Makatukilu 11 - O Mikanda Ikola

Nzambi uijidisa Mozé o dibhebhu dia xala-ku

¹ Jihova anga u ambela Mozé, uixi: Kua xala hanji dibhebhu dimoxi ngó di ngi bheka ku thandu dia Falaó, ni ku thandu dia Ijitu; ki di zubha kubhita, kiene kiua ki a mi eha; o kia-nda ku mi eha, o uehelu uê ua ku mi kaia ni mu tunde lusolo bhabha.

² Ambela-phe o mundu uoso evue, kuila a bhinge ku akuaʼxi a tungu-nâ, kala diiala a bhinge ku diiala ni mukuâ, kala muhatu a bhinge ku muhatu ni mukuâ, makembu a phalata ni makembu a ulu.

³ Jihova anga u bhana o mundu uê ngalasa ku mesu a akua Ijitu. Ni Mozé ua di bhange kilamba kia dikota mʼoxi ia Ijitu, a mu xila ni ku mesu a akua mbèle ia Falaó, ni ku mesu a mundu uoso kiá.

⁴ Mozé anga u zuela, uixi: Jihova uambe kiki: Usuku ua lelu, mu kaẋi ka kizuua, ngi bhita muʼaxaxi ka ixi ia Ijitu;

⁵ anʼoso a phande-kumbi mʼoxi ia Ijitu afua, tunde ku phande-kumbi ia Falaó a xikama-nê bhu kiandu, katé ku phande-kumbi ia kahatu kaia ku dima dia ditadi dia kuhuhila; ni anʼa ibhaku oso ue a phande-kumbi.

⁶ Kua kà bhita ngololo ia dikota mʼoxi ioso ia Ijitu, ngololo nuka aʼivile, nuka ue ià kala-ku dingi.

⁷ Ku ana Izalaiele-phe, né ímbua ngó ki ia kà tena kuzambesa dimi diê mu ku buzila muthu mba kibhaku; phala mu kʼijiie kuila Jihova ua tungula akua Ijitu ni akua Izalaiele.

⁸ Kienhókio, ene osoʼá akua mbèle ié, a kèza ku ngi sota, ni ku ngi diundila ni kudionda, kuila: Ndeie, ni mundu uoso ua ku kaiela, mʼoxi mu bhue-mu; kiene kiua ki nga kà tunda. Anga u tunda bhu pholo ia Falaó, uezala ni njinda.

⁹ Bhenhobho Jihova anga u ambela Mozé, uixi: Falaó ka-nda ku mʼivua phala o isuma iami i di sokolole mʼoxi ia Ijitu.

¹⁰ Ni Mozé ni Alá ene a bhange o isuma ioso iii bhu pholo ia Falaó; Jihova-phe ua kolesa o muxima ua Falaó, o kueha anʼa Izalaiele kutunda mʼoxi iê, ka ẋikina ku ki bhanga.