Makatukilu 15 - O Mikanda Ikola

Mukumbi ua Mozé

¹ Kizuuʼokio Mozé ni anʼa Izalaiele emba muimbu iú, mu kuximana Jihova, exi: Ngʼimbila Jihova, kuma Muene ua di jingisa kinéne; ni kabalu ni iú ua sambela-ku ua a texe mu menha.

² Jihova muene nguzu iami, mukumbi uami, kua muene kua ngʼijila kubhuluka. Iú Muene Nzambi iami, ngi mu ximana jinga; muene Nzambi ia tatʼetu, eme ngi mu zangeleka.

³ Jihova kindanda kia ita; jina diê Jihova muene.

⁴ O makalu a Falaó ni kilômbo kiê ua a texe mu menha; o ilolo iê, ia tungula, a boba mu Kalunga Kakusuka.

⁵ Mabhuku ma a bhiti ku thandu; a boba muʼ alunga ka zongo mukuâ ni ditadi.

⁶ Lukuaku lué lua kúdia, eie u Jihova, luala ni nguzu ia fuma; lukuaku lué lua kúdia, u Jihova, lua muanganesa o nguma, muangatatá.

⁷ Mu kuzangalala kué kuavulu, ua a tolola oso ambe ku ku kitukila; ki ua a tumikisa o njinda ié, ene abhi kala maxinde a kitumba.

⁸ Mu kubhusa kua mazulu mé, menha ma di lumala, jihungulule jemana muene kala kixitu; mabhuku exi muene ngé muʼaxaxi ka muzanza.

⁹ Kuala o nguma: Ngi kaia, ngi kuata, tu uane o mbole; nga kà a bhanga kia ngi kala ku muxima katé kia kumu; xibhata iami ngi i tomona, o lukuaku luami lua kà a buikisa.

¹⁰ Ua bhusu ni kitembu kié, kalunga ka a bhiti ku thandu; a njoboka kala xumbu mu mabhuku a makota.

¹¹ Ku jinzambi nanhi muene u soka ni eie u Jihova? Mukuenu nanhi u kôla kiki mu kuzela ni kuiuka, kilamba ki kuata uoma, mukua kubhanga madiuanu?

¹² Ki uedi u sunununa lukuaku lué lua kúdia, mavu a bhane mu kanu, iá a a minha.

¹³ Mu kiadi kié uendesa o mundu iú, u ua kula eie-muene (ua di bhange u kilamba kiâ); mu nguzu ié ua ambata Katé bhu kibúta kié kikôla kia kuzela ni kuiuka.

¹⁴ O ifuẋi iamukuâ a kʼivu, a teketa; a tunga mu Fidíxia mika ia a kuata.

¹⁵ Mavunda a Idomo a diuana; mazonda a Mouabhe kua exa kìmbulambula; akuaʼaxi ia Kanana a botomoka.

¹⁶ Kua a tulukila kekenha ni kikote; o nguzu ia lukuaku lué ia a bhuuika, a xikama ni ene hudií kala ditadi; katé kia zaúka o mundu ué, u Jihova, katé kia zaúka, o mundu ué u ua sumba.

¹⁷ Eie hinu u a bokuesa, u a phapha, ku mulundu ué ua undundu. U a bhaka bhu kididi ki ua solo, u Jihova, mu kala kibúta kié, bhu dibezelu dié, Ngana, dia tunga o maku mé.

¹⁸ Jihova ua hingila-ku; o ungana ué u nangenena.

¹⁹ Kuma o jikabalu ja Falaó, ni makalu mê, ni jikavalelu jê, a a bobesa; anʼa Izalaiele-phe ni muʼaxaxi ka kalunga endela bhoxi dia kukuta.

Midiiana ni ahatu emba ni kukina

²⁰ Bhenhobho o Midiiana, polofeta, phange ia Alá ia muhatu, u kuata kangoma ka manzuela, u tuamena, ahatu oso a mu kaiela ni tungoma tuâ ni kukina.

²¹ Midiiana anga u tambuijila, uixi: Imbidienu Jihova o kikóue kia undanda; kuma ni kabalu ni iú ua sambela-ku, ua a texi mu menha.

Menha alulu a biluka a fema

²² Mozé anga u tuma Izalaiele kuia dingi ku pholo, a tundu bhu Kalunga Kakusuka, anga a bokona mu kikangalakata kia Sule; edi enda izuua itatu mu kikangalakata, menha ka moneka.

²³ Anga a tula bhu Mahala, o menha a Mahala-phe a lémbua ku a nua, mukonda alulu; kiene kia lukila-bhu exi bhu Mahala

²⁴ O mundu anga a kuata ku longolola Mozé, exi: Tua-nda kunua-hi?

²⁵ Muene anga u dikola kua Jihova; Jihova anga u mu idikiza muẋi, o kia u te mu menha, menha mê ala kiá a fema. Bhenhobho bhene bhua a bhela o jingonge ni kijila; anga bhenhobho u a lola hanji.

²⁶ Hé u a ambela, uixi: Se u ívua kiambote o dízui dia Jihova, Nzambi ié, hé u bhanga kioso kia mu iukila ku mesu mê, ni u bhana o dítui ku itumu ié, hé u aiuka o ijiia iê iene ioso, ki ngi te dingi mahaxi ku thandu dié, né uhaxi umoxi ku mahaxi oso u nga te ku thandu dia akua Ijitu; kuma eme ngi Jihova, eme-muene ngi ku saka.

²⁷ Anga eza, a tula bhu Elimi, bhuala kuinhi dia fixi ni kiiadi ja menha, ni makuinhi sambuadi a máie; anga a ta kibangu bhenhobho bhu mbanduʼa menha.