Makatukilu 14 - O Mikanda Ikola

Mu kikangalakata Nzambi u tanga o kubuika kua Falaó ni kilômbo kiê

¹ Jihova anga u ambela Mozé, uixi:

² Tangela anʼa Izalaiele phala a te honda, a te o kibangu kiâ bhu mbandu ia Pihahilote, bhu kaẋi ka Mingidole ni kalunga, bhua lulama ni bhu Baale-Zefone; bhu sámbua diê bhene bhu mu ta o kibangu, bhu mbandu muene ia kalunga.

³ Falaó-phe mu kutala anʼa Izalaiele, ua-nda kuila, uixi: A sukamena, a batukila mu kingalakata, kuma o kikangalakata kia a kondoloka.

⁴ Eme-phe ngi kolesa o muxima ua Falaó, o muene ua-nda ku a kaiela, eme bhenhobho nda ngi fumane ku thandu dia Falaó, ni ku thandu dia kilombo kiê kioso, akua Ijitu phala à kʼejiie kuma eme Jihova, O ana a Izalaiele anga a bhanga kienhókio.

Falaó ni kilombo kiê a kaiela anʼa Izalaiele

⁵ O kia ki tangela Falaó kuila o mundu ia lenga, muxima ua Falaó ni ua akua mbêle iê anga u aluluka, exi: Tua bhange kiebhi, tueha Izalaiele kuiê, ua kexi mu ku tu bhikila?

⁶ Falaó bhenhobho ua iudika o dikalu diê dia ita, hé uambata ni mundu uê;

⁷ anga u katula hama jisamanu ja makalu amukuâ, a tungula muene ni makalu oso a Ijitu, ni ilolo iê ia ita a di longo-mo.

⁸ Kuma Jihova ua kolesa o muxima ua Falaó, muenexiʼa Ijitu, anga u kaiela anʼa Izalaiele, mukonda muene ua fika kuma anʼa Izalaiele a mu baluka; manhi sai lukuaku lua nguzu lua a katula.

⁹ Akua Ijitu anga a kaiela kuoso kuala ene, ni jikabalu ni makalu a Falaó, ni akua kusambela o jikabalu, ni kilombo kioso, anga a a kuatela bhua te o kibangu kiâ bhu mbandu ia Pi-hahilote, bhua lulama ni bhu Baale-Zefone.

O uoma ua anʼa Izalaiele ni kioso Nzambi kia kondeka o mundu uê

¹⁰ Kia zukama Falaó, anʼa Izalaiele a zambula mesu, a mona Ijitu ioso ia solomoka mu ku a kaiela; anga a bhuuama ni uoma, a dikola kua Jihova.

¹¹ Anga ambela Mozé, exi; Kifua mu Ijitu mua kambele jimbila, eiʼeie ua tu katula-mu phala ku tu jibhila kunu mu kikangalakata? Ua tu bhangela-hi kiki, ua tu katula ngó mu Ijitu?

¹² Ki kiene ki tua ku ambela mu Ijitu, tuixi: Tu ambule, tu kale kubhikila akua Ijitu? Kifua ki kota kubhikila akua Ijitu, ki soka ni kufuila mumu mu kikangalakata?

¹³ Mozé anga u ambela o mundu, uixi: Ki mu kale ni uoma; ximbakatenu nda mu mone o ubhuluilu ua Jihova, ua-nda ku mi bhanga lelu; kuma o akua Ijitu mua-lu mona lelu, ku pholo ku tuia nuka dingi mua kà a mona.

¹⁴ Jihova muene ua-nda ku mi bhangela, enu di xibhienu ngó.

¹⁵ Jihova anga u ambela Mozé, uixi: Uala ku ngi kolelaʼhi eme? Ambela anʼa Izalaiele ende ni kuenda;

¹⁶ eie-phe, zenga o mbangala ié, u sununune o lukuaku lué ku thandu dia kalunga, u ka uanunune mu kaẋi o anʼa Izalaiele a bhite muene mu kaẋi ka kalunga, bhoxi dia kukuta.

