Lute 4 - O Mikanda Ikola

Maka a undandu bhu pholo ia adiakimi

¹ Bouaji anga u banda ku bhata, u tula bhu muelu ua kimbaka, u xikama. Mu nanga kathangana, ndandu iazukama u tena kukala mukudi ua kubhanga undundula kua Lute, kala kiambele Bouaji, u kala mu bhita. Muene anga u mu handekela, uixi: Xeie, ngânji! Iza hanji kunu, u xikame bhabha.

² Anga u ixana dingi kuinhi dia muthu, ku adiakimi akua-bhata, uixi: Xikamenu hanji bhabha; ene anga a xikama.

³ Anga u ambela ndandu iazukama, uixi: Nouemi ueza dingi ku bhata, ua tundu mʼoxi ia Mouabhe, uala mu sumbisa mavu a kexile a Phangʼietu Elimeleke.

⁴ Ngixi-phe ngi ku kunda-kiu, imoxi u a sumba bhu pholo ia adiakimi akua bhata iá a xikama bhabha, ni bhu pholo ia mundu uoso. Ki uila-phe u a kula, kula-u-phe kiá; o ki uila kana, zuela-kiu, phala ngi kʼijiie; kuma kana-ku dingi ua tokala o ku a kula, kala eie ngó, ni eme nga kaiela ku kunda dié.

⁵ Muene uixi: Ngʼa kula. Kuala Bouaji: Kizuua-phe ki u sumba mavu kua Nouemi, ki bhinga uê u bhenga Lute mukua Mouabhe, mukaji a difundu, phala kuxalesa o dijina dia difundu mu undundu uê.

⁶ Ndandu iazukama anga u zuela, uixi: Bhobho nga lémbua-phe kiá ku a kula; kuma se ngi ki bhanga, nga-nda kuselula o undundu uami eme-muène; kula kiá eie, undandu uami uazukama ua ngi fuamene kubhanga u bhite ko kué, kuma eme nga lémbua-ku kiá.

⁷ Mʼokulu-phe mua Izalaiele, kifua kia kexi-ku mu kukula, ni mu ta mauenji, ni mu kuzubha maka moso, muthu u zula sabhatu iê, u i tambuisa mukuâ; kifua kijimbuete mua Izalaiele kuma maka a batuka muene, abhu.

⁸ Ndandu iazukama anga u ambela Bouaji, uixi: Mavu sumba-u kiá eie, anga u zula sabhatu ié u mu tambuisa-iu.

⁹ Bouaji anga u ambela adiakimi, ni mundu uoso, uixi: Enu-ze mu jimbangi, kizuua kia lelu, kuma mbongo joso ja tokalele kua Elimeleke, ni ja tokalele Kidiioné ni Mahalone, nga ji sumbu kua Nouemi.

¹⁰ Ni Lute mukua Mouabhe, mukaji a Mahalone, nga mu lembe lelu kukala mukaji ami, phala ngi xalese dijina dia difundu mu undundu uê, phala dijina dia difundu ki di bhue-mu ni di jime mu jindandu jê, ni bhu kanga dia dibhata diê. Enu-phe mu jimbangi kizuua kia lelu.

¹¹ Mundu uoso a xikama bhu muelu ua kimbaka, ni adiakimi, bhenhobho exi: Tu jimbangi muene. O Jihova a bhangese kuila muhatu iú ueza mʼonzo ié a soke ni Lakele ni Liia, a tenene kiiadi kiâ kubhanga o dibhata dia muiji ua Izalaiele. Eie muene ue Bouaji, kala u dikuenze, o Nzambi a ku bhane kuzediua mu Efrata, ni kujinga o dijina mu Beleme.

¹² O dibhata diê di kale mukua ni dibhata dia Peleze, a mu vuala kuala Tamale kua Juda, dibhata dié di sokoloke ku mbutu ia-nda ku ku bhana Jihova kua mona muhatu muenʼiú.

Lute, mukaji a Bouaji ukala kivadi

¹³ Kienhiki Bouaji u bhenga Lute, anga u kala mukajiʼê. Anga u bokona kua muene, Jihova u mu bhana kuimita, hé u vuala mona ua diiala.

¹⁴ Ahatu anga ambela Nouemi, exi: Jihova a tane-ku! lelu ua ku bhana ndandu iazukama u tena kukala dilemba ni ku ku kula, mbé difundo o dijina diê di kale jinge mua Izalaiele.

¹⁵ A kale mona u ku bhana muenhu uobhe, u ku bhana dingi nguzu mu kukuka kué; kuma mukajiʼa monʼé ua ku zola, muene ua mu vuala; o mukajiʼa monʼé umoxi muenhú sambuadi dia ana a mala ala ndenge.

¹⁶ Nouemi anga u tambula mona, u mu akata bhu jihata, u mu kala kiledi kiê.

¹⁷ Ahatu nʼakuá akua-bhata a di zukama-nê, mu kutana kumoxi ni muene anga a kuata ku mu ila, exi: Nouemi a mu vualela monʼê, anga a mu luka Obede. Muene tata ia Jese, tatʼâ Davidi.

¹⁸ Ingo ia vumu-phe ia Peleze ienhiʼii: Peleze u vuala Hezeloni,

¹⁹ Hezeloni u vuala Halane, Halane u vuala Aminadaba.

²⁰ Aminadaba u vuala Nasono, Nasono u vuala Salumono,

²¹ Salumono u vuala Bouaji, Bouaji u vuala Obede,

²² Obede u vuala Jese, Jese u vuala Davidi.