Makatukilu 16 - O Mikanda Ikola

Nzambi u bhana maná

¹ Anga a kuata dingi njila iâ, kutunda bhu Elimi, kionge kioso kia anʼa Izalaiele anga eza mu kikangalakata kia Sine, bhu kaẋi ka Elimi ni Sinai, kizuua kia katanu ku dikuinhi, mbeje ia kaiadi tunde bhu kukatuka kuâ mʼoxi ia Ijitu.

² O kionge kioso kia anʼa Izalaiele anga a kuata kulongolola Mozé ni Alá mu kikangalakatʼomo.

³ Anʼa Izalaiele anga a zuela kua ene, exi: Tamano tua fuile ku lukuaku lua Jihova, mʼoxi ia Ijitu, kioso ki tua kexile mu xikama bhu mbanduʼa jímbia ja xitu, anga tu dia o mbolo, hé tu i lémbua; enu-phe mua tu katula, enu mua tu bheka mu kikangalakatʼumu, phala kujibha o mundu uosʼú ni nzala.

⁴ Jihova bhenhobho anga u ambela Mozé, uixi: Talesa-ze, ngi mi nokesa mbolo i tunda mu diulu; mundu a kale mu tunda izuua ioso mu i nona bhoxi, a fikise ioso ia soko ku i dia kizuua kimoxi, ngʼa lole mba a ẋikina kuendela mu ngonge iami, mba kana.

⁵ Kutula-phe mu kizuua kia kasamanu, a none ioso i soka kudia mu izuua iiadi, ioso iene mu nona izuua iamukuá i kale mu luiadi.

⁶ Mozé ni Alá anga ambela anʼa Izalaiele, exi: Lelu mu ngoloxi mua-nda ku kʼijiia kuila Jihova muene ua mi katula mʼoxi ia Ijitu;

⁷ o mungu ki kúkia mu kimene, mua-ndu mona o unene ua Jihova; mukonda muene ua mʼivu o kulongolola kuenu; Jihova mua mu longolola, etu tu akua-hi kuila mu tu longolola etu?

⁸ Mozé anga u kumbulula dingi, uixi: Mu ki mona, Jihova kianda ku mi bhana kúdia xitu mu ngoloxi, ki kukia anga mu dia mbolo katé muekuta; mukonda Jihova ua mʼivu o kuzuela kuenu, ku mua mu longolola na-ku muene. Mbata etu, etu akua-hi? Ki etu mua tu longolola, kuma mua longolola Jihova.

⁹ Mozé anga u ambela Alá, uixi: Ambela kionge kioso kia anʼa Izalaiele, a zukame bhu pholo ia Jihova; mukonda ua mʼivu o kulongolola kuenu.

¹⁰ Anga ki bhita-phe kuila, kioso Alá kiala kuzuela ni kionge kioso kia anʼa Izalaiele, ene oso kiedi sui ku mbandu ia kikangalakata a mona kubenha kua Jihova kua monekena mu dituta.

Mundu a a bhana xitu

¹¹ Jihova anga u zuela kua Mozé, uixi:

¹² Ngʼevu o kulongolola kua anʼa Izalaiele; a ambele-phe, kuila: Lelu mu ngoloxi iii, kumbi ki di koloka, mu dia xitu, o ki kúkia mu dia mbolo, mu ikuta; phala enu mu kʼijiie kuma eme Jihova, Nzambi ienu.

¹³ Kutula-phe mu kumbi dia ngoloxi kueza tungumbe, kilômbo kioso kiezala; o ki kuaki mu kimene, dimume dia tula mu jimbandu joso ja kilômbo.

¹⁴ O kia tuka dimume, ku mavu oso a kikangala-kata kua di kuu tumbundu tuofele, tuedi kala tumbuelekese tua matadi mvula, mukuâ ni kiene kuiza mukulakaji ku mbambi iavulu.

¹⁵ Anʼa Izalaiele kia zubha ku ki mona, a dibhula mudiâ exi: O kiki kima kia-hi? kuma ka kʼijiia, kiluua a ki mona. Mozé anga u a ambela, uixi: O iii iene o mbolo, ia mi bhana Jihova phala ku i dia.

