Makatukilu 38 - O Mikanda Ikola

Kioso kia bhanga Kalatódio ka Sata ja kuoha

¹ Anga u iudika ni kalatódio ka jisata ja kuoha, ka muẋi ua xitimi kulebha kuê kóvadu jitanu, kuzanza kuê kóvadu jitanu; mbandu jê jiuana ja sokela kumoxi; kitala kiê kóvadu jitatu.

² Ua iudika ue ni jimbinga bhu thungi jê jiuana; a ji sudila koko ki ji ẋikina ku ji katula-ku; anga u ka folala ni ngôndo.

³ Ua iudika ue ni imbamba ioso ia tokala ku kalatódio, ni iomuenu ia kuomuena o uthôkua, ni jipá jê, ni jimbasinha, ni jingalufu ja kukuatela xitu, ni malumbala a kuambatela o túbhia; imbamba ioso iii ua i iudika ni ngôndo.

⁴ Kalatódio ua ka iudikila ue ni ngalade ia ngôndo iila kala uanda; uanda iú u kala ditala diófele dia kuimanena, dia kondoloka kalatódio; o mu kitala, ditala didi dia suku mu kaẋi ka kalatódio.

⁵ Anga u iẋika malenge mauana, ma kala ku jithûngi jiuana ja uanda ua ngôndo, muene mua kutela mikambu ia kuambatela.

⁶ Anga u iudika ni mikambu ia muẋi ua xitimi, u i folala ni ngôndo.

⁷ Mikambu anga u i tela mu malenge, mu jimbanji ja kalatódio, iene ia kuambatela; o kalatódio kene ua ka iudika, ni mabaia kala kaxa, moxi muala ngó.

Kioso kia bhanga o mbasinha ia kudisukuila

⁸ Anga u iudika ni mbasinha ia kusukuila, ia ngôndo, ni mbunda iê i tula bhoxi ia ngôndo, ua i iudika ni malumuenu ma bhana ahatu akua kusedivila bhu muelu ua balaka ia kutakanena.

O Lumbu lua Balaka

⁹ Anga u iudika ue kithâdi kia balaka; ku mbandu iê ia sulu ku kala jikulutina ja linhu ia fina ioxise; o mbandu imoxi kulebha kuê hâma ia kôvadu.

¹⁰ O jiphiladi jê makuinhi aiadi, ni ibaka iê makuinhi aiadi, ia ngôndo ioso; ni jingôua ja jiphiladi, ni mikambu iê ia phalata.

¹¹ Kiene kimoxi ue ku mbandu ia ku suku: jikulutina jê jʼambata ue hama ia kôvadu, jiphiladi makuinhi aiadi, ibaka iê makuinhi aiadi, ia ngôndo ioso; o jingôua ja jiphiladi ni mikambu iê ia phalata.

¹² Ku mbandu ia mufila-kumbi jikulutina ja makuinhi atanu a kóvadu, jiphiladi dikuinhi, ibaka dikuinhi; jingôua ja jiphiladi ni mikambu iê ja phalata.

¹³ O ku mbandu ia thunda ue, jikulutina jê jʼambata makuinhi atanu a kóvadu.

¹⁴ O jikulutina ja mbandu imoxi ia muelu, kuinhi dia kóvuadu ni kitanu; o jiphiladi jê jitatu, o ibaka iê itatu.

¹⁵ Ku mbandu ia mukuá kiene kimoxi; mbandu iii jikulutina jê ue kuinhi dia kóvadu ni kitanu, kifua mbandu ni mbandu kuinhi dia kóvadu ni kitanu, muelu bhu kaẋi; kuku philadi jitatu ni ibaka itatu, kuku ue kiene.

¹⁶ O jikulutina joso ja kondoloka o kithâdi, ja linhu ia fina iòxise.

¹⁷ O ibaka ia jiphiladi ia ngôndo; jingôua ja jiphiladi ni mikambu iê ia phalata; o mítue ku thandu dia jiphiladi, iófolale ni phalata; jiphiladi joso ja kithâdi ji kala ue ni mikambu ia phalata.

