Makatukilu 19 - O Mikanda Ikola

Nzambi u zuela ni Mozé ku mulundu ua Sinai

¹ Bhu mbeji ia katatu tunde kia tundu anʼa Izalaiele mʼoxi ia Ijitu, mu kizuua kia dianga kia mbeji ienhoio, a bhiẋila mu kikangalakata kia Sinai,

² Kia zubha kutunda bhu Lefidimi, a bhikila mu kikangalakata kia Sinai, anga a ta kibangu kiâ mu kikangalakata; Izalaiele hé u ta kibangu kiê mu mukáu ua mulundu ua lulama ni ua Sinai.

³ Mozé anga u banda kua Nzambi, Jihova anga u mu ixana mu kaẋi ka mulundu, uixi: Uambela kiki o dibhata dia Jakobo, u ambela anʼa Izalaiele, kuila:

⁴ Mua mono ioso i nga bhange kua akua Ijitu, enu nga mi ambata kala ku mabhabha a holokoko, eme nga mi bhiẋidisa kokuami.

⁵ Kiki-phe, se mu tumaka muene dízui diami, se mu kuata o kikutu kiami, mu kala mu athu ami angene, mua di tungula ku miji ioso; kuma ioso mu ngongo eme muene ia ngi tokala.

⁶ Enu-phe mu ngi kala mu utuminu ua jinganga jami, mu mundu uami uazele. Enhá ene o maka u ua kà tangela anʼa Izalaiele.

⁷ Mozé anga uiza, uixana adiakimi a kifuẋi, hé u a zuelela o maka oso enhá a mu tumu Jihova o ku a zuela.

⁸ O mundu-phe uoso anga etaiela kumoxi, exi: Ioso ia tange Jihova, iene i tua-nda kubhanga. Mozé anga u vutuila Jihova kioso kia zuela o mundu.

⁹ Jihova anga u ambela Mozé, uixi: Eme nga-nda kuiza kokué; ngi ku tulukila mu dituta dia kitombe, phala o mundu a dʼivile kioso ki ngi ku zuelesa, phala eie ue a ku xikane katé ku hádia ni hádia. Kuma Mozé ua tangela Ngana kioso kia vutula o mundu ue.

¹⁰ Jihova anga uambela Mozé, uixi: Ndeie ku mundu u a zelese, a di bonze lelu ni mungu, a sukule izuatu iâ.

¹¹ Akale plondo phala kizuua kia katatu; kuma mu kizuua kia katatu Jihova ua-ndu tuluka ku mesu a mundu uoso ku thanduʼa mulundu ua Sinai.

¹² O mundu ua kà a xindila jimbámbe ku mbandu joso, hé u a tangela, uixi: Di langienu! Ki mu bande ku mulundu, mba mu bhiẋila mu jimbambe jê, kuma uoso u tuta ngó mu mixinda ia jimbambe ja mulundu, a kà mu jibha.

¹³ Ki bhua kàla dingi lukuaku lu mu kuata, kale a mu bûba ni matadi, mba a mu asa ni mufula; a kale muthu, a kale kibhaku, ka laie dingi; ki mu ivua mbungu ia xiki lujiji, kiene kiua ki mu banda ku mulundu.

¹⁴ Kioso Mozé kia tuluka ku mulundu, iú ueza bhuala o mundu, u bonza o kifuẋi, anga a sukula o izuatu iâ.

¹⁵ Anga u ambela o kifuẋi, uixi: Mu kala polondo, (mu di iudika) kizuua kia katatu; kana ku di kasanesa ni muhatu.

¹⁶ Anga ki bhita-phe kuila, mu kizuua kia katatu ki kuandeka ngó kúkia, kua kuata kunumina ni kutelaka jinzanji ku mulundu ni dituta dia kitombe (dia bhiti-ku), ni koloneta ia xiki ni dízui dia suina kiavulu. Katé ni mundu ala mu kibangu a kala mu teketa.

¹⁷ Mozé anga u tubhula o mundu ku kanga dia kibangu, mu kutakana ni Jihova; anga emana bhoxi dia mulundu.

¹⁸ Mulundu uoso ua Sinai anga u kala mu tuka dixi, mukonda Jihova ua tulukila ku thandu diê muʼaxaxe ka túbhia, dixi diê anga di banda kala dixi dia kidijiku kionéne mulundu uoso anga u teketa, uia ni kutunguta kiavulu.

¹⁹ O dízui dia koloneta anga di-ia ni ku di bandekeza o kusuina kuê; Mozé u zuela, Nzambi anga u mu vutuila ni dízui dia lomboloka.

²⁰ Jihova kia tuluka ku mulundu ua Sinai, u tula bhu thala ia mulundu; Jihova anga u ixana Mozé kubanda bhu thala ia mulundu; Mozé anga u banda.

²¹ Jihova anga u ambela Mozé, uixi: Tuluka, u tendelele o mundu, ka bhume ni kusomboka bhu mbámbe, mbé kutalesa Jihova, phala ki bhu kale mundu ua vulu a fua muʼaxaxe kâ.

²² Ni jinganga ue, ene mu zukama kua Jihova, a di zelese, phala Jihova kʼa kuame ni kalunga ka ku a balukila.

²³ Mozé anga u ambela Jihova, uixi: O mundu ka-nda kutena kubanda ku mulundu ua Sinai; kuma eie ua tendelela kuila: Xinda mbambe ku mulundu, u u kôlese.

²⁴ Jihova anga u mu ambela, uixi: Ndé, tuluka; phala u bande dingi ni Alá; Jinganga-phe ni mundu uoso ka bhumine kusomboka o mbambe, mu kubanda kua Jihova, phala Muene ka a kuame ni kalunga.

²⁵ Bhenhobho, Mozé, u tuluka kuala o mundu anga u a tangela imʼiii.