¹⁶ Jihova ua mi tumu kiki: Nonenu-ku, kala muthu kioso kia mu soko mu kudia kuê; kifua kala muthu nganza, kala kia soko athu uala-nâ mʼonzo; muthu ni muthu nganza, oso kiá a mu kala mu balaka iê.

¹⁷ Anʼa Izalaiele anga a ki bhanga; amoxi a nona kiavulu, o amukuá a nona kia tolo.

¹⁸ O ki eza-phe ku i zonga mu nganza-nganza, ua nona kiavulu ki kua mu subhuka kima, o ua nona kia tolo ki kua mu kambe ue kima; kala muthu ua sokesa ni athu a mu kala bhu jiku diê, a tokala o kudia.

¹⁹ Mozé anga u a ambela, uixi: Ibhue lelu ni ku i dia, kana muthu u zekesa-ku phala mungu.

²⁰ Maji-phe sai iá ka ẋikina kuívua Mozé, a zekesa-ku katé kuaki, a sanga muala maminhu, iii nuha kibuzu. Mozé anga u a temena.

²¹ Izuua ioso anga a i nona kimene ni kimene, kala muthu kia mu soko mu kudia kuê; mukonda kiatua jinga o muanha-phe i sangumuka.

²² Kutula kizuua kia kasamanu-phe, a nona kúdia kua luiadi, kifua nganza jiiadi kala muthu; o makota oso a kionge anga eza a ki tangela Mozé.

²³ Muene anga u a ambela, uixi: Kiene muene kia zuela Jihova; uixi: Mungu kizuua kiangene kia kunhoha, sabhalu ikola ia Jihova; kangenu ioso i mua mesena kukanga, lambenu ue ioso i mua mesena kulamba; o futa ioso i mu xia-ku, bhakenu-iu, phala enu mungu ki kúkia.

²⁴ Anga a i bhaka kizuua kienhókio katé kuáki, kala kia tange Mozé; maji ki ia bolo, ki iala ue maminhu.

²⁵ Bhenhobho Mozé, uixi: Iene i mu dia lelu; kuma lelu sabhalu ia ngene ia Jihova; lelu bhoxi ki mua-nda ku i sanga-bhu.

²⁶ Mu i mona mu izuua isamanu; kia kasambuadi-phe kia sabhalu, mu kizuuʼiki ki i kala-ku.

²⁷ Kutula-phe kizuua kia kasambuadi bhu kala athu amoxi-mu a tunda mu kunona, maji a lémbua; ka i sange-ku.

²⁸ Jihova anga u ambela Mozé, uixi: Katé bhebhi bhu mu suka ni kuxibhaka o itumu iami ni ijiia?

²⁹ Talenu kuma Jihova ua mi bhana o sabhalu, kiene kia mi bhela kizuua kia kasamanu kúdia kua izuua iiadi; Xalenu kala muthu bhu kididi kiê, kana muthu utunda bhu kididi kiê kizuua kia kasambuadi.

³⁰ Kala kiki, mundu a kala mu nhoha kizuua kia kasambuadi.

³¹ Dibhata dia Izalaiele-phe anga exana kudiʼuku, exi, Maná; i di fuangana ku jimbutu ja jikuendulu, izela; o mu kanu u ívua ila kala jimbolo ja uiki.

³² Mozé anga u amba, uixi: Kiene kia tumu Jihova ʼiki: Mu kuata nganza imoxi ia maná, mu i bhake katé ku miji ni miji, phala a mone kúdia ku nga mi dikila na-ku mu kikangalakatʼumu, kioso ki nga mi katula mʼoxi ia Ijitu.

³³ Mozé anga u ambela Alá, uixi: Kuata ímbia ia mavu, u te-mu nganza imoxi ia maná, u i bhake bhu pholo ia Jihova, ia kulunda ku miji ioso katé ku hádia ni hádia.

³⁴ Kala Jihova kia tumu kua Mozé, kiene ue Alá kia i bhake bhu pholo ia Umbangi, iú ua i lundu.

³⁵ Anʼa Izalaiele anga a dia maná mu makuinhi auana a muvu, katé kia bhiẋila ku ixi ia tungu athu; iá a dia jinga o maná katé kieza mu jimbámbe ja ixi ia Kanana.

³⁶ Nganza ji kala dikuinhi mu tenesa midila ia efah.