Luka 4 - O Mikanda Ikola

Jezú a mu thendala mu mikau ia hatu

¹ Jezú, uezala ni Nzumbi Ikôla, u tunda ku Njolodá, anga a mu bheka kuala Nzumbi mu mikáu ia hatu.

² Kuenhoko anga a mu thendala kuala Diabhu mu makuinhi auana a izuua. Ka di kima, izuua iosuʼoio; o ki iabhu, nzala ia mu kuata.

³ Diabhu anga u mu ambela, uixi: O ki kala eie-muène u Monʼa Nzambi, tuma ditadi didi di kituke mbolo.

⁴ Jezú anga u mu vutuila, uixi: Kiosoneke mu Mikanda ia Ngana, kuma muthu ki ku mbolo ngó kua muena o muenhu.

⁵ Diabhu anga u mu bheka bhu thala ia mulundu, u mu londekesa jixi joso mu ngongo, mu kathangana kòfele ngó.

⁶ Anga u mu ambela, uixi: Ngi ku bhana o ukota uoso ni maungana ma jixi joso jiji, mukonda eme-muène a ngi bhakuila na-mu; uoso eme nga mu andala, muène ngi mu bhana na-mu.

⁷ Kala kiki, se u ngi bheza bhu pholo iami, moso muene ma kala mê-eie.

⁸ Jezú anga u mu vutuila, uixi: Kiosoneke mu Mikanda ia Ngana kuma: Ngana dia Nzambi ié, muène ngó u mu bheza, muène ngó u mu bhikila.

⁹ Anga u mu bheka mu Jeluzaleme, u mu imanesa ku thandu dia kipena kia Tembulu, hé u mu ambela, uixi: O ki kala eie-muène u Monʼa Nzambi, tuka bhabha, u tule bhoxi,

¹⁰ kuma kiosoneke mu Mikanda ia Nzambi, exi: Nzambi muène u tendelela ji-anju jê, ni ji kuinge: Exi dingi:

¹¹ Bhu maku mâ bhene bhu a kuzenzekela, phala ku di bhukane kinama ku ditadi.

¹² Jezú anga u mu vutuila, uixi: Kiòzuele mu Mikanda Ikôla kuma: Ngana dia Nzambi ié ku mu lokalale.

¹³ Diabhu kia zubha kuthendala Jezú kiki, ua mu ambudisa hanji nʼa kinge kithangana kiengi.

Jezú u andeka o kikalakalu kiê mu Ngalileia

¹⁴ Jezú anga u vutuka ku Ngalileia, ua zuata nguzu ia Nzumbi. O fuma iê anga i sambuka mʼoxi iosuʼoio.

¹⁵ Muène anga u kala mù longa mu malombe mâ, ene oso anga a mu ximana.

Jezú a mu kaia mu Nazalé

¹⁶ Anga u tula mu Nazalé, mua mu sasela. Kuma kiene o kífua kiê, u bokona kia Sábhalu mu dilombe dia Jijudé, hé uimana mu kutanga mu Divulu dia Ngana.

¹⁷ Anga a mu tambuisa o divulu dia polofeta Izáia. Muène anga u jikula o divulu, u sanga kididi kiosoneke kiki:

¹⁸ Nzumbi ia Ngana ua ngi tula, mukonda muène ua ngʼundu kutudila o jingadiama, Njimbu Iambote. Ua ngi tumu kuxika ngonge ia ufolo ua abhika, ni kubhana mesu o ifôfo, ni kujituna oso a a kuika,

¹⁹ ni kukola o muvu ua Ngana ua kubhanduluka.

²⁰ Jezú anga u jika o divulu, u di tambuisa mukua-dilombe, anga u xikama. Athu ene oso mu dilombe, mesu a a te kua muène.

²¹ Muène anga u kuata ku ambela, uixi: Lelu kia bhiti, ki muevu kiòsoneke mu makʼama.

²² Ene oso anga a kala mu ku mu tumbula kiambote, a diuana maka ma uabha ma-la kutunda ku dikanu diê, exi: Manhi ki muenhú monʼa Zuze?

²³ Jezú anga ua ambela, uixi: Kidi kiene, enu mua-ndu ngʼamba o Sabhu iíi: Kimbanda, di sake eie-muène! Muanda kuzuela ue, muexi: Ima ioso i tua ku ivu ni ku i bhanga mu Kafanau, bhanga-iu ue bhabha bhu bhata bhu ua kudila.

