Makatukilu 4 - O Mikanda Ikola

Mbangala ia Mozé i kituka nhoka

¹ Mozé anga u kumbulula, uixi: Enʼió-ze, Ngana, ka-nda kuà ngi xikana, mba ku ngʼivua dízui; mukonda a-nda kuila: Makutu, Jihova ka ku tukulukila.

² Jihova anga u mu ambela, uixi: Kima kiahiʼokio ki ua kuata bhu maku? Uixi: Mbangala.

³ Uixi: Takula-iu bhoxi. Anga u i takula bhoxi, hé i kituka nhoka; o Mozé kia i mono, u lenga.

⁴ Jihova anga u ambela Mozé, uixi: Sunununa lukuaku lué u i kuate ku mbônde; anga u sunununa lukuaku, u i kuata ku mbônde, o iene anga i kituka dingi mbangala bhu maku mê.

⁵ Uixi: Phala a ku xikane, kuila Jihova, Nzambi ia jitata jâ, Nzambi ia Mbalahamu, Nzambi ia Izake, Nzambi ia Jakobo, ua ku tukulukila.

⁶ Jihova anga u mu kumuna dingi, uixi: Ta hanji lukuaku bhu homba ié. Anga u ta lukuaku luê bhu homba, o kieza ku lu katula, u tala lukuaku luala ni dibhute, lua zele kala neve.

⁷ Uixi: Tona dingi kuta lukuaku luê bhu homba. O muene anga u ta dingi lukuaku luê bhu homba; o kia zubha ku lu katula, u tala lua disanze dingi kala xitu jê jamukuá.

⁸ Uixi-phe: Mu kutula, kia kamba ku ku xikana, kia kamba ku ku ivua o dízui, mu kijimbuete kia dingaʼiki, mu kumona kijimbuete kia kaiadi, a ku xikana muene.

⁹ O kia kèla ijimbuete iiadi iii a i mono, maji nguâ ku ku xikana, mba ku ku ivua dízui, ua kà bulula menha mu honga ia Nilu, ua kà a lunduluila ku mavu a kanga; o menha-phe u ua bulula mu honga, a kà kituka manhinga ku mavu a kanga.

¹⁰ Mozé anga u ambela, Jihova, uixi: Uá, Ngana, tata! eme ki ngi mesene ia kuzuela, né mʼokulu, né kiki ki ua mu zuelesa selevende iéʼiki; ngi muthu nga kokoloka mu kanu, nga neme o dimi mu zuela.

¹¹ Jihova anga u mu ambela, uixi: Nanhi muene ua bhanga o dikanu dia muthu? U bhangesa kuila iú dibubu, iú muxilu, o iú u mona, iú kifofo? Manhi ki eme muene ngi Jihova?

¹² Kiki-phe ndé kindala, eme muene ngi kala ni dikanu dié, ngi ku longesa kioso ki ua kà zuela.

¹³ Muene-phe, uixi: Uá, Ngana, tata! nga ku diondo, tuma uengi uoso ua mono ku mu tuma.

¹⁴ Kienhókio Jihova njinda i mu kuata anga u mu ambela uixi: Manhi kota dié Alá, levita, ki iú-é-iú? Nga mu ijiia, kuma mukua kuzuela kiambote. Muene ue iú mu njila, kiene ki tualʼiki, uala kuiza ku ku sanga; o kia-nda ku ku mona, u kala ni kutana mu muxima.

¹⁵ Eie-phe ua kà zuela ni muene, u mu ta maka mu kanu diê; eme-phe ngi kala ni dikanu dié, ni dikanu dia muene, anga ngʼenda ni ku mi longesa ioso i mu bhanga.

¹⁶ Muene u kala muzumbu ué uakuzuela ni mundu; o ki muia ni kuenda, muene u kala diaknu dié, eie-phe u mu kala mukuâ ni Nzambi.

¹⁷ Bhu maku uambata o mbangala ienhiʼii, iene i uenda ni kubhanga na-iu o ijimbuete.

Mozé u vutuka ku Ijitu

¹⁸ Mozé anga u suluka, uia ku bhata kua ukouʼê Jétulu, u mu ambela, uixi: Ngi bhane disesa, ngi vutuke ku akuetu a xala mu Ijitu, nga kà mone se iá ni muenhu. Jétulu anga u ambela Mozé, uixi: Ndeie ni paze.

¹⁹ Jihova anga u ambela Mozé bhu Midiiana, uixi: Ndé, u vutuke ku Ijitu; kuma ene oso endele ku ku bua o muenhu ué, afu kiá.

²⁰ Mozé anga u zangula mukajiʼê, ni anʼê a mala, u a ta ku bulu, u katuka mu kuia dingi mʼoxi ia Ijitu, ni mbangala ia Nzambi uê ua i kuata bhu lukuaku.

²¹ Jihova anga u ambela Mozé, uixi: Mu kubhiẋila mu Ijitu, u kumbidila o kubhanga bhu pholo ia Falaó o madiuanu oso u nga ku bhana bhu maku; eme-phe nga kà mu kolesa o muxima uê, ka-nda kuẋikina kueha o ifuẋi.

²² Bhenhobho eie ua kʼambela Falaó, kuma: Jihova uambe kiki: Izalaiele monʼami, monʼami ua phande-kumbi.

²³ Nga tumu ku ku ambela kuila: Eha monaʼami, phala a ngi kalakele; eie-phe ki ua ditunu ku mu eha, eme nga-nda kujibha monʼé ua phande-kumbi.

²⁴ Anga ki bhita kuila, ku tula mu njila, bhu kibangu bhua zekela, Jihova u takana ni Mozé, anga u sota ku mu jibha.

²⁵ Zipola bhenhobho u kuata ditadi diatu, u bhatula o kinhunga kia monʼê ua diiala, u ki tula bhu inama ia Mozé; uixi: Ni kidi kiene, ki tualʼiki, eie ua di bhange u iala diami dia manhinga.

²⁶ Ngana kiene kiua kia mu eha. Muhatu anga u kala mu ki zuela, uixi: Eie u diiala dia manhinga, mukonda dia kusaia.

²⁷ Jihova anga u ambela ue Alá, uixi: Ndé mu kikangalakata, ua kà takane ni Mozé; muene anga uia, u takana-nê bhu mulundu ua Nzambi, u mu bhana jibeju.

²⁸ Mozé anga u kunda Alá maka moso ma Jihova ma mu tumu-nâ, ni ijimbuete ioso ia mu tendelela ku i bhanga.

²⁹ Bhenhobho Mozé ni Alá anga a bhiẋila, a bhongolola adiakimi oso a anʼa Izalaiele.

³⁰ Alá anga u tanga maka moso ma tangela Jihova kua Mozé, u bhanga ijimbuete bhu mesu a mundu uoso.

³¹ Kifuẋi anga a xikana; o kia zubha kuívua kuma Jihova ua suu anʼa Izalaiele iú ua mono o jiphaxi jâ, ene a bheteka o mítue, anga a bheza.