Luka 6 - O Mikanda Ikola

Jixibulu a bukula masa kia Sábhalu

¹ Kizuua kiamukuá, kia sabhalu, Jezú u kala mùbhita mu mabhia ma tiliku. O jixibulu jê anga ji tolola tu mitue tua tiliku, a tu xokota ni maku, a tu dia.

² Jifalizeu jimoxi anga ji zuela, exi: Mukonda diahi mu bhanga kima kiòjidike o ku ki bhanga mu kizuua kia Sábhalu?

³ Jezú anga u a vutuila, uixi: Enu kiluua mu tanga kia bhangele Davidi, kia kexile ni nzala, muène ni athu a kexile-nê?

⁴ Kuma ua bokuene mʼonzo ia Nzambi, anga u katula jimbolo bhu kalatódio, ja telelele Nzambi, anga u ji dia, hé u ji bhana ue oso aia-nê, sumbala o jene mu Kitumu kietu, ki ja tokala muthu uoso-uoso ku ji dia, kikale ngó o jinganga!

⁵ Mu kuzubha, Jezú anga ua ambela dingi, uixi: Monʼa Muthu, ngana ue ia Sábhalu.

Jezú u saka mu Dilombe kia Sábhalu

⁶ Mu Sábhalu iamukuá ue, Jezú u bokona mu dilombe, anga u kala mù longa. Bhenhobho anga bhu kala muthu, o lúkuaku lua kadilu lua mu kukuta.

⁷ Jimesene ja Kitumu ni jifalizeu anga a kala mu ku mu tala, mba u mu saka mu kizuua kia Sábhalu, phala ene a mu te mulonga. Mukonda ene a mesenene ku mu kuata mu diba dioso-dioso, nʼa mu âmbe kuila ka mu kualuka o Kitumu.

⁸ Muène-phe kuma uejiia kiambote o ixinganeku iâ, u ambela o muthu ua kukuta o lúkuaku, uixi: Balumuka, uimane hanji bhu ʼaxaxiʼabha. Muène anga u balumuka, hé uimana.

⁹ Jezú anga ua ambela, uixi: Nga mʼ ibhudisa hanji, mba kia tokala mu Sábhalu kubhanga o mbote, inga kubhanga phulu? O kubhana muenhu, inga o ku u katula?

¹⁰ Jezú ua exi sûi, kia mu kondoloka, anga uambela o muthu, uixi: Sunununa o lúkuaku lué! Muène anga u lu sunununa, lúkuaku luê lueluka.

¹¹ Ene-phe ezala ni njinda, anga a kala mu ku di longesa kioso kia bhanga Jezú.

Kuinhi ni kiiadi a a tungula

¹² Izuua ieneʼoio Jezú anga uia ku mulundu mu kusamba; anga u fula kilu mu usuku uoso ni kusambela Nzambi.

¹³ Ki kúkia, anga uixana jixibulu jê, u sola mudiâ kuinhi dia muthu ni kiiadi, anga u a luka uixi: Jipoxolo.

¹⁴ Ximá, ua mu ixana ue uixi, Phetele, ni Mandele phangiʼê, Tiiaku ni Nzuá, ni Felipe, ni Matulu,

¹⁵ ni Matesu, ni Tomé, ni Tiiaku dia Lufeu, ni Ximá, a mu ila Zelote;

¹⁶ ni Juda dia Tiiaku, ni Juda dia Kadiota, ua-nda ku mu tunda o ufe.

O mambu ma mulundu

¹⁷ Jezú anga u tuluka ku mulundu ni ene, hé uimana bhu kididi kia sokelela, bhua mu bhongolokela o kifuẋi kia dikota kia jixibulu jê, ni athu avulu a tundu ku Judeia ioso, ni ku Jeluzaleme, ni ku ndúndu ia kalunga ku jisanzala ja Tilu ni Sidonha.

¹⁸ Athu oso enhá eza ku mu ívua ni ku a saka mauhaxi. Oso ue a tate ni jinzumbi jaiibha, anga a kala mú kuiluka.

¹⁹ Kifuẋi kioso anga a bhindamena ku mu babata, mukonda mu mukutu uê muala kutunda umbanda, uala ku a saka ene oso.

O kuzediua ni kuxixima

²⁰ Jezú anga u bhetula mesu kuala o jixibulu jê, hé ua ambela, uixi: Mua zediua, enu mu jingadiama, mukonda o Utuminu ua Nzambi uà kala uenu.

²¹ Mua zediua, enu kiki muala ni nzala, mukonda mua-nda kuikuta. Mua zediua, enu kiki mua-lu dila, mukonda mua-nda kuolela.

²² Mua zediua, athu se a mi zembe, a mi katula mu ukamba uâ, a mi lebhula, a mi texi dijina dienu kuma exi mu athu aiibha, mukonda dia Monʼa Muthu.

²³ Sangulukenu kizuua kienhókio, mu tumbujuke ni kutana, mukonda kisakidilu kienu ki kala kia dikota kia mi bhakela ku diulu. Mbata ni jitata jâ kiene ue ki ja bhangele o jipolofeta.

²⁴ Enu-phe, lamba dienu, mu jimvuama, mukonda mua tambula kiá o mbote ienu.

²⁵ Lamba dienu, enu kiki muekuta, mukonda mua-ndu kala ni nzala! Lamba dienu, enu kiki mua-lu kuolela, mukonda mua-ndu kala ni kikote ni masoxi.

