Makatukilu 10 - O Mikanda Ikola

Nzambi u kusa Falaó, uixi kú kuiza kihoho

¹ O kia bhiti imʼiii Jihova anga u ambela Mozé, uixi: Bokona kua Falaó; kuma eme nga mu kolesa o muxima, ni muene di akua mbèle iê, phala ngʼidikize isuma iami iii muʼaxaxe kâ.

² Eie muene hinu u ki tangela ue anʼé ni alaulʼé, ima ioso i nga kalakala mu Ijitu, ni ijimbuete iami i nga mu bhanga muʼaxaxe kâ phala mu kʼijiie kuma eme ngi Jihova.

³ Mozé ni Alá anga aia a bokona kua Falaó, a mu ambela, exi: O Jihova, Nzambi ia Jihebeleu uambe kiki: Eie u dituna katé bhebhi kutoloka bhu pholo iami? Eha o mundu uami, phala aie a ngi bhikile.

⁴ O ki uila ngué kueha o mundu uami, nʼaiʼâ, mungu muene ngi bheka kihoho mu jimbámbe jé.

⁵ Bhuoso bhu ki tula bhu izala, o mavu ku a mono dingi; ki ende ni kudia o ima ioso iauisu ia xala, ioso ia subhuka ku mvula ia matadi, ni miẋi ioso i sabhuka ku mikáu.

⁶ Ni mu jinzu jé mu izala, ni mu jinzu joso ja akua mbèle ié, ni mu jinzu ja akua Ijitu oso; ki bhinga ni jitata jenu ni jikuku nuka a ki muene ki kala kiki, tundé kizuua kia bhanga athu mu ngongo, katé kizuua kia lelu. Anga u lunguluka, u tunda bhu pholo ia Falaó.

⁷ Akua mbèle ia Falaó a mu ambela, exi: Mbambe bhebhi bhu suka muthu muenʼíú ni ku tu tatesa? A ehe, mala enhá, aie, a bhikile Jihova Nzambi iâ; kífua kua kʼijiia luua kuma Ijitu a mu sengulula?

⁸ Mozé ni Alá anga a a bheka dingi kua Falaó; Muene anga u ambela, uixi: Ndenu, mua kà bhikile Jihova, Nzambi ienu; maji akua-hi a-nda kuia-ku?

⁹ Kuala Mozé: Ki bhinga etuʼoso tuia, ni anʼa ndenge ni adiakimi, ni anʼetu a mala ni anʼetu a ahatu, ni mbudi jetu ni ngombe jetu, kuma tua-nda kua kà bhange kizokola kua Jihova, Nzambi ietu.

¹⁰ Kuala Falaó: Jihova a mi endese, se nga mi eha ni anʼenu. Di langienu-phe, mbata nga mi mono kuila enʼuenu muandala mu bhanga kudimuka.

¹¹ Ki kiene-phe, nguami! Se muʼandala muia ngó enu mu mala, mua kà bhikile Jihova; kuma kiene ki muambe. Anga a a kaia bhu pholo ia Falaó.

Dibhebhu dia kihoho

¹² Jihova anga u ambela Mozé, uixi: Sunununa lukuaku lué ku thandu dia ixi ia Ijitu, phala kihoho kize mʼoxi ia Ijitu, ki die iangu ioso iala-mu, ioso ia subhuka ku matadi a mvula.

¹³ Mozé anga u zenga o mbangala iê ku thandu dia ixi ia Ijitu, Jihova anga u bheka kitembu kia mutundila-kumbi mʼoxiʼomo, ni kizuua kiosuʼokio ni usuku uê; o ki kuáki kitembu kia mubandela-kumbi kieza ni kihoho.

¹⁴ Kihoho anga ki bhita mʼoxi ioso ia Ijitu, ki tula katé mu jimbámbe jê joso; kia vudila-ku kinéne kuma mʼokulu nuka kuejile kihoho kala kiki, o ku hádia ue nuka kia kèza-ku dingi.

¹⁵ Kuma kiezalesa ixi ioso, mavu oso a kusuka ni ene nguí ni kihoho, anga ki dia o iangu ioso ku mavu, ni ibundu ioso ku miẋi, ni ioso kiá ia subhuka ku matadi a mvula; katé ku miẋi ioso ni ku idima, ni kiangu ngó ki ki xala-ku mʼoxi ioso ia Ijitu, tundé ku mbámbe katé ku mbámbe ia mukuá.

¹⁶ Bhenhobho Falaó u tuma kuixana Mozé ni Alá ni lusolo; u a ambela, uixi: Nga te kituxi, ni kua Jihova, Nzambi ienu, ni kókuenu enu.

¹⁷ Maji-phe ngi lolokienu kituxi kiami, lumoxi ngó luenhulu, mu ngi diondele kua Jihova, Nzambi ienu, phala a ngi katule ngó kalunga kosoʼaka.

¹⁸ Muene anga u tunda kua Falaó, u dionda Jihova.

¹⁹ Jihova anga u lungulula o kitembu, hé ku bhuka kitembu kia nguzu kia mubolokela-kumbi kizangula o kihoho, anga ki ki takula mu Kalunga Kakusuka; ni dihoho ngó dimoxi ki dia xala mʼoxi ioso ia Ijitu.

²⁰ Maji o Jihova-phe ua kolesa muxima ua Falaó, o kueha anʼa Izalaiele, ka ki bhange.

Dibhebhu dia kitombe

²¹ Jihova anga u ambela Mozé, uixi: Sunununa lukuaku lué, u lu talese mu diulu, phala kuize kitombe mʼoxi ioso ia Ijitu, kitombe kia kuila ni ku maku u ki babata.

²² Mozé anga u sunununa o lukuaku luê, u lu talesa mu diulu, anga ku kala kitombe kiaxiti mʼoxi ioso ia Ijitu, mu izuua itatu;

²³ o mu izuua itatu ioso ia muvimba, ene oso kala ku di mona dingi muthu ni mukuá, kana muthu ue ua balumuka bhu kididi bhu kia mu kuatela izuua ioso itatu; o anʼa Izalaiele-phe ene oso ku mabhata mâ kua zedié.

²⁴ Falaó bhenhobho anga u ixana Mozé, uixi: Ndenu, mua kà bhikile Jihova; ku xale ngoho o jimbudi jenu, ni anʼenu ndenu-nâ.

²⁵ Mozé-phe, uixi: Ni eie muene ue u bhana bhu maku etu jisata ni maujitu ma kuoha, ioso i tua kà satela Jihova, Nzambi ietu.

²⁶ Ni ibhaku ietu tuia naiu, ni kikoto ngoho ki ki xala-ku; mukonda kuene ku tua-nda kua ka katula ia kusatela na-iu Jihova, Nzambi ietu; o kuijiia-phe ioso i tu katula, ki kale ngó ki tua kà bhiẋila kuenhoko.

²⁷ Maji-phe Jihova ua kolesʼê o muxima ua Falaó, ka ẋikina ku a eha.

²⁸ Falaó anga u mu ambela, uixi: Tunda bhabha, u ngi bhue ku mesu; aluka-ze, kizuua kioso ki u ngi mona dingi o pholo, ki kala kizuua kié kia kúfua.

²⁹ Kuala Mozé: Ua zuela kiambote; pholo ié ki nga-nda tona dingi ku i mona.