Luka 3 - O Mikanda Ikola

Nzuá u mateka kulonga ni kubatizala

¹ Ku muvu ua kakuinhi ni itanu ua utuminu ua Tibéliu Sézalu, kioso ki ala Pônsio Pilatu nguvulu ia Judeia, ni Helode sobha ia Ngalieleia, ni pangiʼê Filipe sobha ia Ituleia ni ixi ia Talakonite kumoxi, o Lusanha uala sobha ia Abilene;

² Mu izuua ia jinganga jònene Hana ni Kaiafa, kiene kieza Maka ma Nzambi kua Nzuá, monʼa Zakadiia, mu solongo dia muxitu.

³ Muène anga uiza mu jimbandu joso ja Njolodá ni kukola o batizu ia kudiela mu kuloloka ituxi, uixi: Ambulenu ituxi ienu, phala a mi batizale, Nzambi nda a mi loloke.

⁴ Kala kia ki soneka mu divulu dia polofeta Izaia, uixi: Dízui dia muthu u di kola mu ditutu: iudikenu njila ia Ngana, iukisenu o ikoka iê!

⁵ Jihonga joso a ji lamba, milundu iònene ni iòfele a i sengulula; jihonda a ji iukisa, mibhanga a i sokelesa;

⁶ Xitu ioso anga i mona o kubhuluka kua Nzambi.

⁷ Nzuá anga uambela kifuẋi kieza kua muène mu ku a batizala, uixi: Muiji ua nhoka ja ísueia! Nanhi ua mi tendelela kulenga o njinda ia Nzambi ia-ndu kuiza-ku?

⁸ Imenu-phe ibundu ia fuama i tunda mu kudiela. Ki mu kale mu kuila ku miẋima ienu, muexi: Etu tuala ni tatʼetu Mbalahamu. Mbata Eme ngi mi ambela kuma, Nzambi u tena kutundisa mu matadiʼama anʼa Mbalahamu!

⁹ O kisèsu ue, kia kukoka na-kiu, kiòte kiá bhu jindanji ja mixi. Muxi uoso u kamba kuima ibundu iambote, a u koka, hé a u ta mu túbhia.

¹⁰ O kifuẋi anga ki kala ku mu ibhudisa, exi: Tu bhanga-phe kiebhi?

¹¹ Muène uenda ni ku a vutuila, uixi: Uoso uala ni izuatu iiadi, a uane ni mukuâ uoso uala ni tuẋi. O uoso uala ni kúdia, a bhange kiòmuene.

¹² Anga kuiza ue akua kutambula o lubhaku, phala ku a batizala. Ene a mu ambela, exi: Mesene, etu tu bhanga kiebhi?

¹³ Muène ua ambela, uixi: Ki mu bhûnde. Inda mu tambula ngó kioso kia mi xindi mu Kitumu.

¹⁴ Masoladi anga a mu ibhudisa ue, exi: Etu uetu, tu bhanga kiebhi? Muène uixi: Ki mu bhange kusuina; ki mu die mangonha mu kutambula kitadi kia muthu uoso-uoso ni ku mu tatela. Kitadi kienu kiene ku mi futa, ki mi soke.

¹⁵ O kifuẋi kioso hé ki kala mu kudielela dingi kiavulu. Ene oso ia banza Nzuá ku miẋima iâ, mba muène Kristu.

¹⁶ Nzuá hé u a vutuila osomuene, uixi: eme nga mi batizala ni menha, maji kù kuiza muthu ua ngi tundu, eme ki nga fuama ku mu jituina ngó o ngoji ia haii iê. Muène u mi batizala ni Nzumbi Ikôla ni túbhia.

¹⁷ Muène, mbangu iê ua i kuata bhu maku phala kusèsa o jimbutu mu ibhiate. O dikanga diê dia kuvundila, u di zelesa kiambote. O mbutu u i bhongoluela mu kinganja kiê, o ibhiate-phe u ioha mu túbhia ki tu xikina dingi kujima.

¹⁸ Nzuá anga u kala mù longa o kifuẋi maka ma mukuâ mavulu, mu ku a tudila o Njimbu Iambote.

¹⁹ Helode-phe, dia sobha, ki a mu bazela, mukonda dia kusakana ni Helodiia, mukaji a phangʼ iê Felipe, ni ima iamukuá dingi iaiibha ia kexile mù bhanga,

²⁰ Helode ku ikuma iê ioso ua bandekeza-ku dingi kia mukuá kia ku ta Nzuá mu ʼaleia.

Jezú a mu batizala

²¹ Anga ki bhita kuma, kia zubha athu oso ku a batizala, Jezú ue a mu batizala. O kia-bhu ku mu batizala, kioso kiala mù samba, diulu di jikuka.

²² O Nzumbi Ikôla anga u tuluka mu kikexilu kia mukutu, ua difangana diembe, anga u tula ku thandu diê. Ku diulu anga ku tunda dízui, dixi: Eiemuène u Monʼami nga ku zola, ua ngi uabhela kiambote.

O muiji ua Jezú

²³ Jezú muène, kia mateka kulonga, kífua kala uala mu makuinhi-a-tatu a mivu. O muène, kia fika athu, monʼa Zuze; Zuze dia Heli;

²⁴ Heli dia Mathatha, dia Levi, dia Meleki, dia Janai, dia Zuze;

²⁵ Dia Matatiia, dia Amoji, dia Nahumu, dia Eseli, dia Nangai;

²⁶ Dia Mahate, dia Matatiia, dia Semei, dia Joseke, dia Joda;

²⁷ Dia Nzuana, dia Lesa, dia Zolobabele, dia Salatiiele, dia Nedi;

²⁸ Dia Meleke, dia Hadi, dia Kosame, dia Elemada, dia Hele;

²⁹ Dia Josuué, dia Eliiezele, dia Jodime, dia Mathatha, dia Levi;

³⁰ Dia Ximinhá dia Juda, dia Zuze, dia Jonamo, dia Eliiakime;

³¹ Dia Meleia, dia Mena, dia Mathatha, dia Natane, dia Davidi;

³² Dia Jese, dia Obede, dia Bozo, dia Salumone, dia Nasono;

³³ Dia Aminadabe, dia Adime, dia Alane, dia Hezelone, dia Peleji, dia Juda;

³⁴ Dia Jakobo, dia Izake, dia Mbalahamu, dia Tela, dia Naholo;

³⁵ Dia Saluku, dia Langau, dia Faleke, dia Hebele, dia Sala;

³⁶ Dia Kainane, dia Alufaxadi, dia Seme, dia Noué, dia Lameke;

³⁷ Dia Matúzala, dia Enoko, dia Jalede, dia Mahalalele, dia Kainane;

³⁸ Dia Eno, dia Sete, dia Adá, Adá dia Nzambi.