¹⁷ Eme-ze ngi kolesa o miẋima ia akua Ijitu, phala ene uâ a kutuke-mu mu ku a kaiela; bhenhobho ngi tambula fuma ku thandu dia Falaó, ni ku kilômbo kiê kioso, ni makalu ê a ita, ni kavalelu jê.

¹⁸ O akua Ijitu à kʼijiia kuma eme Jihova, kioso ki nga-ndu tambula o fuma ku thandu dia Falaó, ni ku makalu ê, ni ku jikavalelu jê.

¹⁹ O Anjo ia Jihova ia tuanemena o kilômbo kia Izalaiele, anga i tunda ku pholo iâ iza hé i a kalela ku dima; ni philadi ia dituta i tunda ku pholo ku ia kexile, ieza, iemana ku dima diâ.

²⁰ Kifua a batula bhu kaẋi ka kilômbo kia Ijitu ni kilômbo kia Izalaiele; o dituta diene dimoxi, ku mbandu ia akua Ijitu dia bheka kitombe kiedi bui, o ku mbandu ia Izalaiele mukengeji uia ni ku a muikina; kala kiki, usuku uosʼó a di kalela, ka tena ku di zukama.

Anʼa Izalaiele a zaúka Kalunga ka kusuka

²¹ Mozé anga u sunununa o lukuaku luê ku thandu dia kalunga; Jihova anga u vutula o menha a kalunga ni kitembu kia mutundila-kumbi kia bhuka usuku uosʼô, ki kia bhangesa kuila bhu kaẋi bhua kukuta, menha a di uanununa mbandu ni mbandu.

²² O anʼa Izalaiele anga a kutuka mu kaẋi ka kalunga, mua kukuta; o menha emana kala phalelu, ku mbandu ia kúdia, ni ku mbandu ia kiasu.

²³ O akua Ijitu a kexi mu ku a kaiela, anga a kutuka uâ mu kaẋi ka kalunga, ni jikamelo ja Falaó, ni makalu, ni kavalelu jê.

²⁴ Kutula-phe ku makolombolo, Jihova mu philadi ia túbhia ni dituta kia tale o kilômbo kia akua Ijitu, u kala mu ku a tatesa.

²⁵ Anga u mbonjomona o malola ku makalu mâ, katé aia ni ku a kukila bhoxi, akua Ijitu anga a zuela, exi: Tu lengienu o pholo ia Izalaiele; kuma Jihova uala ku a bhangela, iú u a mu bhondeleka akua Ijitu.

Akua Ijitu a fua mu menha

²⁶ Jihova anga u ambela Mozé, uixi: Sunununa dingi lukuaku lué ku thandu dia kalunga, phala menha ma vutuke mu bobesa akua Ijitu, ni makaluʼâ, ni kavalelu jâ.

²⁷ Bhenhobho Mozé anga u sunununa lukuaku luê ku thandu dia kalunga, kalunga anga ka vutuka ni nguzu bhu kididi kiê, kuila kuma ku kúkia; akua Ijitu anga a sota kulenga, maji Jihova ua bobesa akua Ijitu mu kaẋi ka kalunga.

²⁸ Kuma menha ma vutuka, makalu ma boba, ni asambedi a jikabalu, ni kilômbo kioso kia Falaó, ene oso a kaiela ni kukutuka mu kaẋi ka kalunga; né muthu ngó ka subhuka-ku.

²⁹ Maji o anʼa Izalaiele-phe muene mua bhitiʼâ, endela bhoxi dia kukuta mu kaẋi ka kalunga, menha ma di bhange phalelu, ku mbandu ia kúdia, ni ku mbandu ia kiasu.

³⁰ Kienhiki Jihova kia bhulula Izalaiele mu kizuua kienhókio bhu maku a akua Ijitu; Izalaiele anga a mona ngó o imbi ia akua Ijitu ia takuka bhu ndúndu ia kalunga.

³¹ Izalaiele anga a mona o kidiuanu kia kalakala Jihova mu kubuidisa akua Ijitu; mundu anga a kala ni uoma ua Jihova; anga a xikana Jihova, ni selevende iê Mozé.