²⁶ Lamba dienu, athu oso se a mi tumbula kiambote, mbata jitata jâ kiene ue ki ja kexi kutumbula o jipolofeta ja makutu!

O kuzola jinguma

²⁷ Eme-phe ngi mi ambela, oso muala kuívua: Zolenu jinguma jenu; oso a mi zembe, a bhangienu o mbote.

²⁸ Benzelenu oso a mi bhubhidila; Sambelenu oso a mi bhana o malebhu.

²⁹ Uoso u ku bhana huxi ku ditama dimoxi, mu bhane ue ni dia mukuá. O ua ku tambula dibeka, ni mbinza ku mu fudise-iu.

³⁰ Ua ku bhingi, mu bhane; o ua ku ambata imbamba ié, ku mu ibhule-iu dingi.

³¹ Kioso ki mua mesena athu a mi bhanga-kiu enu, kiene ue muene ki mu a bhanga ene.

³² Se mua zolo ngó a mi zolo enu, mu kala ni kisakidilu kiahi kua Nzambi? Kuma ni akua-ituxi a zola ue oso a a zolo ene!

³³ Se mua bhange mbote kua ene ngó a mi bhanga enu mbote, mu kala ni kisakidilu kiahi kua Nzambi? Kuma ni akua-ituxi ue a di bhanga mbote mudiâ.

³⁴ Se mua sobhesa ngó athu mua a kinga ku mi bhana ue enu, mu kala ni kisakidilu kiahi kua Nzambi? Ni akua-ituxi a di sobhesa uâ ene mudiâ, nʼa kinge kutambula dingi kia soko!

³⁵ Zolenu-phe o jinguma jenu, a bhangienu o mbote. Sobhesenu, sé ngó kukakula muthu mba mu kinga ku mi vutuila ki mua sobhesa. O kisakidilu kienu anga ki kala kia dikota, hé mu kala mu anʼa Nzambi ia Diulu. Mukonda muène mukua kulendukila athu a kambe kusakidila, a bhukumuka.

³⁶ Kalenu mu akua henda, kala kiene Tatʼenu mukua henda.

O kufika mukuenu

³⁷ Ki mu fike akuenu, phala enu uenu ka mi fike; ki mu êlese akuenu, phala enu uenu ka mi êlese; lolokenu akuenu, enu uenu Nzambi a mi loloke.

³⁸ Bhanenu akuenu, enu uenu Nzambi a mi bhane. Kienhiki-phe Nzambi ua-nda ku mi bhana kizongelu kiambote, kiòbate, kiòsakese, kia ẋamuka, a mi bhana bhu homba ienu. Mukonda ioso o nzôngo i mua zongela akuenu, iene ue Nzambi ia mi zongela enuʼenu.

³⁹ Anga ua tela kifika, uixi: Manhi kifofo ki tena kuendesa kifofo ni mukuá? Se u ki bhanga, ka lundumuka kiiadi kiâ mu dikungu?

⁴⁰ Xibulu ki i tundu mesene iê ua mu longo. Suke xibulu ioso ki i zubha ku di longa, i soka ni mesene iê.

⁴¹ Mukonda diahi utala o kisemu kiala mu diesu dia phangiʼé, maji ku mono o thùnga iala mu diesu dié eiemuène?

⁴² U tena kiebhi kuambela phangiʼé uixi: Phangiʼami, izá ngi ku katule kisemu mu diesu, eiʼmuène ua lémbua kumona o thùnga iala mu diesu dié eiʼmuène? U mukua makutu! Dianga hanji kukatula o thùnga mu diesu diéʼmuène, u mone kiua kiambote kukatula o kisemu mu diesu dia phangiʼé.

O muxi ni ibundu iê

⁴³ Mukonda kana-ku muxi ua uabha uima kibundu kiaiibha; kana-ku ue muxi uaiibha uima kibundu kiauabha.

⁴⁴ Mukonda muxi a uijidila ku ibundu iê. Ku minha kène kukanza-ku jifiku, o ku musonge ki ku kala ji-uva.

⁴⁵ Muthu uambote, ku mbote ia mu vudila mu muẋima, u tubhula ima iambote; o kifusa, ku ufusa ua mu vudila mu muẋima, u tubhula ima iaiibha. Mukonda kioso kia vudila ku muẋima, kiene ki tanga o dikanu.

O madisesa maiadi

⁴⁶ Mu ngʼila kiebhi Ngana, Ngana, mua kambe o kubhanga ima ioso i nga mi ambela?

⁴⁷ Uoso ueza ko-kuami, ua ngʼivu maka, anga u ma bhanga, ngi mʼidikisa uoso a di fangana-nê.

⁴⁸ Ua di fangana ni muthu u tunga inzo, anga u kanda muxinda ua zongo, u xikamesa o disesa ku matadi. O kieza kimvula, hungulule anga i kondoloka inzuʼoio, iene-phe ki ia tena ku i zambesa, mukonda iòtunge kiambote.

⁴⁹ Uoso-phe uívua, anga u kamba ku ki bhanga, ua di fangana ni muthu u tunga ngó ku mavu, bhua kambe disesa. O ki bhita hungulule, inzo kindala ia lundumuka. O kusekala-phe kua ʼnzuʼoio, ku vula!