Makatukilu 35 - O Mikanda Ikola

¹ Kukila sabhalu Mozé anga u bongolola kilômbo kioso kia anʼa Izalaiele, u a ambela, uixi: Ene o makʼá a mi tumu Jihova, phala mu a kumbidile:

² Kuala izuua isamanu ia kubhanga sedivisu, kia kasambuadi-phe ki mi kala kizuua kiangene, sabhalu ia kunhohena Jihova; uoso u bhanga kikalakalu mu kizuua kiki, muthu ua ku mu jibha.

³ Kana kuuika túbhia ku mabhata menu oso, mu kizuua kia sabhalu.

Nzambi u tuma kubheka imbamba ia kuiudika balaka

⁴ Mozé anga u ambela dingi kilômbo kioso kia anʼa Izalaiele, uixi: Kima kiki kia tumu Jihova, kuila:

⁵ Mu tambula mudienu, ku ioso i muala na-iu, mukungu ua Jihova; uoso muxima ua mu zangumuka mu vondadi iê, a bheke ujitu kua Jihova; ni ulu, ni phalta, ni ngôndo,

⁶ ni azulu, ni pulúpula, ni kalumezim, niu linhu ia fina ni ndemba ja jihombo,

⁷ ni ibha ia ilumbe ia jimbudi ióteke ni husu, ni ibha ia iama ia menha, ni mabaia ma muẋi ua xitimi,

⁸ ni maji ma kandeia ni ibatubatu ia mazumba phala maji a kuuesa, ni uasu ua dixi dia dizumba.

⁹ Ni matadi ma sardónika, ni matadi ma mukuá ma kusokeka, ku efodi ni ku kixita-thulu.

O imbamba ia Balaka

¹⁰ Athu oso ala jihete ja muxima mudienu, eze, a iudike ima ioso ia tumu Jihova:

¹¹ O balaka, ni jikulutina jê, ni jithanga jê, ni jikoloxete, ni mabaia a jingunji, ni mikangala, ni jiphiladi, ni ibaka;

¹² ni álaka, ni mikambu iê, ni kibhuna kia kiadi, ni dibeka dia kibatulu,

¹³ ni meza, ni mikambu iê, ni malonga mê, ni mbolo ja kilumbu,

¹⁴ ni kandeia ka kusendela, ni imbamba iê, ni jilambada jê, ni maji ma kusendela,

¹⁵ ni kalatódio ka dixi dia dizumba ni mikambu iê, ni maji ma kuundila, ni uasu ua uabha dizumba, ni dibeka dia kuxita bhu muelu ua balaka;

¹⁶ ni kalatódio ka jisata ja kuoha, ni kiseselu kiê kia ngôndo, ni imbamba iê ioso, ni mbasinha iê ia kusukuila, ni mbunda iê i tula bhoxi;

¹⁷ ni jikulutina ja kithâdi, ni jiphiladi jê, ni ibaka iê ni dibeka dia muelu ua kithâdi;

¹⁸ ni jiphiladi ja balaka, ni jiphapha ja kithâdi, ni mikolo iê,

¹⁹ ni izuatu ia ukunji iòtunge uhete, ia kusedivila na-iu mu kididi kikôla, izuuatu iangene ia nganga Alá, ni izuatu ia anʼê ia kuzuatela ku unganga.

Mundu a bhakula ni vondadi

²⁰ Kilombo kioso kia anʼa Izalaiele anga a tunda bhu pholo ia Mozé.

²¹ Anga eza, muthu uoso muxima uê ua mu tumu-kiu, ku nzumbi iê kua mu kala vondadi, a bheka ujitu ua Jihova, imbamba ia kuiudika balaka ia kutakanena, ia tokala mu kikalakalu kiê, ni izuatu iê ikola.

²² Athu oso, ni mala ni ahatu anga eza mu vondadi iâ, a bheka ni jifunete, ni jibixa, ni jinela, ni malubha-mnbu a xingu, makembu moso ma ulu; athu oso anga a kala mu kubhana ujitu ua ulu kua Jihova.

²³ Uoso ue ua kuata jingoji ja azulu, ni ja púlupula, ni kalumezim, ni linhu ia fina, ni ndemba ja jihombo ni ibha ia ilumbe ia jimbudi ióteke i ia kusuka, ni ibha ia kiama kia menha, iene ioso eza na-iu.

²⁴ Uoso ue ua kuata phalata, mba ngôndo, uiza na-iu mu bhakula kua Jihova; uoso ue ua kuata miẋi ia xitimi ia fuama mu ufunu ua kikalakalu, ueza na-iu.

²⁵ Ni ahatu oso ala jihete ja kubhota ni maku mâ, a bheka ue o jingoji ja bhoto, ni ja azulu, ni ja púlupula, ni ja kalumezim, ni linhu ia fina,

²⁶ ni ahatu a jihete, oso ala ni vondadi ia muxima, ejiia kubhota ndemba ja jihombo, a bheka ue.

²⁷ O adiakimi, o ilamba, ene a bheka matadi ma sardónika, ni matadi mamukuá ma kusokeka, ma kuta ku efodi ni ku kixita-thulu,

²⁸ ni ibatubatu ia uabha mazumba, ni maji ma kusendela, ni maji ma kuundila, ni uasu ua dixi dia dizumba.

²⁹ Anʼa Izalaiele a bheka ujitu ua vondadi iâ kua Jihova; ni mala ni ahatu oso ala ni vondadi ia muxima, a bheka ima ioso ia tokala mu kikalakalu kia kuiudika ioso ia tumu Jihova kua Mozé.

O kixanu kia Bezalele ni Aholiiabe.

³⁰ Mozé anga u ambela dingi anʼa Izalaiele, uixi: Talesenu, Jihova uexana mu dijina diê, Bezalele, monʼa Hudi, monʼa Hule, ku muiji ua Juda;

³¹ Nzumbi ia Nzambi, iu ua muizalesa ni uhete, ni kutongoloka, ni kuijiia, mu ufunu uoso ua kuiudika;

³² phala kuxinganeka jindunge, ni kukalakala ku ulu, ni phalata, ni ku ngôndo,

³³ ni kuseta matadi ma kusokeka ni kusonga miẋi, ni ufunu uoso muene ua kuiudika.

³⁴ Ua te ku muxima uê ni umesene ua kulonga akuâ, ni muene, ni Aholiiabe, monʼa Ahisamake, ku muiji ua Dane.

³⁵ Enhó ua ezalesa ni uhete ua muxima, ua kukalakala maufunu oso, ni ua kusonga, ni ua kuseta, ni ua jinjikita, ni ua kutunga jingoji ja ulu, ni ja púlupula, ni ja kalumezim, ni linhu ia fina, ni ufunu uoso ua mulongo, kifua jihete ja maufunu oso.