Makatukilu 18 - O Mikanda Ikola

Ukouʼa Mozé uiza mu ku mu menekena

¹ Kiki Jétulu, nganga ia Midiiana, ukouʼa Mozé uevu ima ioso Nzambi ia bhange mu kuatekesa Mozé, ni mundu uê ua Izalaiele; kuma uevu ue kioso Jihova kia katula Izalaiele mu Ijitu.

² Jétulu, ukouʼa Mozé, anga u katula Zipola, mukaji a Mozé, kuma Mozé ua mu katuile aie ku bhata diâ,

³ ni anʼê kiiadi a mala, dikota dijina diê Ngelexone; kuma uambe, uixi, ngi nzuangiza mʼoxi ia athu engi;

⁴ ndenge dijina diê Eliiezele; kuma uambe, uixi: Nzambi ia tatʼetu ua ngi kuatekesa, ua ngi kudila ku xibhata ia Falaó.

⁵ Jétulu, ukouʼa Mozé, anga uiza kua Mozé, u mu bhekela anʼê kiiadi a mala, ni mukaji ê; u mu sanga mu kikangalakata bhua te kibangu kiâ, bhu mulundu ua Nzambi;

⁶ anga u ambela Mozé, uixi: Eme ngi ukouʼé Jétulu, ngeza ku ku kunda, nga ku bhekela mukajiʼé; ni anʼé kiiadi a mala muhetuʼé ueza-nâ.

⁷ Mozé anga u tunda mu kauidila ukouʼê, u mu diundiula, u mu bhana jibeju anga a di kunda, a dʼibhudisa kioso kia zekele, hé a bokona mu balaka.

⁸ Mozé anga u kunda ukouʼê kioso kia bhange Jihova kua Falaó ni kua akua Ijitu, mukonda dia jihenda ja kuatela Izalaiele, ni jihadi joso ja tale mu njila, ni kia a kuatekesa jinga Jihova, mu ku a kudila.

⁹ Jétulu anga u sanguluka mu kuívua o mbote ioso ia bhange Jihova kua Izalaiele, ni kia a kudila ku akua Ijitu.

¹⁰ Jétulu anga u zuela, uixi: A tane-ku Jihova ua mi kudila bhu maku a akua Ijitu, ni bhu maku a Falaó; ua kudila o kifuẋi kiki ku mualala ua akua Ijitu.

¹¹ O kiki nga kʼijiia kuma Jihova kota, jinzambi joso ndenge; mukonda enhó a di zangeleka ni ku mi tatesa, ua a katula o mahanha.

¹² Jetulu, ukouʼa Mozé, anga u kuata kibhaku kia kuoha, ni jisata ja Nzambi; Alá anga uiza, ni adiakimi oso a Izalaiele, a dia fesa ni ukouʼa Mozé, bhu pholo ia Nzambi.

Jétulu u bhana kaiula kua Mozé; Mozé u sota ibese ia ku mu kuatekesa

¹³ Anga kibhita-phe kuila, ki kuáki, Mozé u xikama mu fundisa o mundu; mundu uemana ua mu bhongolokela tunde kimene katé ngoloxi.

¹⁴ Ukouʼa Mozé-phe kia zubha ku mu mona ioso iala mu bhanga ku mundu, uixi: Ihi ienhiʼii i uala mu bhanga ku mundu? Ua xikamenaʼhi ubheka ué ni mundu uoso ku ku imanena kiki, tunde kimene katé ngoloxi?

¹⁵ Mozé anga u ambela ukouʼê, uixi: Mukonda o mundu iú eza kokuami, mu kuibhula kua Nzambi.

¹⁶ Kioso, ene kia kala ni maka, eza kokuami, eme ni ngi fundisa bhu kaẋi ka muthu ni mukuâ, hé ngʼa tangela itumu ia Nzambi.

¹⁷ Ukouʼa Mozé-phe, u mu ambela, uixi: Ki ki uabha, ki uala mu bhanga.

¹⁸ Anda ku ku bhuidisa kia vulu, ni eie muene ni mundu uene uala-nâ; kuma kimbamba kiki kiavulu phala eie ngó, ku ki tena ubheka ué.

¹⁹ Ivua-phe dízui diami, ngi ku bhane kaiula, Nzambi a ku kuatekese, eie u imanena o mundu bhu pholo ia Nzambi, maka mâ uenda ni ku a bheka kua Nzambi,

²⁰ uenda ni ku a longa o itumu ni ijiia, hé u a edikiza o njila ia tokala kuila, ni kikalakalu kia tokala kubhanga.

²¹ Sota mu mundu, oso athu a tena, ala ni kilunji, akua uoma ua Nzambi, akua kidi, ka ẋikina kúdia mangonha, u a tese ku pholo; iá a tambula konda ia jimidi, iá a tambula konda ia jihama, iá a tambula konda ia makuinhi atanu, o iá dikuinhi-dikuinhi;

²² ene-phe a kale mu fundisa o mundu iú thembu joso. O maka a makota, a ku bhekela-nâ eie; maka ofele-phe, ene a a tetulule mudiâ; mu kubhanga kienhókio, ua-nda kubhebhulula o kimbamba kié, ene ni a ku kuatekese ku ki ambata.

²³ Se eie u bhanga kienhiki, o Nzambi ue kiene kia ku tuma, eie-phe ua-nda ku laia kiengi, ni mundu uoso iú hádia ua kà bhiẋila ni kutululuka bhu kididi kiâ.

²⁴ Mozé anga u ívua dízui dia ukouʼê, u bhanga ioso kala kia mu ambela muene.

²⁵ Mozé anga u sola adiakimi akua kilunji mu axaxi ka Izalaiele ioso, u a ta ku pholo mu tambula konda ia mundu, o iá jimidi, o iá jihama, o iá makuinhi atanu, o iá dikuinhi-dikuinhi.

²⁶ Anga enhá a kala mu fundisa o mundu mu thembu joso; maka abhonzo a a bheka kua Mozé, maka ofele-phe ene a a tetulula mudiâ.

²⁷ Mozé anga u di xalesa ni ukouʼê, o muene hé uia ku bhata diê.