Makatukilu 31 - O Mikanda Ikola

O kixanu kia Bezalele ni Aholiiabe

¹ Jihova anga u ambela dingi Ji Mozé, uixi:

² Tala, eme ngʼexana mu dijina diê, Bezalele monʼa Udi, monaʼa Hule, ku muiji ua Juda;

³ muene-phe nga mu izalesa ni Nzumbi ia Nzambi, mu uhete, ni kutongoloka, ni kuijiia, mu ufunu uoso ua kuiudika,

⁴ phala kuxinganeka jindunge, ni kukalakala ku ulu, ni phalata, ni ngôndo.

⁵ Ni kuseta matadi a kusokeka, ni kusonga miẋi, ni ufunu uoso muene ua kuiudika.

⁶ Talesa ue, sai mukuâ nga mu bhana-nê phala ku mu kuatekesa, dijina diê Aholiiabe, monʼa Ahisamake, ku muiji ua Dane; ni athu amukuá oso ala jihete, nga a te ku miẋima iâ o kuijiia kua tokala, phala a tene kuiudika ima ioso i nga ku tumu.

⁷ O balaka ia kutakanena, ni álaka ia umbangi, ni kibhuna kia kiadi ku thandu diê, ni imbamba ioso ia balaka,

⁸ ni meza ni malonga mê, ni kandeia ka ulu ua kenzuluka kiambote, ni imbamba iê ioso, ni kalatódio ka dixi dia dizumba,

⁹ ni kalatódio ka jisata ja kuoha, ni imbamba iê ioso, ni mbasinha ia kusukuila, ni mbunda iê,

¹⁰ ni izuatu ia kutunga uhete, izuatu ikola ia Alá ia unganga, ni izuatu ia anʼê, ia kusedevila ku unganga,

¹¹ ni maji a kuundila, ni isenso ia ibatubatu iauabha o dizumba, phala mu kididi kikôla; iene ioso kiá i nga ku lekelela, ene a i iudika.

Kizuua kiangene kia sabhalu, ni matadi aiadi a umbangi

¹² Jihova anga u ambela dingi Mozé, uixi:

¹³ Eie-phe ambela ue anʼa Izalaiele, kuma: Mu kuata jinga muene o jisabhalu jami; kuma kijimbuete bhu kaẋi kʼami ni enu, ku miji ienu ioso katé ku hádia; phala mu kʼijiie kuma eme Jihova, nga mi bhange mu athu akôla.

¹⁴ Mukonda dia kiki mu kuata jinga o sabhalu, kuma kizuua kienu kikôla; uoso u ki fukula a mu jibha; o uoso u kalakala kizuua kienhókio, muenhu ió ua tokala ku u batula mu kaẋi ka jindandu jê.

¹⁵ Mu kalakala mu izuua isamanu, o kia kasambuadi-phe kiene kia sabhalu ia dinhohenu di kôla; ki kôla kua Jihova; o uoso u bhanga kima kioso-kioso mu kizuua kia Sabhalu, muthu ua ku mu jibha.

¹⁶ Kala kiki, anʼa Izalaiele a kuate o sabhalu, ni ku i aiuka ku miji iâ ioso katé ku hádia ni hádia; kikala kikutu kienu ki nangenena ku miji ioso.

¹⁷ Kikale kijimbuete bhu kaẋi ka eme ni anʼa Izalaiele sé dizubhilu; kuma Jihova ua kalakala diulu ni ixi mu izuua isamanu, o kia sambuadi anga u ki nhoha, u sunga nguzu, anga u tululuka.

¹⁸ O kia zubha ku di kunda ku mulundu ua Sinai, muene u bhana kua Mozé ibasakasa iiadi ia umbangi, ibasakasa ia matadi, ósoneke ni mulembu ua Nzambi.