Makatukilu 30 - O Mikanda Ikola

O Kalatódio ka uasu ua dizumba

¹ U iudika ue ni kalatódio phala kuohela-ku uasu ua dizumba; u ka iudika ni muẋi ua xitimi.

² Mu kulebha kuê ka kala ni kôvadu imoxi, o mu kuzanza ue kôvadu imoxi; mbandu jiuana joso ji sokela; o kitala kiê kôvado jiiadi; ni jimbinga jê a ji sudila kumoxi, ji kuatenena koko.

³ U ka xiia ni ulu ua fina, ni ku thandu, ni mu jimbandu, ni jimbinga jê; u iudika ue ni dikolôua diê dia ulu di kondoloka.

⁴ U iudika ue ni malenge maiadi ma ulu, ma zukama ku dikolôua; ku mbandu jê jiiadi mu jimbanji; malenge ma kala ma kutela mikambu iê ia kuambatela.

⁵ Mikambu i kala ia muẋi ua xitimi, u i folala ni ulu.

⁶ U ka tula mu sala kunu, kifua kibatulu ki bhita ku dima diê, o ku dima dia kibatulu mu xilu, muene mu kala álaka ia umbangi, ni kibhuna kiê kia kiadi kia tula ku thandu, o moxi diê mu kala umbangi; kiene o kididi bhu tu takanena.

⁷ Alá kuene kuohela jinga o uasu ua uabha o dizumba; izuua ioso mu kimene, kioso kia iukisa o jikandeia, kiene kioha o uasu ua dizumba.

⁸ Ni kioso kia uika ue o jikandeia mu ngoloxi, kuila mixinda ia maku ia jimi kiá, uoha uasu ua dizumba; o mu kubhanga kiki, bhu pholo ia Jihova bhu kala jinga uasu ua dizumba ku miji ienu ioso, katé ku hádia ni hádia.

⁹ Kana kuohela-ku uasu uengi, kana kuta-ku sata ia kuoha, né mubhaku ua musa, né kulunduluila-ku ngó kiamenga.

¹⁰ Alá u bhuisa ikuma ku jimbinga ja kalatódio kaka, lumoxi ku muvu, ni manhinga ma sata ia kubhuisa ikuma; lumoxi ku muvu, ua kà bhuisa ikuma ku thandu dia kalatódio, katé bhua kà suka o miji ienu. Kalatódio kaka, ka kôla kinéne, kangene ka Jihova.

O kukula mienhu

¹¹ Jihova anga u zuela dingi ni Mozé, uixi:

¹² Kioso ki ualula (u kuata konda ia) anʼa Izalaiele, phala ku a ejiia kuvula kuâ se ala kikuẋi, ki bhinga kala muthu kia mu kondala, u bhana kidikulu mu kukula o muenhu uê kua Jihova; phala ki ku bhite kibuika ki tunda mu ku alula.

¹³ Uoso-phe a mu alula kiá, ua kà bhana kiki: Kaxaxi ka xikulu, xikulu-phe ia dibhezelu; (ioio iala ni makuinhi aiadi a milambongo) kaxaxi ka xikulu uene ujitu ua Ngana.

¹⁴ Uoso-uoso u bhita ku dialuilu, se ua bhiẋila mu kitala kia makuinhi aiadi a muvu mba ua somboka-mu kiá, u bhana ujitu uangene ua Jihova.

¹⁵ O monhi ka te-ku, o ngadiama ue ka selula-ku, ki kale kaxaxe ka xikulu ka bhana mu ujitu ua Jihova phala mienhu ienu ku i bhuisa ikuma.

¹⁶ Eie-phe u tambula kitadi kiki kia ku di bhuisa ikuma, ku anʼa Izalaiele, phala ku ki bhana mu kikalakalu kia balaka ia Jihova, phala enu uenu ku di bhuisa ikuma ku mienhu ienu.

Mbasinha ia ngôndo

¹⁷ Jihova anga u ambela Mozé, uixi:

¹⁸ U iudika ue ni mbasinha ia ngôndo, ni mbunda iê i tula bhoxi, ia ngôndo, ia kusukuila. U i tula bhu kaẋi ka balaka ia kutakanena ni kalatódio, anga u ta-bhu menha.

