Makatukilu 1 - O Mikanda Ikola

Ubhika ua Izalaiele mu Ijitu

¹ Enʼiá ene o majina ma ana Izalaiele a bokona mu Ijitu ni Jakobo, kala muthu ni dibhata diê:

² Lubene, Ximinhá, Levi, ni Juda,

³ Isakale, Nzebulone, ni Bejamí,

⁴ Dane ni Nafitali, Ngade ni Asele.

⁵ Mienhu ioso ia tunda mu mukutu ua Jakobo, makuinhi sambuadi a mienhu; Zuze ua kexidié kiá mu Ijitu.

⁶ Ku izuua Zuze anga ufua, ni jiphange jê, ni muiji uoso-lolo uenʼió.

⁷ Maji anʼa Izalaiele anga a kala mu di vuala muene, a sokoloka, mueza kifuẋi kia dikota; ixi ioso iezala, ene mu ene.

⁸ Mu kukala-phe, ungana ua Ijitu a u hingi kuala muthu uengi kʼejiia Zuze.

⁹ Muene anga uambela o mundu uê, uixi: Mua mono-ze, anʼa Izalaiele ala ifuẋi ia dikota ia nguzu, etu ndenge;

¹⁰ ndokuenu tu a bhange ndunge, phala ka di vuale, imoxi kia sokoloka kiavulu, hinu ku tuiza ita, enʼiá-phe a di bânda ku jinguma, hé a tu kitukila, a tu lua anga mʼoxiʼumu a tunda-mu.

¹¹ Mukonda dia kiki, a ta-ku akalakixi, ende ni ku a ta mualala ni imbamba iâ. Mukonda Falaó a mu tungila jimbonge ja kubhakela, ni Pitome ni Lamaseji.

¹² Maji kioso-phe kiala kuenda ni ku a talesa hadi, ene ia aia ni kusokoloka dingi ni ku di uanena dingi mu ixi. Ene anga aia ni kukala ni hele ia anʼa Izalaiele.

¹³ Akua Ijitu-phe anga a kala mu bhikisa anʼa Izalaiele ni njinda.

¹⁴ Anga a a ludisa o muenhu uâ ni ubhika ua vulu kaxtiku, mu kutophola mavu, ni kʼumba jindobhi, ni ikalakalu ioso ia mábhia; mu ikalakalu ioso, a a bhikisa jinga kiaiibha ni kuazukutisa.

¹⁵ Muenexiʼa Ijitu anga u zuelela avuadixi a Jihebeleu, sai iú dijina diê Sifra, sai iú dijina diê Puua;

¹⁶ uixi: Kioso ki mu bhanga ufunu uenu ni ahatu a Jihebeleu, se ala bhu muanza, se monʼa diiala mu mu jibha, se monʼa muhatu a kale ni muenhu uê.

¹⁷ O avuadixi-phe ala ni uoma ua Nzambi, kia a tumu muenexiʼa Ijitu ka ki bhange, maji anʼa mala a a bhaka ni muenhu.

¹⁸ Muenexiʼa Ijitu anga uixana avuadixi, uixi: Phalahi mua-lu bhanga kienhiki, anʼa mala muala ku a bhaka ni muenhu?

¹⁹ Avuadixi anga a vutuila Falaó, exi: Mukonda ahatu a Jihebeleu ka soko ni ahatu a Ijitu, kuma a lenguluka, muvuadixi ki aia-ku usanga a bhandulukʼâ kiá.

²⁰ Kienhiki, Nzambi anga u bhanga mbote ku avuaduxi, o mundu hanji iú sokoloka, a di bhanga kifuẋi kia nguzu.

²¹ Mu kukala-phe mukonda dia avuadixi kukala ni uoma ua Nzambi, muene ua a bhange mabhata.

²² Falaó anga u tuma mundu uê uoso, uixi: Uoso monʼa diiala a mu vuala mu mu takula mu honga ia Nilo, o mona muhatu mu mu bhaka ni muenhu.