Lute 3 - O Mikanda Ikola

Lute u bhinga Bouaji kia tokala ndandu ia zukama

¹ Kienhokio, Nouemi dia ukouʼê anga u mu ambela, uixi: Monʼami ki ngi fuama ku ku sotela kidímba, phala u kale kiambote?

² Ki tualʼiki, Bouaji ki ndandu ietu, uavu ilumba ié i ua kexe kuenda-na-iu? Lelu-phe mu usuku iú ua-nda kubhiata sevada bhu kienda kiê kia kuvundila.

³ Kiki-phe, eie dʼiẋike, u di uese maji a dizumba, u zuate o izuatu ié iamboteʼoio, uie bhu kienda kia kuvundila; muene-phe eie ku mu bhite luua ku mesu nʼa ku mono, katé kia kà zubha kúdia ni kúnua.

⁴ Kioso-phe kia kʼaia mu kuzeka, eie u tongolola kiambote o kididi bhuoso bhua zeka; uia u mu vulumuna ku inama, u zangula o divunga dia di futu hé u zeka-bhu; muene-phe u ku tangela dingi kioso ki u bhanga.

⁵ Lute anga u mu ambela, uixi: Kioso ki ua ngi tangela kiene ki ngi bhanga.

⁶ Anga u kulumuka bhu kienda, u bhanga kioso kia mu longesa ukouʼê.

⁷ Anga ki bhita kuila, Bouaji kia zubha kúdia ni kúnua, muẋima uê ua sanguluka, uia kuzeka bhu mbandu ia lumu ia sevada ia jimbundu. Lute anga uiza ni kuzonza, u vulumuna bhu inama ié, anga u zeka-bhu.

Bouaji u tanga kusakana ni Lute

⁸ Kutula mu kaii ka usuku, diiala di sasumuka ku kilu, u bhetuka; mu kutala, u mona bhu inama iê bhua zeka muhatu,

⁹ Anga u ibhula, uixi: Eie nanhi? Kuala muene: Eme Lute, ngi kahatu ké; ngi vungine-phe ni dibhabha dia vunga dié, eme ngi kahatu ké, kuma eie u dilemba, eie u ndandu iazukama ua fuama o ndundula.

¹⁰ Kuala Bouaji: Jihova a ku bhane dibesá, monʼami! Mukonda o mbote iii i ua sukidila kubhanga iala kota, o i ua diangele kubhanga iala ndenge; kuma eie kua kaiela mala a minzangala, a kale jingadiama, mba a kale akua itadi, ki ene u ua suu.

¹¹ Kiki-phe, monʼami, ku kale ni hele, eme ngi ku bhanga kioso ki ua tange; mukonda akua bhata dietu oso a ku ijiia kuila eie u muhatu ua ujitu.

¹² Kidi muene eme ngi ndandu iazukama, ki ngi di tunu-kiu; maji hanji sai-phe mukuetu ua beta kuzukama eme ndenge.

¹³ Nhohena hanji bhenhabha usuku iú lelu, o ki kúkia muene se u xikina ku ku bhanga kia tokala o ndandu iazukama, a ki bhange kia undandu uazukama; o ki kala udituna ku ku bhanga kia tokala o undandu uazukama, eme kiá ngi ku bhanga-kiu. Nga loka muene mu dijina dia Jihova. Eie zeka kiá bhenhabha katé ki kúkia.

¹⁴ Muene anga u zeka bhu inama iê katé kuáki. O ki kuákie u balumuka-phe mu kafukufuku, kuila muthu ku tena luua ku mu mona kiambote.

¹⁵ Anga u mu ambela dingi uixi: Beka dilasola dié di ua di futu, u di kuate kiambote; Lute anga u kuata dilasola, muene u mu zongela-bhu izongelu isamanu ia sevada, u mu tuika-iu; anga Lute uia ku bhata.

¹⁶ Kia zubha kutula mʼonzo kua ukouʼê, ukouʼê uixi: Kuambe, monʼami, kia ku bhiti kiebhi? Muene anga u mu tangela kioso kia bhange o diiala dienhodio.

¹⁷ Uixi: Ua ngi bhana izongelu isamanu iii ia sevada, uixi: Kuie maku ahatu kua ukouʼé.

¹⁸ Nouemi bhenhobho u mu ambela, uixi: Xikama monʼami, kinga u tale kioso kia-nda kubhita mba ima i kala kiebhi; kuma diialʼodio ka-nda kunhoha, katé maka a ma zubha lelu muene dienhidi.