¹⁸ O dibeka dia kuxita bhu muelu ua kithâdi, a di iudika ni ufunu ua mesene ia jinjikita, ni ngoji ja azulu ni ja púlupula, ni ja kalumezim, ni linhu ia fina iouinde; kulebha kuê makuinhi aiadi a kóvadu, o lubongo luê kóvadu jitanu bhu kuzanza, kiene kimoxi ni jikulutina ja kithâdi.

¹⁹ Ku kala jiphiladi jê jiuana, ni ibaka iê iuana ia ngôndo, o jingôua ja phalata; mítue iofolale ni phalata, ni mikambu ia phalata ioso.

²⁰ O jiphapha ja balaka, ni ja kithâdi kia kondoloka, ja ngôndo ioso.

Konda ia utadi uaii mu ufunu ua balaka

²¹ Iii iene o konda ia utadi uaii mu ufunu ua balaka ia umbangi, kala kia u kuata konda mu kitumu kia Mozé, kuala o jilevita ja tuamenena kuala Itamale, monʼa Alá, o nganga.

²² Bezalele monʼa Hule, ku muiji ua Juda, muene mesene ua iudika ima ioso ia tumu Jihova kua Mozé.

²³ Mesene ia mukuâ ua kexi-nê kumoxi mu sedivisu iii, Aholiiabe, monʼa Ahisamake, ku muiji ua Dane, hete, mukua ufunu ua kuseta, mesene ue ia jinjikita ni jingoji ja azulu, ni ja púlupula, ni ja kalumezim, ni linhu ia fina.

²⁴ Ulu uoso uaii mu ufunu ua kuiudika dibhezelu, o ulu athu ua bhakula mu ujitu ua vondadi, makuinhi aiadi a talendu niʼvua, ni hâma sambuadi ia xikulu ni makuinhi atatu, o xikulu iene ia dibhezelu.

²⁵ O phalata ia oso a a bhangele o disonekenu diâ mu kilômbo, ia bhana hâma ia talendu, ni midi ni hâma sambuadi ni makuinhi sambuadi ni kitanu kia xikulu, o xikulu iene muene ia dibhezelu.

²⁶ Kala mútue u bhana baka, kifua kaxaxe ka xikulu, o xikulu iene muene ia dibhezelu; mala ene oso muene a a bhitisa mu disonekenuʼodio, oso a bhiẋila kiá mu kitala kia makuinhi aiadi a muvu, mba a somboka-mu, a tenene hâma jisamanu ja jimidi ni midi jitatu, ni hâma jitanu ni makuinhi atanu, a muthu.

²⁷ O hâma ia talendu ia phalata, iene ieẋikila o ibaka ia dibhezelu, ni ibaka ia kibatulu; hâma ia ibaka mu hâma ia talendu, kala kibaka talendu imoxi.

²⁸ O midi ni hâma sambuadi ni makuinhi sambuadi ni kitanu kia xikulu, iene ia iudikila o jingôua ja jiphiladi, ni kufolala o mítue ia jiphiladi, ni kuiudika o mikambu ia jiphiladi.

²⁹ O ngôndo ue ia bhakula mu ujitu ua vondadi kuala anʼa Izalaiele oso, ia tena makuinhi sambuadi a talendu ni midi jiiadi ni hâma jiuana ja xikulu.

³⁰ Ngôndo iii iene ia iudikila ibaka ia muelu ua balaka ia kutakanena, ni kalatódio ka ngôndo, ni ngalade iê ia ngôndo iedi kala uanda, ni imbamba ioso ia tokala ku kalatódio.

³¹ Ni ibaka ioso ia kithâdi kia kondoloka, ni ibaka ia muelu ua kithâdi, ni jiphapha joso ja balaka, ni jiphapha ja kithâdi kia bhiti mu kanga.