Makatukilu 23 - O Mikanda Ikola

Umbangi ua makutu ni kudiodia milonga

¹ Kana kuenda ni kabódio; kana kuta lukuaku lué ni mukua phulu, phala ku kala u mbangi ia makutu.

² Kana kukaiela kizulututu kia mundu, mu bhanga kima kiaiibha; né mu kufúnda, kana ku kaiela o mundu a mesena kudiodia mulonga.

³ Né mu kubatuila ngadiama, ku mu lungisa, se ua kambe kulunga.

⁴ Ki u sanga o ngombe ia nguma ié, mba o bulu iê ia jimbidila, eie u mu bhekela-iu muene, sè kufula.

⁵ Ki u mona o bulu ia ió ua ku zembe, ia zeka bhoxi ni kimbamba kia mu tundu, manhi u kamba ku mu kuatekesa? Kana kusomboka, u mu kuatekesa muene kusukunuka-bhu.

⁶ Kana kudiodia mulonga, phala ngadiama nʼa kambe kulunga, se uala ni kidi kiê.

⁷ Ku maka ma makutu tunda-ku, a ku xale dikanga. O ua kambe kikuma, ni ió ua iuka, kana ku mu jibha; kuma eme ki ngi ẋikina kulungisa kisuéia.

⁸ Kana kutambula kitadi kia ku ku bhomba, kuma kitadi ki bheka ufuófo ku akua mesu; ki bheka kuila, o maka a ió uaiuka, ela mu kubhengalala.

⁹ Nzuángiza ue kana ku mu bhikisa; kuma enu muejiia muxima ua nzuángiza, mbata enu uenu mua kexile mu jinzuángiza, mu Ijitu.

Muvu ua kunhoha ni kizuua kia sabhalu

¹⁰ O mavu mu a dima mivu isamanu, mu bhongolole o ibundu ia kuima kuê kuoso;

¹¹ muvu ua kasambuadi-phe a zeke, a kale ngó, kana ku a dima; phala o ngadiama ku mundu ué a die; o ia xala-ku, ni xitu mu iangu ji die.

¹² Izuua isamanu i u kalakala o thonga ié ioso, kia kasambuadi-phe u ki nhoha; phala ni ngombe ié ni bulu ié i nhohe; phala ue ni monʼa kahatu kê ni nzuángiza a sunge nguzu ióbhe.

¹³ Ima ioso i nga mi tendelelʼiii, alukenu-iu; kana kutumbula nzambi jengi; o dijina diâ mu kanu dié ki di bhite-mu, mba ku ji banza ngó.

O jifesa jitatu

¹⁴ Lutatu ku muvu, mu ngi bhongolokela ku fesa.

¹⁵ Kizokola kia dianga ki mu kuata, kia jimbolo jʼòsusu; sambuadi dia izuua mu dia jimbolo jakambe felemendu, kala ki nga mi tumu, izuua i nga xindi ku mbeji ia Abibe, kuma iene o mbeji i mua katuka mu Ijitu; ki bhu kale muthu uiza-phe ni maku a hatu bhu pholo iami.

¹⁶ Ni kizokola kia idima ia dianga, kia ibundu ia kutomona, kioso ki mu mateka kudia-ku ku muanu uenu ua kudima mu díbhia; ni kizokola kia kumuna idima ki batuka o muvu, kioso ki mu zubha ku bhongoluela ku bhata o ima ioso ia tundu mu kukalakala kuenu ku mábhia.

¹⁷ Lutatu ku muvu, mala enu oso a di bheka bhu pholo iami, ngi Jihova.

¹⁸ Kana kubhaka o manhinga ma sata iami kumoxi ni jimbolo jala ni felemendu; o banha ia fesa iami ki i zeke katé kuaki.

¹⁹ O ibundu ioso i dianga kúbhia ku ibundu ienu i tunda mu mavu, mu i bheka mʼonzo ia Jihova Nzambi ienu. Mona hombo kana ku mu lambela mu lete ia mamʼâ.

Nzambi u tuma anjo iê bhu pholo iâ

²⁰ Talesa, ngi tuma anju iami ku mi diangela ku pholo ienu, phala a mi lange mu njila iii, mbé a mi bheke ku kididi ki nga mi iudikila.

²¹ Di tumienu-nê kiambote, mu ivue dízui diê; kana ku mu xibhaka, kuma kà ẋikina ku mi loloka o kubhukumuka kuenu; mukonda o dijina diami diala mua muene.

²² O ki kala-phe mu ivua muene o dízui diê anga mu bhanga ioso i nga zuela, eme-phe ngi kala ngi nguma ia jinguma jenu, ngi zoka ni ió a zoka ni enu.

²³ Mbata o anju iami i mi tuamena phala ku mi bheka kuala o Mamodi, ni Mahiti, ni Mapelezi, ni Makanana, ni Mahivi, ni Majebusi; o ene-phe ngʼà a batula-mu;

²⁴ enu-phe kana kufukamena o nzambi jâ, kana ku ji diundila mba eie ua kà fikisa o imbamba iâ ia bhanga; inda ene mua a sengulula muene, o iteka iâ mu i bula-bula.

²⁵ Enu-phe mua kà bhikila ngoho Jihova Nzambi ienu, o muene-phe anga u ta o kizediuise kiê ku mbolo ienu, ni ku menha enu; o mahaxi muʼaxaxe kenu ngi a katula-mu.

²⁶ Mʼoxi ienu ki mu kala muhatu u seluka, mba u kala mbaku; o konda ia izuua ienu ngi i tenesa muene.

²⁷ Ngi tumikisa uoma uami bhu pholo ienu, kuma uene u bhesa lusolo ifuẋi ioso i mua kà sanga; ngi bhangesa kuila o jinguma jenu ji mi bhana makunda mu ku mi lenga.

²⁸ Ngi tumikisa ue madimbuende ku pholo ienu, ende ni kukaia o Mahivi, ni Makanana, ni Mahiti, bhu pholo ienu.

²⁹ Ki ngʼa a kaie-phe bhu pholo ienu muvu umoxi ngó, phala ixi ki i biluke mukáu ua hatu ua kambe athu, o iama i mi bhanga phulu anga ienda ni ku mi vudila.

³⁰ Ngʼa kaia-phe mu kasosa-kasosa, katé enu ki mu sokoloka, anga mu lundula ixi.

³¹ Ngi ta mbambe ienu tunde mu Kalunga Kakusuka katé mu Kalunga ka akua Fidíxia, tunde mu kikangalakata katé mu honga ia Eufalate; mbata akuaʼxi ioso a tungu mumu, ngʼa a bhakula bhu maku menu, phala enu-phe muende ni ku a kaia katé kia bhua-mu.

³² Enu ki mu te-nâ kikutu kia ukamba, né ene, né o jinzambi jâ.

³³ Ka tunge dingi mʼoxi ienu, phala ka mi tese ituxi kokuami; kuma se mu bheza jinzambi jâ, mu fua muene mu múkala.