²⁴ Uixi dingi: Kidi kiene ngi mi ambela, Polofeta kene ku mu tambulula ni uthu kiambote bhu bhata diê-muène.

²⁵ Ivenu, ngi mi ambele o kidi: Mu Izalaiele mua kexile ahatu a atudi avulu mu izuua ia Elija, kia jikile o diulu mu mivu itatu ni mbeji jisamanu, mʼoxi ioso anga mu vula nzala.

²⁶ Maji kana-bhu-phe muthu mu atudiʼa Izalaiele a mu bhele Elija ku mu langeka, ki kale a mu tuma ku muhatu ua mutudi ku Seleta, mʼoxi ia Sidonha.

²⁷ Mu Izalaiele ue mua vudile jihaxi ja kikunzu mu izuua ia Elizeu; kana muthu-phe a mu sakele na-kiu, inda a mu sakele Naamane ngó dia mukua Sídia.

²⁸ Ene oso mu dilombe ki evu kuzuela kiki, a kala ni njinda iavulu.

²⁹ Anga a balumuka, a mu katula mu sanzala, hé aia-nê katé bhu nzendu ia dikenhe, kuma ene a tungu mu mulundu, a mesena a mu lundumuna bhobho.

³⁰ Muène-phe ua a bhita bhuʼaxaxe kâ, anga uia njila iê.

Jezú u tundisa o dimonho

³¹ Jezú anga u kulumuka mu Kafanau, sanzala ia Ngalileia, anga u kala mù longa izuua ia sabhalu.

³² Athu anga a mu diuana o ulongelu uê, mukonda muène kia zuela, maka mê ma nguzu.

³³ Mu dilombe anga mu kala muthu mu mukutu uê mua bokona dimonho diaiibha. Anga u kuata ku di kola, uixi:

³⁴ Aiuê! Etu tua kuata-hi ni eie, Jezú dia Nazalé? Kífua ueza ku tu muanga? Eme nga kuijiia kiambote, u muthu ukôla, a ku tumikisa kuala Nzambi!

³⁵ Jezú anga u mu kidika, uixi: Di xibhe! Muthu iú, tunda mu mukutu uê! Dimonho anga di mu vunda hanji bhoxi bhuʼ axaxe-kâ, anga di tunda mu mukutu uê, sé ngó ku mu kuama.

³⁶ Anga athu ala-bhu a bhuuama ene oso, hé a di a mbela mudiâ, exi: Kizuelu kiahi ki kala kiki? Muène u tumina madimonho ni uphoxi ni kusuina, kuila a tunde, ene-phe a tunda muene!

³⁷ O fenge iê anga i bhixila mu ididi ioso, mʼoxi iosuʼoio.

Ukôuʼ a Phetele a mu saka, hi haxi jamukuâ

³⁸ Jezú anga u katuka mu dilombe, u bokona mʼonzo ia Ximá. Ukouʼa Ximá, ua muhatu-phe, febele ia mu kuata kiavulu; anga a mu bhinga nʼa mu kuatele henda.

³⁹ Muene anga uia u mu imanena bhu mbandu iê, hé u bazela o febele, o iene anga i mueha. Muhatu anga u balumuka kithangana kienhókio, u kala mu ku a bhangela kúdia.

⁴⁰ Kumbi ki diia mù tula, oso ala ni jihaxi jâ, né uhaxi uahi uoso-uoso, a mu bhekela-ju; o muène kia a tula o maku mê, ene oso-lolo eluka.

⁴¹ Athu avulu, madimonho ma tunda mu mikutu iâ ni ku di kola, exi: Eie Ngana, u Monʼa Nzambi! Muène-phe u kala mu ku a bazela, ka ehela kuzuela, mukonda ene a mu ijiia kuma muène Kristu.

Jezú ni njimbu iambote

⁴² Kuma ki kuákie, Jezú u tunda mu mbonge, hé uia kididi kia ubheka. Mundu anga a kala ku mu sota, anga a mu sanga, a mesena a mu kuata, phala ka tunde dingi bhu mbandu iâ.

⁴³ Muène-phe ua ambela, uixi: Kua ngi bhingi ue kuia kukola o Njimbu Iambote ia Utuminu ua Nzambi mu jisanzala jamukuá, kuma kiene kia ngi bheka.

⁴⁴ Anga Jezú u kala kienhiki mù longa mu malombe ma Ngalileia.