Makatukilu 33 - O Mikanda Ikola

¹ Ngana ka mesena kuenda dingi ni Izalaiele Jihova anga u ambela Mozé, uixi: Katukenu! Bhabha tundenu-bhu, ni eie ni mundu u ua katula mʼoxi ia Ijitu, muie kʼoxi i nga lokela Mbalahamu, ni Izake, ni Jakobo, ngixi: Ngi i bhana mbutu ienu.

² Nga-nda kutuma-phe Anju ku ku tuamenena; o Makanana, ni Mamodi, ni Mahiti, ni Mapelezi, ni Mahivi, ni Majebusi, nga-nda ku a kaia-mu;

³ bandenu-phe muie mu ixi i kunguluka lete ni uiki; maji eme-muène-phe ki ngende dingi muʼaxaxi kenu, kuma enu muala mu mundu ua thathamana jixingu, sumba ngi mi buidisila mu njila.

⁴ O mundu-phe ki evu hundu iaiibha kiki, a kala ni mukondo; kana dingi muthu mudiâ ua di te makembu mê.

⁵ Jihova anga u ambela Mozé, uixi: Ambela anʼa Izalaiele, kuma: Mu mundu ua ngangamana jixingu; eme se ngenda dingi muʼaxaxe kenu, né bhuófele ngó, ngi mi buidisa muene; zulenu-phe makembu menu, phala ngi mone kioso ki ngi mi bhanga.

⁶ Anʼa Izalaiele-phe anga a zula o makembu mâ, tunde ku mulundu ua Holebe, ku pholo ka ma zuata dingi.

O Balaka ia Dibhongolokelu

⁷ Mozé anga u katula o balaka, hé u i ximbika mu kanga, bhu kibangu u xia-bhu muene kadikanga; u ixana kiá balaka ia kutakanena. O uoso uedi u sota Jihova, u xia bhu kibangu uia ku balaka ia kutakanena iala mu kanga.

⁸ Kioso-phe Mozé ki aia ku balaka, mundu uoso emana, kala muthu bhu muelu ua fundu iê, a tala kuala kuia Mozé, katé kia bokona mu balaka.

⁹ Mozé-phe kia zubha kubokona mu balaka, philadi ia dituta i tuluka, imana bhu muelu ua balaka; Jihova anga u kuata kuzuela ni Mozé.

¹⁰ Mundu uoso anga aia ni kumona o philadi ia dituta iemana bhu muelu ua balaka; mundu uoso anga emana, a bheza Jihova, kala muthu bhu muelu ua fundu iê.

¹¹ Jihova anga u kala mu zuela ni Mozé, pholo ni pholo kala muthu uoso-uoso kia zuela ni kamba diê. Anga u vutuka kuia ku kibangu; maji o dikuenze diê-phe, Josuué, monʼa Nune, munzangala, ka kexile mu tunda-mu mu balaka.

Mozé u bhinga Nzambi kukala-nâ

¹² Mozé anga u zuela ni Jihova, uixi: Ua mono, Eie ua ngʼambela, uixi: U bheka mundu iú ku ala kuia; maji kua ngi tangela uoso ua-nda ku mu tuma, ngenda-nê kumoxi. Maji Eie ua ngi tangela, kuma: U muthu nga ku ijiia o dijina; uixi dingi: Ua sange ngalasa ku mesu mami.

¹³ Kiki-phe, nga ku diondo, se nga sange ngalasa ku mesu mé, ngʼidikize jinjila jé ja ku di tuma ni athu, phala ngʼijiie uendelu ué, ngi sange ngalasa ku mesu mé; ni u tongolole kuma muiji iú uene o mundu ué.

¹⁴ Kuala muene: Pholo iami iene ia-nda ku ku tuamenena, eme muene ngi ku bhana kunhoha.

¹⁵ Mozé uetaia, uixi: Pholo ié se ia tu kambe, bhabha ku tu katule-bhu.

¹⁶ Kuma ki tualʼiki, a kʼijiia kiebhi kuma tua sange ngalasa ku mesu mé ni eme ni mundu ué uenhú? Ka kʼijidila mu kuila tuendela kumoxi, eie muene i uala ku tu bheka, bhene muene bhu tu di tunguila, ni eme ni mundu ué, ku mundu uoso mu ngongo.

¹⁷ Jihova anga u ambela Mozé, uixi: Ngi ki bhanga muene, kima kienhiki ki ua zuela, kuma eie ua sange muene ngalasa ku mesu mami, u muthu nga ku ijiia dijina.

Mozé u bhinga Nzambi ku mu idikiza kujinga kuê

¹⁸ Mozé anga u zuela, uixi: Ngʼidikize-phe, nga ku diondo, o kujinga kué.

¹⁹ Uixi: Nga-nda ku bhangesa kuila kuuabha kuami kuoso ku ku bhita ku pholo, hé ngi kola o dijina dia Jihova bhu pholo ié, hé ngi lendukila uoso nga tokala ku mu kuatela henda.

²⁰ Uixi-phe dingi: pholo iami ku tena ku i mona; kuma kana muthu u tena ku ngi mona nʼa laie.

²¹ Jihova anga u amba dingi, uixi: Sai kididi kia ngi zukama bhabha, eie u imana bheneʼobho ku ndánji.

²² Kioso-phe ki bhita o kujinga kuami, ngi ku bhaka mu ṗhudi ia ditadi, anga ngi ku vungina ni lukualu luami, katé kioso ki ngi zubha kusomboka.

²³ O kioso ki ngi katula lukuaku, eiʼu ngi mona ngó dikunda; kuma o Pholo iami kana muthu u tena ku i mona.