʼomo kioso kia zuela Jihova ni Mozé mʼoxi ia Ijitu,

²⁹ Jihova u ambela Mozé, uixi: Eme Jihova; Zuela ni Falaó, muenexiʼa Ijitu, u mu tangele ioso i nga-nda ku ku ambela eme.

³⁰ Mozé anga u zuela bhu pholo ia Jihova, uixi: Ngi kiximba kia kuzuela, Falaó ua-nda ku ngʼivua kiebhi?