Makatukilu 5 - O Mikanda Ikola

Mozé ni Alá a zuelesa Falaó

¹ Kia zubha kubhanga kiki, Mozé ni Alá a bhiẋila kua Falaó a mu ambela, exi: Kiene kia zuela Jihovʼiki, Nzambi ia Izalaiele: Eha mundu uami, phala aie mu kikangalakata, a ngi bhangele-mu fesa.

² Kuala Falaó-phe: Jihova nanhi muene, phala eme ngi mu ivue dízui, ni ngehe Izalaiele? Eme, Jihova ki nga mu ijiia; kia mukuâ dingi, Nga ditunu kueha Izalaiele.

³ Kuala ene: Nzambi ia Jihebeleu ua tu sange; eie tuehe-phe, tua ku diondo, tuie njila ia izuua itatu mu kikangalakata, tua kà satele Jihova, Nzambi ietu; mbe muene kʼeze kuthandu dietu ni dibhebhu mba xibhata.

⁴ Muenexiʼa Ijitu anga u a ambela, uixi: Phalahi, eie Mozé ni Alá, muala kufudisa mundu kukalakala? Muanganenu mu-ie ku thonga ienu.

⁵ Falaó anga u zuela dingi uixi: Mua mono, mundu mʼoxi ioso a vulu kiá, enu-phe muala ku a zumbula ku ikalakalu iâ. Falaó u beta dingi kutatesa anʼa Izalaiele.

⁶ Kizuua kienhókio Falaó anga u ambela atumini ala mu kalakesa, uixi:

⁷ Kana dingi kubhana mundu iangu ia kuʼmbila o jindobhi, kala ki mua bhange mazá ni mazadinha; ene a muangane, a sote ene o iangu iâ.

⁸ O konda-phe ia jindobhi jala kumba tunde okulu, kale a i tenesa muene, kana ku a sosoluela ku konda né imoxi ngó; kuma ala ni usonde kiene kia dikolela, exi: Tuehe tuie mu satela Nzambi ietu.

⁹ A xinienu muene ni kikalakalu kia neme, mala enʼió, phala a landuke ni kukalakala; ka kale mu dielela ku maka a makutu a muia ni ku a tela.

¹⁰ Abhondeleki, o akalakexi ala mu kalakesa o mundu, ni akalakexi a atuminʼâ, anga a tangela o mundu, exi: Falaó uambe kiki: Nguami ku mi bhana iangu, tunde lelu katé ku pholo.

¹¹ Kale enʼuenu muene muia mu i sota kuoso ku mu i muena; mukonda ku kikalakalu kienu ka-nda ku mi sosolola-ku kima.

¹² Mukonda dia kiki mundu a muangenena mʼoxi ioso ia Ijitu mu sota iangu ia kuʼmbila jindobhi.

¹³ O abhondeleki anga a a jijidika, exi: Kumbidilenu, konda i tene izuua ioso, kala kia kexi ku mi bhana iangu.

¹⁴ Atumini a anʼa Izalaiele, oso a te-ku kuala Abhondeleki a Falaó, anga a a beta, a ebhula, exi: Phalahi, konda ki i tena ni mazá ni lelu, ia jindobhi kala ki muʼomba jinga ukulu.

¹⁵ O Atumini a anʼa Izalaiele, anga eza, a dikola kua Falaó, exi: Phalahi, o abhikʼé ua mu a bhanga kiki?

¹⁶ Kala ku a bhana dingi iangu, abhikʼé, maji a tu ambela exi: Umbenu; ua mono a tu beta, tu abhikʼé; maji ki etu tuala ni kuêla, kuêla kua mundu ué muene.

¹⁷ Kuala muene: Enu muala mu a asonde, mu asonde muene; kiene ki mua ki ambela kuma: Tuehe, tuia mu satela Jihova.

¹⁸ Ndenu, ka kalakadienu; maji o iangu ka mi bhana-iu, kana, kikale-phe mu bhakula o konda iatena ia jindobhi.

¹⁹ Akalakexi a anʼa Izalaiele, anga a mona, exi: Uíndua ua tu iza! Hé a ambela exi: Kana kusosolola ku konda ia jindobhi, kale i tena muene kizuua ni kizuua.

Anʼa Izalaiele a di tata

²⁰ Mu kutunda kua Falaó, anga a takana mu njila ni Mozé ni Alá;

²¹ anga a ambela, exi: Jihova a ki suue, a mi bhange kioso kia tokala; mukonda mua tu nuhisa dizumba diaiibha kua Falaó, ni akua mbèle ku mbanza, kífua mua a bhana xibhata bhu maku, ia ku tu jibha etu.

²² Mozé anga u vutuka kua Jihova, uixi: Ngana, ua ki bhangela-hi, mundu iú ku u bongesa malebnhu kiki? Eme-phe ua ngi tumikisinaʼhi?

²³ Kuma tunde ki ngeza kua Falaó kuzuelela mu dijina dié, muene ua bandekeza phulu ku mundu iú, eie-phe kukudila o mundu ué, ki kuata-ku.