Makatukilu 37 - O Mikanda Ikola

Kioso kia tunga o Álaka

¹ Bezalele anga u iudika álaka ia muẋi ua xitimi; kulebha kuê kôvadu jiiadi ni kaxaxi, kuzanza kuê kóvadu ni kaxaxi, o kitala kiê kôvadu ni kaxaxi,

² anga u i folala ni ulu ua fina ni moxi ni ku kanga, ua te ni dikolôua diê dia ulu, di kondoloka.

³ Anga u iẋika ue ni malenge auana a ulu, akuata mu jithungi jê jiuana; malenge maiadi ku mbandu imoxi, malenge ma mukuá maiadi ku mbandu ia mukuá.

⁴ Anga u iudika ni mikambu ia muẋi ua xitimi, mikambu anga u i folala ni ulu.

⁵ Mikambu iii u i ta mu malenge ku mbandu jiiadi ja álaka, i kale ia kuambatela o álaka.

Kibhuna kia kiadi

⁶ U iudika ue ni kibhuna kia kiadi, kia ulu ua fina, kulebha kuê kôvadu jiiadi ni kaxaxi, o kuzanza kuê kóvadu ni kaxaxe.

⁷ Anga u iudika ni jixelube jiiadi ja ulu; ua ji iudika ni ufunu ua kusula, u ji ta ku sungu jiiadi ja kibhuna kia kiadi.

⁸ Bhu sungu kunu bhu kala xelube imoxi, bhu sungu koko xelube ia mukuá; ja di kuatenena koko, ku kibhuna kia kiadi ku jisungu jê.

⁹ Jixelube anga ji oleka mabhabha mâ bhulu, ja vungina kibhuna kia kiadi ni mabhabha mâ, jiiadi joso ja di bhana jipholo; pholo jâ ue u ji bheteka ji lunga ku kibhuna kia kiadi.

Kioso kia bhanga o Meza

¹⁰ Anga u iudika ue ni meza ma muẋi ua xitimi; o kulebha kuê kôvadu jiiadi, kukula kuê kóvadu, o kitala kiê kóvadu ni kaxaxi.

¹¹ Meza ua a folala ni ulu ua fina, ua te ni dikolôua diê dia ulu di kondoloka mu jimbandu.

¹² Iu ua iudika ue ni muhuhu ua kondoloka mu jimbandu, kukula kuê milembu iuana ia dikanda dia lukuaku, anga u bhitisa-ku dikolôua dia ulu.

¹³ Anga u zunza ue malenge mê mauana ma ulu; u ta malenge mu jithungi ja inama iê iuana.

¹⁴ Malenge ma zukama ku muhuhu ua kondoloka, muene mua tela o mikambu ia kuambatela o meza.

¹⁵ Mikambu ua i iudika ia muẋi ua xitimi, anga u i folala ni ulu; iene o mikambu ia kuambatela o meza.

¹⁶ Anga u iudika ni imbamba ia tokala ku meza, ni malonga mê, ni jingutu jê, ni itutu iê ioso, ni jikopho phala o mákunua, iene ioso ua i bhange ia ulu, ua uabha kiavulu.

Kioso kia bhanga o jikandeia

¹⁷ Anga u iudika ue kandeia ka ulu ua di kenze kiambote; ua ka iudika ni ufunu ua kusula, ni inama iê ni lumbungu luê; ni kopho jê jedi ni kixina ni itulu iê iene ioso ua i sudila kumoxi.

¹⁸ Ku kala thangu jê jisamanu ji tunda mu jimbanji jê, mbandu iii ia kandeia thangu jitatu, mbandu iii ia kandeia thangu jitatu.

¹⁹ Luthangu lu kala ni kopho jitatu jedi kala itulu ia mumêndoua, ni kixina ni kitulu; thangu joso jisamanu ji tunda mu kandeia, kiene.

²⁰ Maji o kandeia kene ka kala ni kopho jiuana jila kala itulu ia mumêndoua, jikala ni ixina ni itulu iê.

²¹ Kixina ki kala bhoxi dia thangu jiiadi, a i sudila kumoxi; ni kixina kia mukuá ki kala bhoxi dia thangu jiiadi, a i sudila kumoxi; ni kixina kia mukuá dingi ki kala bhoxi dia thangu jiiadi, a i sudila kumoxi; kifua thangu jisamanu ji tunda mu kandeia.

²² Ni ixina ni jithangu ji kala pesa imoxi; iene ioso a i sudila kumoxi, ia ulu ua di kenze kiambote.

²³ Anga u iudika jilâmbada jê, sambuadi; ni tanaji jê, ni dibandeja diê, ja ulu uoso ua di kenze kiambote.

²⁴ Talendu ia ulu ua fina uaii-mu, mu kuiudika kandeia kene, ni ima iê ia mukuá iii ia tokala-ku, o itulu iê.

Kioso kia bhanga o Kalatódio ka uasu ua dizumba

²⁵ Anga u iudika ni kalatódio ka dixi dia dizumba, ka muẋi ua xitimi; kulebha kuê kua kóvadu imoxi, o kuzanza kuê kóvadu imoxi; kuma mbandu jiuana joso ja sokela kumoxi; o kitala kiê kóvadu jiiadi; ni jimbinga jê ji kuatenena koko a ji sudila kumoxi.

²⁶ Ua ka folala ni ulu ua fina, ni kuthandu ni mu jimbandu, ni jimbinga jê;

²⁷ ua iudika ue ni malenge maiadi ma ulu, ma zukama ku dikolóua; ku mbandu jê jiiadi mu jimbinga, maiadi-maiadi; malenge-phe iá ma kutela mikambu iê ia kuambatela.

²⁸ O mikambu iê ia iudika ia muẋi ua xitimi, iu ua i folala ni ulu.

²⁹ Anga u iudika ue ni maji akôla a kuundila, ni uasu ua ibatubatu ia uabha mazumba, iólunge kiambote ni ufunu ua mesene ia jinguendu, uene mu iudika o ima ia mazumba.