¹⁹ Ni Alá-phe ni anʼê bhuene bhu sukuila o maku mâ ni inama iâ.

²⁰ Kioso kia bokona mu balaka ia kutakanena, a di sukula ni menha, phala ka fue; mba kioso kia zukama ku kalatódio mu kusedivila, mu kuoha sata ia kubhakula ni túbhia kua Jihova.

²¹ Bhenhobho a di sukule maku mâ ni inama phala ka fue; ki kale kijila kiâ ku thembu joso, ni muene ni mbutu iê ia kà mu bhingana katé bhuoso bhua kà suka miji iâ.

Maji akôla a kuundila

²² Jihova anga u kumuna dingi kua Mozé, uixi:

²³ Eie-phe u kuata ue ni ibatubatu ia miẋi ia mazumba, ioso iate kiavulu: ni mira ni sumu, hâma jitanu ja xikulu, o kanela ka uabha dizumba, ka kala kaxaxi, kifua hâma jiiadi ja xikulu ni makuinhi atanu, ni kálamu ia uabha dizumba, i kala hâma jiiadi ja xikulu ni makuinhi atanu.

²⁴ Ni kásia, ka kala hâma jitanu ja xikulu, xikulu-phe ia dibhezelu, ni hine imoxi ia maji a mudiva;

²⁵ anga a iudika na-iu maji akôla a kuundila, maji a dizumba diambote, òlunge kiambote ni ufunu uoso, kala kiene mu bhanga kiá o jimesene ja ufunu ua maji a dizumba diambote.

²⁶ Maji iá ene u unda-nâ o balaka ia kutakanena, ni álaka ia umbangi.

²⁷ Ni meza ni malonga mê, ni kandeia ni imbamba iê, ni kalatódio ka dixi dia dizumba,

²⁸ ni kalatódio ka sata ja kuoha, ni imbamba iê ioso, ni mbasinha iê ioso, ni mbasinha ia kusukuila, ni mbunda iê i tula bhoxi.

²⁹ U i lumba ioso iii i kale i kôla kinéne; imbamba ioso kiá i tula-ku ngoho, i kôla kiá.

³⁰ Ni Alá ni anʼê, u a ta maji a ku a unda ni ku a kôlesa, phala a ngi kalakele ku unganga.

³¹ Ua kàmbela anʼa Izalaiele, kuma: O majiʼá, a kala maji ami a kuundila, katé bhuà suka o miji ienu.

³² Kana ku a uesa ku mukutu ua muthu uoso-uoso, kana kuiudika maji a kuuesa a fikisa ku iá; maji angene a kôla, enu uenu mu a ejiia ni ku a tala kuma akôla.

³³ Uoso u iudika maji kala iá, mba u a ta ku mukutu ua muthu uengi, ió muthu ua ku mu batula mu jindandu jê.

Uasu ukôla ua dixi dia dizumba

³⁴ Jihova anga uambela dingi Mozé, uixi: U kuata mauasu ma uabha dizumba ni xitolake, ni oníxa ni ngálbano i nuha kiambote, kumoxi ni uasu ua isenso ua zele kiambote, ima ioso iii i sokela mu kunema ku pezu.

³⁵ Anga u iudika na-iu o isenso ia uasu ua uabha dizumba, uòlunge kiambote ni uhete uoso ua mesene ia ufunu ua maji a mazumba, nʼòtoue ni môngua, ua zele kiambote ukôla.

³⁶ Mbandu ia mukuá u i zuka, i kala fufutila, anga u i bhaka bhu pholo ia umbangi mu balaka ia kutakanena, bhene bhu ngi takanena jinga ni eie.

³⁷ Maji-phe o uasu uòlunge kala iú, kana ku u iudika phala enu kuenda ni ku u bhanga kioso ki mua mesena; mu u ijiia kuma ukôla, uangene ua Jihova.

³⁸ Uoso u iudika uasu kala iú, phala kuenda ni ku u fuenha o dizumba diê, muthu ua ku mu batula mu jindandu jê.