Lute 1 - O Mikanda Ikola

Nouemi ni akaji a anʼê

¹ Anga ki bhita kuma, mu izuua kia kexile afundixi kufundisa mu Izalaiele, mʼoxi mu kala nzala ia dikota; Anga bhu kala muthu, mukua Beleme ia Juda, uia kunakina mʼoxi ia Mouabhe, ni muene ni mukajiʼê ni anʼê kiiadi a mala.

² Diialʼidi dijina diê Elimeleke, mukajiʼê dijina diê Nouemi, anʼê majina mâ Mahalone ni Kidiione, ene oso akua Efrata mu Beleme ia Juda. Anga eza mʼoxi ia Mouabhe, a tunga momo.

³ Mu kubhanga izuua, Elimeleke, munumeʼa Nouemi anga ufua; o Nouemi muene anga u xala ni anʼê kiiadi.

⁴ Anʼê anga a sakana ahatu a akua Mouabhe, umoxi dijina diê Olofa, mukuá dijina diê Lute. Anga a tunga muenhomo kifua kuinhi dia mivu di tena.

⁵ Ni Mahalone ni Kidiione anga afua ue kiiadi kiâ. Muhatu Nouemi anga u xala ngó, ua fundu anʼê kiiadi a mala ni munumeʼê.

⁶ Nouemi anga u balumuka ni akaji a anʼê mu kutunda mʼoxi ia Mouabhe nʼa vutukise ko kuâ, kuma uevila mʼoxi ia Mouabhe kuila Jihova ua xinganeka mundu uê, iu ua a bhana kia kúdia.

⁷ Anga a katuka bhu kididi bhuoso bhuala, ni akaji a anʼê kiiadi aia-nê kumoxi, a mu xinjikila mu kuvutuka kʼoxi ia Juda.

⁸ Mu njila kioso kia muia ni kuenda, Nouemi anga u ambela akaji a anʼê, uixi; Ndokuenu kiá, mu vutuke kala muthu ku bhata dia manhʼâ; o Jihova a mi bhange o mbote, kala enu ki mua i bhange o madifundu, kala ue ki mua ngi bhange-iu eme.

⁹ Jihova a mi bhese kidimba, kala muthu monzo ia diiala diê Anga u a bhana jinzóbole, anga a zangula mázui mâ, ni kudila.

¹⁰ Anga a mu ambela, exi: Kana, etu uetu tuandala tuia kumoxi ni eie, ua-lu vutuka ku kifuẋi kienu.

¹¹ Nouemi-phe uixi: Ndokuenu! Vutukenu tata, anʼami! Mu ki bhangela-hi o kuia kumoxi ni eme? Mua fika kifua ngala dingi ni anʼa mala mu divumu diami, kuila hinu mu sakana-nâ?

¹² Vutukenu anʼami tata, nga mi diondo, mu di tele kuoso ku mua mono; kuma eme nga kuka kiá kiavulu, ki ngi tena dingi kusakana diiala. Né ngedi ngi dielela, hé ngi sakana diiala usuku ua lelu, ngi vuala dingi anʼa mala,

¹³ enu kifua mu a xikamena katé kia kula? kifua ene a mi fudisa kukala ni malʼenu a kusakana? Kana tata, anʼami! Kuma kubhondalala kuami eme kota, kuenu-enu ndenge, mukonda eme ngedi kala lukuaku lua Jihova luene luala ku ngi bha kaxtiku.

¹⁴ Anga a zangula dingi mázui mâ a ta kibúlukutu ni kudila. Olofa anga u bhana ukouʼê jibeju, u di lekela-nê; Lute-phe ua mu naminina muene,

¹⁵ Muene anga u mu ambela, uixi: Talesa huedʼiê iú-uió, ua-lu vutuka ku kifuẋi kiê ni ku nzambi jê; eie ue vutuka, kaiela-ze mukuenu.

¹⁶ Lute-phe, uixi: Kana ku ngi bhomba ni ngi ku xie, anga ngi ku sondoloka hé ngi fula ku ku kaiela; mukonda kuoso ku uia eie, eme ue kuene ku ngiia; bhuoso bhu ua kà tudila eie o usuku, eme ue bhene bhu ngi tula; o mundu ué u kala mundu uami, Nzambi ié Nzambi iami.

¹⁷ O ixi ioso i ua ká fuila eie, kididi bhuoso bhu ufuilʼeie, eme ue bhene bhu ngi fuila, o bhua ku fundʼeie bhene bhua ngi funda. Jihova a ngi bhange-kiu, a ngi tele-kiu dingi, se nga xikina kuuanunuka nʼeie, mukonda kikale ki tu uanuna o kúfua.

¹⁸ O kia mu mono ua jiji muene, muẋima ua mu tetuluka kiavulu mu kuia-nê, maka ua ma tula, kala ku mu fudisa dingi.

¹⁹ Kienhiki anga ela kumoxi kiiadi kiâ, katé kia bhixila mu Beleme. Anga ki bhita kuila, kia zubha-phe kutula mu Beleme, dibhata dioso di salumuka mukonda diâ, ahatu anga a di ambela mudiâ, exi: Manhi ki muenʼiú Nouemi?

²⁰ Muene-phe anga uenda ni ku a ambela, uixi: Kana ku ngʼila Nouemi, kale mu ngʼila Mala, mukonda Muteni-a-ioso muenhu uami ua u ludisa kiavulu muene lokoso!

²¹ Ngele ni maku ezala, kiki Jihova-phe ua ngi bhangesa kuvutuka ni maku ahatu; Phalahi ngoho mu ngʼila Nouemi ki ngalʼiki, mua mono Jihova ua ngi tundila kala ngi nguma iê, o Muteni-a-ioso ua ngʼizalesa ni dilamba?

²² Kala kiki Nouemi ua vutuka ku bhata diâ, kumoxi ni Lute mukua Mouabhe, mukaji a monʼê, ua tundu mʼoxi ia Mouabhe. Anga a bhixila bhu Beleme mu izuua ia kumateka kumuna sevada.