Makatukilu 40 - O Mikanda Ikola

Nzambi u tuma Mozé kuximbika balaka

¹ Jihova anga u ambela dingi Mozé, uixi:

² Mu kizuua kia dianga ku mbeji ia kamoxi, u ximbika o balaka ia ditakanenu.

³ U ta muenhomo álaka ia umbangi, álaka anga u i xitila ni kibatulu.

⁴ U bokuesa ue meza, u a zala ni ima iê ia tokala-ku; u bokuesa ue kandeia, u sendela o jilâmbada jê.

⁵ O kalatódio ka ulu ka uasu ua dizumba u ka bhaka mu divula, álaka i kala mu xilu, anga u ta dibeka dia kuxita bhu muelu ua balaka.

⁶ Kalatódio ka jisata ja kuoha u ka tula mu kithâdi bhu muelu ua balaka ia kutakanena.

⁷ O mbasinha ia kusukuila, u i xikika bhu kaẋi ka balaka ia ditakanenu ni kalatódio, anga u izalesa ni menha.

⁸ U imika ue kithâdi ki kondoloka, hé u nhenga ue dibeka dia kuxita bhu muelu ua kithâdi.

⁹ U kuata ue o maji ma kuundila, u unde o balaka ni ima ioso iala-mu; nda u i kôlese, ni imbamba iê ioso; iene ioso i kale ikola.

¹⁰ Ni kalatódio ka jisata ja kuoha, u ka unda ue ni maji, ni imbamba iê ioso, u kôlese o kalatódio; ka kale ka kôla kinéne.

¹¹ O mbasinha ia kusukuila, ni mbunda iê i tula bhoxi, u i unda ue, nda u i kôlese.

O kuunda Jinganga

¹² Ni Alá ni nʼê a mala u a bheka ue bhu muelu ua balaka, ia dibhongolokelu, eie anga u a sukula ni menha.

¹³ Alá anga u mu zuika ni izuatu ikola, anga u mʼunda ni maji, u mu kôlese, phala a tene ku ngi kalakela ku unganga.

¹⁴ U bheka ue anʼê u a zuike jimbinza;

¹⁵ anga u a unda ue ni maji, kala ki ua undu tatʼâ, mbé ene uâ a ngi kalakele ku unganga; o ku a unda kuâ ku kala kua unganga unangenena ku miiji iâ ioso.

¹⁶ Mozé anga u ki bhanga; kioso kia mu tumu Jihova, kiene kia bhange.

¹⁷ Anga ki bhita kuma, bhu mbeji ia kamoxi ku muvu ua kaiadi, kizuua kia kamoxi ku mbeji, balaka a imika.

¹⁸ Mozé anga u imika balaka, u tula ibaka iê, uimika mabaia ma jingunji, u ta mikângala iê, hé u imika o jiphiladi.

¹⁹ Anga u futumuna o balaka, hé i vungina o kibúta kia ditakanenu, mavunga ua a bhitisa ku thandu; kala kia tumu Jihova kua Mozé.

²⁰ Anga u katula umbangi, u u ta mu álaka, u ta o mikambu ia álaka,

²¹ u ta kibhuna kia kiadi, anga u nhenga dibeka dia kibatulu, kifua álaka ua i xitila, kala kia tumu Jihova kua Mozé.

²² Anga u ta ue o meza mu balaka ia kutakanena, ku mbandu ia kusuku ia balaka (thunda) kifua mu sala, kibatulu kia bhiti ku dima.

²³ O kuthandu dié anga u ta-ku o jimbolo ja kilumbu ku munôno, bhu pholo ia Jihova; kala kia tumu Jihova kua Mozé.

²⁴ Iu ua te ue o kandeia mu balaka ia ditakanenu, ka lulama ni meza, ka kexile ku mbandu ia sulu ia balaka.

²⁵ Anga u uika jilâmbada jê, bhu pholo ia Jihova; kala kia tumu Jihova kua Mozé.

²⁶ Iu ua te o kalatódio ka ulu mu balaka ia kutakanena, kifua mu sala, o kibatulu kia bhiti kuema.

²⁷ Anga u bhangela-ku o dixi dia ibatubatu ia uabha mazumba; kala kia mu tumu Jihova.

²⁸ Anga u nhenga ue o dibeka dia xiti bhu muelu ua balaka.

²⁹ Kalatódio ka jisata ja kuoha, ua ka xikika mu kithâdi bhu muelu ua balaka ia kutakanena, anga u bhakuila-ku ni sata ia kuoha ni mubhaku mákudia, kala kia tumu Jihova kua Mozé.

³⁰ O mbasinha ia kusukuila ua i xikika ue bhu kaẋi ni balaka ia kutakanena ni kalatódio, iu ua te-mu ni menha ma ku di sukuila.

³¹ Ni Mozé, ni Alá ni anʼê a mala, a kala mu sukula maku ni inama iâ mu mbasinha muenhumu.

³² Kioso kia bokona mu balaka ia ditakanenu, mba kia zukama ku kalatódio, a di sukula; kala kia tumu Jihova kua Mozé.

³³ O mu kuzumbukila anga u imika ue o kithâdi kia bhake o balaka ni kalatódio mu kaẋi, u nhenga o dibeka dia muelu ua kithâdi; kienhiki Mozé kia bhange o kikalakalu kioso, iu ua ki zubha.

Dituta ku thanduʼa Balaka

³⁴ Kia zubha kubhanga kiki, dituta dia vungina balaka ia kutakanena, balaka ioso iezala ni kubenha kua Jihova.

³⁵ Mozé anga u lémbua kubokona mu balaka ia kutakanena, mukonda dituta kuene ku dia tula, ni kubenha kua Jihova kuezalesa balaka ioso.

³⁶ Anga a kala mu kuila se dituta dia zangumuka ku balaka, anʼâ Izalaiele a kuta, a katuka, enda mu njila jâ joso;

³⁷ o dituta-phe se dia kambe kuzangumuka, ene uâ ka katuka, katé kizuua kia mona dia zangumuka.

³⁸ Mukonda o dituta dia Jihova dia nanga jinga ku thandu dia balaka mu muanha, o mu usuku di kituka túbhia ku mesu ma dibhata dioso dia Izalaiele, mu jinjila jâ joso.