Makatukilu 21 - O Mikanda Ikola

Kia fuama o jingana kubhanga o abhika

¹ O jiji jene o jingonge ji ua kà a tudila.

² Se u sumba mubhika ua Hebeleu, u ku bhikila mivu isamanu; maji o mu muvu ua kasambuadi-phe a tambule ufolo, u mu eha sé ku mu xinda kima.

³ Hé ua bokuene ubheka uê, a tunde ubheka uê; se ua sakanene kiá, a tunde kumoxi ni muhatuʼê.

⁴ Hé ngana iê muene ua mu bhana muhatu, iú ua mu vualela anʼa mala ni anʼa ahatu, muhatu ni ana, angene a ngana iê, muene u tunda ubheka uê.

⁵ Mubhika-phe kia kèla kuma ngana iami nga mu zolo, ni muhatuʼami, ni ana, nguami kutambula ufolo,

⁶ ngana iê-phe u mu bheka bhu pholo ia afundixi, anga u mu bhiẋidisa ku dibhitu, mba ku mikangalu ia dibhitu, ngana iê bhenhobho a mu kubule dítui ni sovela; u kala-phe kiá mubhika katé bhu ufuilu.

⁷ Hé bhu kala diiala u sumbisa monʼê ua muhatu mu kala mubhika, ió-phe ka tunde dingi kala ki tunda abhika a mala.

⁸ O ki kala ngana iê uambele ku mu lumba ukama ka mu uabhela dingi, ndandu jê a mu kule; maji katena ku mu sumbisa ku athu engi, kila kala ua mu tundu ufe.

⁹ Hé ua mu sumbuila monʼê-phe ua diiala, ki kale u mu bhanga kala kia fuama kubhanga anʼê muene a ahatu.

¹⁰ Hé uedi u sakana muhatu ua mukuá, iú-phe ni kúdia kuê, ni kuzuata, ni ifua ia tokala mu kusakana ka mu tebhunuina-iu.

¹¹ Hé u kamba ku mu bhanga ima itatu ioso iii, kikale-phe u mu eha ngoho sé kitadi.

O ijiia ia ungulungumba

¹² Se muthu u kuama mukuá katé kia fua, ió-phe muthu ua ku mu jibha ue, sé kufula.

¹³ Hé ka kexi ku mu kanena ni ku mu batamena, ka ki bhange kiluelu, Nzambi iu ua ki bhitisa bhu makuʼê, ngi ku idikiza-phe kididi kuoso ku a lengela.

¹⁴ Maji o muthu-phe se u kanena mukuâ ni kubhuma, anga u mu tela masunga, ni a mu jibhe, muthu ió né bhu kalatódio kami mu mu katula-bhu muene phala a fue ue.

¹⁵ Uoso u kuama phaiʼiâ mba manhiʼâ, a mu jibha sè kufula.

¹⁶ Uoso u nhana muthu hé u mu sumbisa, mba a mu kuata-nê bhu maku, a mu jibhe sè kufula.

Kitumu kia ió a xinga tata ni mama, mba a kuama akuâ

¹⁷ Uoso u xinga jindaka kua phaiʼâ, mba manhiʼâ, a mu jibhe sè kufula.

¹⁸ Hé athu a kala mu zoka, o iú u beta mukuâ ni ditadi, mba home, maji ka fu, hé u kala ngó mu katela bhu hama,

¹⁹ hinu kia balumuka, nʼa nhungu bhu kanga ni mbangala ié, iú-phe uoso ua mu beta ua jituka kiá mu mulonga; kikale ngó u mu futa thembu iê ia bhange bhoxi anga u mu sasa muene katé kieluka kiambote.

²⁰ Se muthu u beta mubhikʼê ua diiala mba ua muhatu, ni mbangala, mubhika nʼa fuila ku kibetu, a mu bhese kaxtiku sè kufula.

²¹ Maji-phe se o mubhika u bhanga kiá kizuua kimoxi mba iiadi ni muenhu, ngana iê ka mu bhe dingi kaxtiku; kuma ua mu sumbu mu kitadi kiê.

²² Hé bhu kala mala ala mu zoka, anga a kuama muhatu uala mu mikutu iiadi, anga ki mu bhangesa kuseluka mona, maji muene-ku ka nemana ni kima, a mu bhakesa muene mulonga, u bhana kioso kia mu xindi diiala uoso uavu muhatuʼê, u bhaka kala kia mu tetuluila adiakimi.

²³ Maji se bhu kala kalunga ni kunemana, kuabhu-phe, a bhane kiá muenhu mu muenhu,

²⁴ diesu mu diesu, dizu mu dizu, lukualu mu lukuaku, kinama mu kinama,

²⁵ kúbhia mu kúbhia, fidila mu fidila, kutua mu kutua.

²⁶ Se muthu u beta diesu dia mubhikʼê ua diiala, mba ua muhatu, diesu anga difua, ki kale u mu eha kiá ku ufuolo mukonda dia diesu die.

²⁷ Hé u sokola dizu dia mubhikʼê ua diiala mba ua muhatu, ki kale u mu eha kiá nʼaii ku ufuôlo mukonda dia dizu diê.

O ijiia ia tokala o jingana

²⁸ Se bhu kala ngombe i lua diiala mba muhatu, muthu nʼa fue, ngombe mu i bûba ni matadi, ni xitu iê kana ku i dia; maji mukua ngombe muene muanʼuê, ka kala ni kituxi.

²⁹ Maji se a mu bhele kiá umbangi, o muene-phe ka i kuika, ií ia jibha muthu mba diiala mba muhatu, ngombe mu i bûba ni matadi, ni muene mukua ngombe mu mu jibha.

³⁰ Hé a mu xinda-phe kikúlu kia ku kudikula, mu kukula-phe muenhu uê kioso kia mu xindi kiene kia bhaka.

³¹ Ngombe se ialu monʼa diiala mba monʼa muhatu, mu mu bhanga kala ki nga batulʼiki.

³² Ngombe hé ialu mubhika ua diiala mba ua muhatu, ngana iê a mu bhane makuinhi atatu a xikulu ia phalata, o ngombe mu i bûba ni matadi.

³³ Se muthu u jikula, mba u kanda dikungu, anga u kamba ku di xita, ngombe mba bulu anga i fua mu dikungu,

³⁴ muthu ua kande o dikungu diê, u futa kitadi mu kibhaku kia mukuâ, maji o kibhaku kiafu ki kale kiá kia mukua dikungu.

³⁵ Se bhu kala ngombe i lua ngombe iangene ia mukuâ, anga i fua, ki kale o ngombe ia muenhu a i sumbisa, o kitadi a uana ngó mbambe o zulu; ni ngombe iafu, a i sesa.

³⁶ O ki kala ngombe ia hôlua, a kʼijiia kuma iene kúlua kiá okulu, o muene mukua ngombe iê ka i kuika, u futa-phe ngombe mu ngombe sé kufula, o ngombe iafu i kala iê.