Makatukilu 20 - O Mikanda Ikola

O kuinhi dia Ijila

¹ Nzambi anga u zuela maka mosoʼama, uixi:

² Eme Jihova, Nzambi ié, nga ku katula mʼoxi ia Ijitu, mu dibhata dia ubhika.

³ Kana kukala ni nzambi jengi bhu pholo iami.

⁴ Kana ku di iudikila kiteka kiósonge, né kidifanganu kioso kia kima ki kala mu diulu ku thandu, mba mu ngongo bhoxi, mba mu menha kʼoxi a mavu.

⁵ Kana ku i fukamena, kana ku i bheza; kuma eme Jihova, Nzambi ié, ngʼene ngi Nzambi ia difuba; ana ngʼa a bhesa kaxtiku mu ituxi ia jitata, katé ku mululu ni ku muláula ua iá a ngi zemba,

⁶ ngi kuatela henda katé ku midi ia miji ua iâ a ngi zola anga aia ni kualuka ijiia iami.

⁷ Kana kutumbula dijina dia Jihova, Nzambi ié, mu kingoho; mukonda kua Jihova kà kamba kuêla uoso u tumbula o dijina diê mu kingoho.

⁸ Aiuka kizuua kia sabhalu, nda u ki kôlese.

⁹ Kalakala mu izuua i samanu, u zubhe kikalakalu kiê kioso.

¹⁰ Maji o kizuua kia kasambuadi-phe, kia sabhalu ia ngene ia Jihova Nzambi ié; mu kizuuʼiki kana kubhanga-mu kikalakalu kioso-kioso, né eʼmuene, mba monʼê ua diiala mba ua muhatu, né selevende ié ia diiala mba ia muhatu, né ibhaku ié, né musonhi ua ku tula mu lumbu lué;

¹¹ kuma mu izuua isamanu muene mua iudika Jihova o diulu ni ixi, ni kalunga, ni ima ioso iala-mu, anga unhoha kia kasambuadi; kia bhangesa Jihova kubenzela o kizuua kia sabhalu, iu ua ki kôlesa.

¹² Bhana ujitu kua tatʼenu ni mamʼenu, phala izuua ié i vule, mʼoxi i ku bhana Jihova, Nzambi ié.

¹³ Kana kujibha mukuenu.

¹⁴ Kana kuta phanda.

¹⁵ Kana kunhana.

¹⁶ Kana kutatela mukuenu umbangi ua makutu mu kima ka ki bhange.

¹⁷ Kana kukala ni luimbi lua inzo ia mukuenu, kana kukala ni luimbi lua muhatu a mukuenu, né mukalakadi uê ua diiala mba ua muhatu, né ngombe iê mba bulu iê, né kima kioso-kioso kiangene kia mukuenu.

O hèle ia mundu

¹⁸ Mundu uoso anga evua inuminu, a mono nzaji kutelaka, ni dízui a dʼivu dia koloneta, ni mulundu a u mono uala kuxongota dixi; mundu-phe kia mono ima iii a teketa, anga a bholoka, emanena ngó mu kanga.

¹⁹ Anga ambela Mozé, exi: U tu zuelesa eie, tu ku ivue; kana dingi Nzambi ku tu zuelesa, phala ki tu fue.

²⁰ Mozé anga u ambela mundu, uixi: Kana kukala ni uoma; kuma Nzambi ueza ku mi lola, phala uoma uê u kale bhu pholo ienu, phala ki mu te ituxi.

²¹ O mundu anga emana dikanga, Mozé ngó ua zukama ku kitombe kia xiti, bhuala Nzambi.

O ijiia ia Kalatódio

²² Jihova anga u ambela Mozé, uixi: Ambela anʼa Izalaiele, kuma: Enu mua ki mono muene kuila nga mi zuelesa tunde mu diulu mu ngala.

²³ Ki mu kale-phe ni nzambi jengi hé mu ngi bunda na-ju kumoxi; kana ku di iudikila nzambi ja phalata, mba nzambi ja ulu.

²⁴ U ngi tungila kalatódio ka mavu, anga u ngi satela ku thandu diê; o sata jê ja kuoha, ni sata ja paze, ni ja jimbudi jé, ni ja jingombe. Bhuoso bhu kididi bhu ngi bhangesa dijina diami kufumanena-bhu, ngi ku sanga bhenhobho, anga ngi ku bhana kuzediua.

²⁵ Se uambe ku ngi tungila kalatódio ka matadi, a kale matadi a ngoho; kuma se ua a bhitisa felu, ua ngi fukuila na-ku.

²⁶ Kana kubandela ku matala ku kalatódio kami, phala o tuẋi ié ki i di dʼikize kuenhoko.