Lute 2 - O Mikanda Ikola

Lute uia kumuna ku mábhia;

¹ Nouemi anga u kala ni ndandu ia munumeʼê, muadiakimi mukua jimbongo, ua tokala ku muiji ua Elimeleke; dijina diê Bouaji.

² Lute-phe mukua Mouabhe anga u ambela ukoué Nouemi, uixi: Ngehele, ngiie ku mábhia, ngi none tu ixina tua sevada tua laúka kua iá ala kumuna, mu kaiela uoso u ngi kala ni henda nʼa ngi tambula mʼobhia diê. Nouemi anga u mu ambela, uixi: Ndé kiá, monʼami.

³ Muene anga uia, u kuata kunona mu díbhia, ni kukaiela ku dima dia jingunza jala kumuna. Kuzediua kuê-phe o kutukulukila mu díbhia dia Bouaji, ua tokala ku muiji ua Elimeleke.

⁴ Bhenhobho-phe Bouaji u tunda mu Beleme, anga uiza ku menekena o jingunza jala kumuna, uixi: Ngana a mi kuatekese. Ene ue a mu kumbulula, exi: Eie ue Ngana a ku bhane dibesá.

⁵ Bouaji anga u ibhula selevende iê uala mu kalakesa o jingunza, uixi: Kilumba kiki monʼa nanhi?

⁶ Selevende uala mu kalakesa jingunza, u vutula, uixi: Muene kilumba mukua Mouabhe, uejiia kumoxi ni Nouemi kia tundu ku Mouabhe.

⁷ Ua ngʼambela, uixi: Ngʼehe ngende ni kunona tu ixina tua lauka mua bhiti o jingunza ni kumuna, ni mu jimbandu ja ita iókute kiá. Hanji-phe kieza mu kimene uala kuenda ni kunona tunde kienhokio katé mu kumbiʼumu; ua xikamene ngó kathangana kofele mʼonzo.

Bouaji u zuelesa Lute ni henda

⁸ Bouaji anga u ambela Lute, uixi: Uevu-ze, monʼami? Kana kuia kunona mu dibhia diengi, bhabha kana kusondoloka-bhu nʼu-ii kuengi; inda, u kala muenhumu, u xale kumoxi ni ilumba iami.

⁹ U langa ngó díbhia dioso diala kumuna ene, u di nhenge-nâ kumoxi; kuejiia kuila minzangala nga a tendelela phala ka ku bhange kima? Dinhota se dia ku kuata, bhixila ku jimbinda ja teke minzangala, mbé u nue.

¹⁰ Lute anga u di ṗhudikila bhoxi u bhetama pholo katé mu mavu, anga u mu ambela, uixi: Kia bhiti kiebhi, ngana, nga bongo kiadi ku mesu mé, phala ku ngi suua kiki, eme ngi mukua ʼxi iengi?

¹¹ Bouaji anga u mu ambela, uixi: A ngi kundu-kiu kiambote kioso ki ua bhange ukouʼé tunde kia fu muadi ué; ni kioso ki ua xi tatʼenu ni mamʼenu, ni ixi ia ku vualela, eie ueza kutunga ni mundu uengi kua ejidile luua.

¹² Jihova a ku futé-kiu kioso ki ua bhange; o kisakidilu kié ki kale kia dikota ki ku bha Jihova, Nzambi ia Izalaiele, ua bhingi moxi a mabhabha-mê muene mu ueza kusota kididi kia kukala.

¹³ Lute anga u mu ambela, uixi: Ngi bonge kisangu-sangu ku mesu mé, ngana iami, mukonda ua ngi bhuisa hele, ngi kahatu ké; kuma ua ngi zuelesa ni henda, sumbala o ilumba ié iamukuá eme ki ngi di fika-nâ.

¹⁴ O mu kithangana kia zumbuka kukalakala phala aie mu kúdia, Bouaji u mu ambela, uixi: Bhixila kunu udie ku mbolo, u mame mbolo ié mu vindangele. Muene anga u xikama kumoxi ni jingunza, hé a mu tambuisa o jimbundu jʼokange, u dia, hé uikuta, hanji kua subhuka.

¹⁵ O kia balumuka mu kunona dingi, Bouaji u ambela minzangala iê, uixi: Muehienu a none ni muʼaxaxi ka ita iókute kiá, enu-phe ki mu mu bazele se muene kiene kiandala.

¹⁶ Mu enda ni ku mu fomuena tuixina mu ita, mu mu xile bhoxi, mbé a none muene, enu kana ku mu fudisa.

¹⁷ Kienhiki uia ni kunona mu díbhia muenhomo katé mu ngoloxi; o ixina ioso ia nona-mu anga u i vunda, mu tunda kinda kia sevada ia jimbundu.

¹⁸ Anga u i zangula, uia ku bhata; ukouʼê anga u mona sevada ia tundu mu kunona kuê; ni ku jimbundu jʼókange ja subhuka bhuadi muene, Lute ua mu bhekela-ku ue.

¹⁹ Ukouʼê anga u mu ibhula, uixi: Lelu ua nonena kuebhi? Kuebhi ku ua kalakalela? A tane-ku, uoso ua ku suu kiki. Muene anga u tangela ukouʼê kuoso kua kalakalela, u mu ambela ioso ia bhiti, uixi: Muadiakimi nga kalakala-nê lelu mu díbhia diê, dijina diê Bouaji.

²⁰ Nouemi bhenhobho anga u ambela mukaji a monʼê, uixi: A tane-ku muenhó uoso ua ku tambulula! A kale ni dibesá dia Jihova! Manhi o henda ia Jivova ii-ié hanji, kiluua i batuka kua iá ala ku muenhu ni ku ma difunduʼetu afu kiá! Nouemi anga u zuela dingi, uixi: Diialʼodio ndandu ietu, ndandu ia zukama muene! Muene ue muthu ku malembʼetu a fuama o ku tu kula ni kubhanga ndundula.

²¹ Lute dia mukua Mouabhe anga uzuela dingi, uixi: Kidi muene, ua ngʼambela dingi, uixi: U nhenganana jinga o nzangi ia jingunza jami, katé bhuoso bhua kà zubhila kumuna o mábhia mami oso.

²² Nouemi anga uambela dingi mukajiʼa monʼê Lute, uixi: Kia uabha muene, monʼami, u ile kumoxi ni ilumba iê, kana kuia mu díbhia dia muthu uengi sumba ka ku tambulula kiambote.

²³ Kienhiki Lute anga u nhenganana o ilumba ia Bouaji ni kunona, katé ene kia zubha kumuna sevada, ni kumuna ue dingi o tiliku. Lute anga u tunga-phe ni ukouʼê.