Makatukilu 24 - O Mikanda Ikola

Nzambi u tuma Mozé ni adiakimi kubanda mu mulundu

¹ Anga u ambela Mozé, uixi: Banda kunu kua Jihova, ni eie ni Alá, ni Nabade ni Abihu, ni makuinhi sambuadi a adiakimi a Izalaiele; muà suke mu kanga ni kubheza;

² Mozé ngó ubheka uê u zukama kua Jihova; maji o ene-phe ka zukame-ku mba o mundu ue u banda-nê.

³ Mozé anga uiza u tangela o mundu maka moso ma Jihova, ni mabatuilu mê ma milonga; mundu uoso anga etaia ni dízui dimoxi, exi: Maka moso ma tange Jihova, ene muene u tu bhanga.

⁴ Mozé anga u soneka maka moso ma Jihova, anga u di meneka mu kimene, u tunga kalatódio mu betekete ia mulundu, u imika kuinhi dia philadi ni kiiadi, ua fikisa mu kuinhi dia muiji ni Kiiadi ia Izalaiele.

⁵ Anga u tuma minzangala ku anʼa Izalaiele, kuia mu kubhakula jisata ja kuoha, a jibha jisata ja paze, ja jingombe ja satela Jihova.

⁶ Mozé anga u tambula mbandu ia mukuá ia manhinga, u ma ta bhu jimbasinha, o mbandu ia mukuá u i sangela ku kalatódio.

⁷ Anga u kuata divulu dia kikutu, hé u tanga-mu hanji, mundu uoso iú uivua; anga amba, exi: Ioso ia tange Jihova, iene i tu bhanga, tu tumaka muene.

⁸ Mozé anga u katula o manhinga, u a sangela ku mundu, uixi: Talenu, manhinga ma kikutu, kia te Jihova ni enu, ku thandu dia maka osoʼá.

⁹ Kia zubha kubhanga kiki, Mozé ni Alá a banda ni Nadabe ni Abihu, ni makuinhi sambuadi a adiakime a Izalaiele;

¹⁰ anga a mona Nzambi ia Izalaiele, kala inama ua i tula ku mateia ma azulu, mukuâ ni matadi ma safídia, mesu a bhitakena kala uala mu tala o diulu.

¹¹ Adiakimi enhá, a a solo mu anʼa Izalaiele, muene ka a zengela lukuaku luê; bhenhobho a mona Nzambi, anga a dia, a nua.

Mozé ku Mulundu ua Sinai

¹² Jihova anga u ambela Mozé, uixi: banda kunu ko kuami mu mulundu, u kale muenhomo; eme-phe ngi ku bhane ibasakasa ia matadi, ni ngonge ni kitumu, ioso i nga soneka, phala u kale mu ku a longa-iu.

¹³ Mozé anga u balumuka bhenhobho, ni dikuenze diê Josuué, uene ku mu xibhidila; o Mozé kia mu banda mu mulundu kua Nzambi,

¹⁴ u ambela adiakimi, uixi: Tu kingienu hanji bhenhobho, katé ki tuiza, tu mi sange; talenu-phe, Alá ni Hele ene mua xala-nâ; uoso uala ni maka, eza-nâ kua ene.

¹⁵ Mozé anga u banda mu mulundu. Mulundu uoso-phe a u vungina ku dituta.

¹⁶ O kubenha kua kizunda kia Nzambi-phe, kua xala ku thandu dia mulundu ua Sinai, dituta dia u vungina mu izuua isamanu, o mu kizuua kia kasambuadi-phe, Jihova anga u ixana Mozé, ua mu ixanena mu kaẋi ka dituta.

¹⁷ O kubenha kua kizunda kia Jihova, anga ku kala kala kitúbhia kia muzukuta kia uama bhu zoko-zoko dia mulundu, ku mesu ma anʼa Izalaiele.

¹⁸ Mozé anga u bokona mu kaẋi ka dituta, u banda mu mulundu; Mozé anga u kala mu mulundu muenhomo makuinhi auana a izuua ni makuinhi auana a usuku.