Makatukilu 17 - O Mikanda Ikola

Menha a tunda mu Ditadi

¹ O kionge kioso kia anʼa Izalaiele, anga a sendumuka mu kikangalakata kia Sine, enda jinjila joso ja tumu Jihova, katé kia te o kibangu bhu Lefidimi; kana-bhu-phe menha ma mundu kúnua.

² Bhenhobho o povo anga a di kuata ni Mozé, exi: Tu bhane menha, phala tu nue. Mozé anga u a ambela, uixi: Mua di kuatela-hi ni eme? Phala-hi mu bhumina Jihova?

³ O mundu-phe bhenhobho dinhota dia a kuata; mundu anga a longolola Mozé, exi: Phala-hi ua tu katula mu Ijitu; phala ku tu jibha ni dinhota, etu ni anʼetu ni ibaku ietu?

⁴ Mozé anga u dikola kua Jihova, uixi: O mundu iú ngʼa a bhanga kiebhi? Kua a xala kia ngó ku ngi bûba ni matadi.

⁵ Jihova anga u ambela Mozé, uixi: Bhita bhu pholo ia mundu, ni adiakimi amukuá a Izalaiele, u ila-nâ kumoxi; ni mbangala ié u i kuata, ioso i ua betele na-iu o honga ia menha nda uie.

⁶ Eme-ze ngi ku tuamenena kuenhoko, nga kèmana bhu ditadi bhu Holebe; eie-phe ua kà beta ditadi, mua kà fuafua menha, phala o mundu uoso a nue. Mozé anga u ki bhanga ku mesu a adiakimi a Izalaiele.

⁷ Kididi kienhokio anga u ki luka uixi: Masahe, a ki luka ue Medibah, mukonda dia mvunda ia anʼa Izalaiele, mukonda ue a bhumina Jihova, exi: O ki tualʼiki, tuila Jihova tuala-nê, inga kana?

Amaleke úlua ita ni Izalaiele

⁸ Amaleke anga u vubuka bhenhobho, u lua ita ni Izalaiele bhu Lefidimi.

⁹ Mozé anga u ambela Josuué, uixi: Sola makuenze, nda uie u lue ni Amaleke; eme mungu ngʼimana bhu thala ia kalundu, ni mbangala ia Nzambi ngi i kuata bhu maku.

¹⁰ Josuué anga u bhanga kala kia mu tumu Mozé, u lua ni Amaleke; ni Mozé-phe ni Alá, ni Hule, anga a banda bhu thala ia kalundu.

¹¹ Anga kiia ni kubhita kuila, kioso Mozé kia leka o lukuaku, Izalaiele ala kota ku nguzu; o kia lu tulula o Amaleke muene u kala kota.

¹² Mozé-phe maku a mu suku; anga a katula ditadi, a mu tela-diu bhu kididi, muene hé u xikama-ku; ni Alá-phe ni Hule a mu fikidila maku, iú ku mbandu imoxi, iú ku mbandu ia mukuá; makuʼê anga a kolokota ni ku a leka katé kia tula o dikumbi.

¹³ Josuué anga u buidisa Amaleke ni mundu uê ku mazu a xibhata.

¹⁴ Jihova anga u ambela Mozé, uixi: Kiki soneka-kiu, ki kale musêndu mu divulu, u ki jimbuile ue mu mátui ma Josuué; kuma Amaleke ngi mu jimisa o mbutu, bhoxi a diulu u bhua-bhu.

¹⁵ Mozé anga u tunga-bhu o kalatódio, u ka luka dijina dia Jihova-nisi

¹⁶ anga u amba, uixi: Mukonda Jihova ua loka, Jihova u kala ni mvunda ni Amaleke ku tunda muiji kuiza muiji.