Makatukilu 2 - O Mikanda Ikola

Uvuadiue ua Mozé ni kia mu sase kua Falaó

¹ Anga bhu kala monʼa diiala ku muiji ua Levi, u sakana ue ni muhatu mukua Levi.

² Muhatu anga uimita, u vuala monʼa diiala; o kia mono ua uabha, uadisanze, u mu sueka mu mbeji jitatu.

³ O kia mono ka tena dingi ku mu sueka kithangana kia vulu, u mu tungila ulungu ua dibu, u u xiia ni uasu ua betume; mona anga u mu zekesa momo, u u tula mu kaẋi ka dibhu bhu mbandu ia honga mu ngiji.

⁴ Kota diê dia muhatu anga u imana mu kanga mu tala kioso kia-nda ku mu bhita.

⁵ Monʼa Falaó ua muhatu, anga u iza ku dʼiẋika mu honga; ilumba iê anga a kala mu kuimajana ku kibumu; muene anga u mona ulungu mu kaẋi ka dibu, u tuma kahatu kê ku u takana.

⁶ Anga u u jikula, u sanga muala monʼa muthu; o mona iú dila. Henda anga i mu kuata, uixi: Mona iú, mona ku Jihebeleu.

⁷ Kota diê dia muhatu anga u ambela monʼa Falaó, uixi: Ua mesena ngiia mu ku ixanena maseka ku ahatu a Jihebeleu, mona iú nʼa ku sasela-nê?

⁸ Monʼa Falaó anga u mu ambela, uixi: Ndeie. Monʼa muhatu anga uia, uixana mama uavu monʼê.

⁹ Monʼa Falaó anga u mu ambela, uixi: Tambula mona iú, u ngi sasele-nê, ngende ni ku ku futa kioso kia tokala. Muhatu anga u tambula o mona, u kala mu ku mu sasa.

¹⁰ Mona anga u kula, anga u mu bheka kiua kua monʼa Falaó, ua di bhange monʼê, anga u mu luka dijina dia Mozé, kuma uambe, uixi: Nga mu zaúla mu menha.

Mozé u jibha mukua Ijitu, u lengela ku Midiiana

¹¹ Mu izuua muenhomo-phe, kuila Mozé ua kulu kiá, u tunda, uia bhuala jiphange jê, anga u kala mu tala ikalakalu iâ ia hadi, anga u mona mukua Ijitu uala mu beta Hebeleu, ene o jiphange ja Mozé.

¹² Suí, ku thunda ni ku luiji, ki kuala muthu, anga u jibha mukua Ijitu, u mu sueka mu kisekele,

¹³ Kizuua kia kaiadi anga u tunda dingi, u sanga mala kiiadi, Jihebeleu joso, ala kuzoka; anga u ambela ió uoso uala kubhanga kiaiibha kua mukuâ, uixi: Uala mu betela-hi mukuenu?

¹⁴ Kuala muene: Eie nanhi ua ku bhange u kilamba kietu, u mufundixi ua ku tu tambula etu konda? Ua mesena ku ngi jibha, kala ki ua jibha mukua Ijitu mazá? Mozé anga u kala ni uoma, uixi: Manhi ni kidi kiene, kia fumana kiá.

¹⁵ Falaó-phe kia zubha ku kʼivua, u sota kujibha Mozé. Mozé anga u lenga o pholo ia Falaó, uia kukala mʼoxi ia Midiiana, anga uiza u xikama bhu mbanduʼa kixima.

¹⁶ Bhenhobho nganga ia Midiiana, u kala ni sambuadi dia mona, ahatu oso; anga eza mu teka menha, ezalesa maulungu mu kunuisa ibhaku ia tatʼâ.

¹⁷ Abidi a mala anga eza, a sota ku a kala-bhu; Mozé-phe u balumuka, ua kuatekesa, u nuisa ibhaku iâ.

¹⁸ O kia zubha kutula, kua tatʼâ Leuele, uixi: Kiende kiebhi lelu mua lenguluka kuiza?

¹⁹ Ene, exi: Sai mukua Ijitu ua tu bhângela ku abidi, iú ua te-ku o ku tu tekela menha ni kunuisa ibhaku.

²⁰ Muene anga u ambela anʼê a ahatu, uixi: Muene-phe iú kuebhi? kifua diiala u bhanga kiki mu mu xienu bhobho? mu ixanienu phala adiê mbolo.

²¹ Mozé anga ki mu uabhela kutunga ni muadiakimi ió; muene anga u mu bhana monʼê ua muhatu Zipola kusakana-nê.

²² Anga u mu vualela monʼa diiala, u mu luka Ngelexone; kuma uambe, uixi: Ngi nzuángiza, mʼoxi ia athu engi.

O Kufua Kua Muenexiʼa Ijitu

²³ Mu kubhanga-phe izuua iavulu, muenexiʼa Ijitu u fua; anʼa Izalaiele anga a kema mukonda dia ubhika uavulu, a dikola, o kudikola kuâ anga ku banda kua Nzambi, mukonda dia ubhika uavulu.

²⁴ Nzambi kioso kievu o kukema kuâ, u lembalala kikutu kiê kia ta jinga ni Mbalahamu, ni Izake ni Jakobo.

²⁵ Nzambi anga u mona anʼa Izalaiele, Nzambi anga u suua o dilamba diâ.