Makatukilu 22 - O Mikanda Ikola

Kitumu kia imbamba iangene

¹ Hé muthu u nhana ngombe mba mbudi, nʼa i jibha, mba u i sumbisa, ngombe u i futa ngombe jitanu, o mbudi u i futa mbudi jiuana.

² Se muii a mu kuata uala kubula inzu ia ngene, anga a mu kuama hé u fua, ki bhu kala mulonga ua manhinga kua iú ua kuamʼô, mukonda diê.

³ Maji-phe se o dikumbi dia bande kiá, ki kala kiá mulonga ua manhinga; ki bhinga-phe kiá o muii u futa ioso ia nhana, se kala ni kima kia futa na-kiu, a mu sumbisa mukonda dia uíii uê.

⁴ Se kimbamba kia nhana a mu kuata na-kiu, ki kié hanji ni muenhu uê, ki kale ngombe, mba bulu, mba mbudi, u i futa mu luiadi.

⁵ Se muthu u diuisa díbhia, mba kithádi kia mivide, mukonda uehela kibhaku kiê ni ki die mu díbhia dia mukuâ, ku idima iê muene, ni ku mivide iê muene, ioso ia beta kuuabha, kuene kua katula mu futa idima ia mukuâ ia diua.

⁶ Se túbhia tua uama, anga tu kuata mu isaku ia sakela ku díbhia, ita ia tiliku anga i bhia, mba jimbutu joso kiluua a ji muna, mba díbhia dioso di bhia, uoso ua uika túbhia u futa muene ioso iabhi.

⁷ Se muthu u bhakesa kua mukuâ, mba kitadi, mba imbamba ioso-ioso, anga a ki nhana mʼonzo ia iú ua bhake, o muii se a mu kuata u futa mu luiadi.

⁸ Se muii ka mu kuata, mukuaʼnzo iê ki kale a mu bheka ku afundixi phala kuibhula kiambote se ua kuata lukuaku luê mu imbamba iangene ia mukuá.

⁹ Se maka oso-oso a milonga ia kufika uiii, ki kale ngombe, ki kale bulu, ki kale mbudi, ki kale kizuatu, ki kale kima kioso kia jimbila, nganji anga u zuela, uixi: Kiki kimbamba kiami, ene oso kiiadi kiâ eza ni maka mâ ku afundixi; uoso-phe a mu êlesa kuala afundixi u futa mu luiadi kua mukuá.

¹⁰ Se muthu u vuisa mukuá bulu, mba ngombe, mba mbudi, mba kibhaku kioso-kioso, anga ki fua, mba a ki kuama, mba ki jimbila sé muthu ku ki mona,

¹¹ bhu kaẋi kâ bhu bhita mulôko ua Jihova, se kidi kiene muene ka kuata-ku ni lukuaku luê ku imbamba iangene ia mukuá; mukua imbamba iê-phe ki kale u ẋikina, ka tena ku mu futisa kimbamba kia jimbila.

¹² Maji se a mu nhana-kiu ki kale u futa mukuâ o kimbamba kiê.

¹³ Se-phe kia diua ku iama, a bheke o kisasu kioso kia subhuka-ku, mu umbangi; kia diua ka tena ku mu futisa-kiu.

¹⁴ Se muthu u sobha kibhaku kua mukuá o ku aia anga a ki kuama mba kia fu, o mukua kiê kala-bhu, kikale a mu futa-kiu.

¹⁵ Se mukua kiê iú bhobho, ka mu futisa-kiu dingi; se kiejile mu kunganhala, kifua ku ufunu, o kitadi kioso kia nganhala kia soko.

Kukatula ujitu ua mona kilumba, kusatela iteka, ni ima iamukuá

¹⁶ Se diiala u bhomba kilumba, kiluua a mu ta iambu, anga u zeka-nê, ki kale u mu lemba kiá, a kale muhatuʼê.

¹⁷ Maji se o phaʼiâ nguê muene ku mu bhana-ne, kiene kimoxi u bhana kitadi kala ki ene kulemba ilumba.

¹⁸ Muloji kana ku mu ehela kulaia.

¹⁹ Uoso u zeka ni kiama muthu ua ku mu jibha, sè kufula.

²⁰ Uoso u satela nzambi iengi, ki kua Jihova, kana, ió muthu ua ku mu jibha muene.

²¹ Nzuángiza kana ku mu bhanga phulu, kana ku mu bhikisa; kuma enu uenu mua kexile mu jinzuángiza mʼoxi ia Ijitu.

²² Kana kutatesa mutudi (ua muhatu) mba hukunhu. (file).

²³ O ki kala-phe u ki bhanga o ku a tatesa, anga ene a di kola kokuami, eme-phe ngʼa evua muene o kudikola kuâ;

²⁴ o ki uama o njinda iami, ngi mi jibha muene ku xibhata; ahatu enu a kà xala atudi, o anʼenu a kà xala jihukunhu.

²⁵ Se u bhana dikongo dia kitadi ku muthu ua tokala ku mundu uami, o muene uala ngadiama, ku kale u mukua kuvualesa kitadi kua mukuenu, ku kale ni ku mu futisa avasu.

²⁶ Se mukuenu ua mu tambula o kizuatu kiê mu ungunji, kikale u mu bhana-kiu kioso dikumbi kiluua di fua,

²⁷ kuma kiene o divunga diê, kiene ngó o kizuatu kia kuzuika o mukutu uê, kifua mukuenu u zeka ngoho? Kuma mu kuiza-ku, hé u dikola kokuami, ngi mu ivua; kuma eme nga lenduka, ngi mukua henda.

²⁸ Afundixi kana ku a bhubhidila; muthu a mu zangeleka kutumina o mundu kana ku mu zuela kiaiibha mba ku mu longolola.

²⁹ Kana kukokoloka mu kulumba ku idima ié ia dianga ni ku izunzu ié i u zunza mu matangi ma kukama jiúva. Anʼé a mala, a phande-kumbi, u ngi lumbila-nâ eme.

³⁰ Ni ku jingombe jé, ni ku jimbudi, kiene ki u bhanga; sambuadi dia izuua di bhanga mona ni mamʼâ, o kia kanake u ngi lumbila-nê eme.

³¹ Kala kiki, mu kala mu athu ami a zele, mua di lumbila kokuami eme; mukonda dia kiki, kana kudia xitu ia sasaka ku iama mu mukáu; kikale mu i tela jímbua.