Luka 24 - O Mikanda Ikola

Jezú u fukunuka

¹ Kia lumingu-phe, o kizuua kiadianga kia semana, mu kafukufuku, eza bhu mbila mù bheka o ima ia mazumba ia iudika.

² Anga a sanga ditadi diòkundumune kiá, dia xitile ku mbila.

³ Anga a bokona, o mukutu-phe ua Ngana Jezú ka u sange-mu.

⁴ Bhenhobho-phe, ni kia kuxinganeka ka ki mono! O kioso kia bhuuama mukonda dia kienhiki, a tukumuka mala kiiadi emana bhu mbandu iâ, o izuatu iâ i benha.

⁵ O ahatu anga a kala ni uôma, hé a bhetama jipholo bhoxi. Mala iá-phe a ambela, exi: Mua-lu sotela-hi o muthu ua muenhu, mu ʼaxaxe ka afi?

⁶ Muène kala dingi bhabha, ua fukunuka! Lembalalenu kia mi ambelele Muène, kia kexile hanji mu Ngalileia, uixi:

⁷ Monʼ a Muthu ua bhingi ku mu thelekala bhu maku ma akua ituxi, ni ku mu phaphela ku dikulusu, ni kufukunuka mu kizuua kia katatu.

⁸ Bhenhobho ahatu anga a lembalala o maka mê.

⁹ Anga a tunda bhu mbila, eza ku kuinhi dia xibulu ni imoxi, ni akuâ ene oso, hé a a tangela ima ioso iíi.

¹⁰ Ahatu a mono o imʼiíi, Madiia dia Manda, ni Nzuana, ni Madiia manhiʼ a Tiiaku. Enhá ni ahatu amukuá aia-nâ kumoxi, ene a tangela o jipoxolo imʼiíi.

¹¹ Ene-phe, makʼ ama, a ma fika kuma masambi-sambi, ka ma xikana. [

¹² Phetele-phe u balumuka, hé uia ni kulenga katé bhu mbila. Anga u bhetama, u zongola mu mbila, u mona ngó o malasola ma xala bhoxi, anga u vutuka ku bhata, ua diuana kioso kia bhiti.]

Mu njila ia Emaú

¹³ Kizuua kieneʼokio, xibulu jiiadi ji kala mu kuia ku sanzala a ixana Emaú. Dikanga diê, kutunda mu Jeluzaleme, makuinhi-a-samanu a jitádiu, (kuinhi dia Kilómetulu).

¹⁴ Mu njila anga a kala mu ku di kunda maka ma ima ioso iíi ia bhiti.

¹⁵ Kioso-phe ki ala ku di kunda, ni ku dibhudisa, Jezú muène u a zukama, hé u kala mù kuendela-nâ kumoxi.

¹⁶ Ene-phe a mu monuʼâ muene, maji o mesu mâ mòxite hanji phala ka mu ijiie.

¹⁷ Jezú muene ua ebhudisa, uixi: Maka mahiʼ ama, u muala kuia ni ku di kunda mu njila? Ene anga emana, a di suuata o jipholo.

¹⁸ Mukuá dijina diê Keleiofa, u mu kumbulula, uixi: Kífua eie-muène ngó ubheka ué, ua-lu nhungana mu Jeluzaleme, ua kambe o kuijiia ima ia bhitila-mu mu izuua ienhiíʼii?

¹⁹ Muène uixi: Ima iahi? Ene a mu ambela, exi: Ima ia tokala kua Jezú dia mukua Nazalé. Muthu ió ua kexile polofeta i kôla ni mu ikalakalu, ni mu maka, bhu pholo ia Nzambi, ni bhu pholo ia mundu.

²⁰ Ni kioso kia mu bhange o makota ma jinganga, ni jixefe jetu, a mu thelekala phala ku mu jibha, iá a mu phaphela ku dikulusu.

²¹ Etu-phe tua kexi ku dielela tuixi, Muène kiá ua-ndu bhandulula o mundu uetu ua Izalaiele! Euá, ima ioso iíi, lelu tatu kizuua tunde ki ia bhiti.

²² Kua dite dingi ahatu amoxi mudietu, a tu di uanesa, kuma a di menekene bhu mbila;

²³ maji ka sangele mukutu uê, a vutuka ni kuzuela kuma, bhua a tukulukila jianju jedi kuma muène uala ni muenhu.

²⁴ Athu amukuá mudietu ue, ele bhu mbila, a sange kuila kidi kia zuela o ahatu. Maji Jezú muène-phe ka mu mono.

²⁵ Muène anga ua ambela, uixi: Enu tata, mua xiti kinène mu thulu, enu mua kokoloka muẋima mu kuxikana ima ioso ia zuela o misèsedi!

²⁶ Kifua ki kia tokalele muene kuila Kristu nʼa bhite ni jingonjuʼojo, ni a tambule kiua o Ungana uê uoso kua Nzambi?

²⁷ Anga ua andekela ku madivulu a Mozé, hé u bhita mu madivulu a jipolofeta joso, ni ku a jimbuila ima ioso iòsoneke mu Mikanda Ikôla ia Nzambi, ia mu tokalele muène.

²⁸ Anga a zukama bhu sanzala bhu ala kuia; Jezú muène anga uila kala ua-nda kusomboka.

²⁹ Ene-phe a mu jijila, exi: Xala bhabha ni etu; mukonda ngoloxi ieza, o kumbi dia lèmbe kiá. Muène anga u bokona phala kuxala-nâ.

³⁰ Kia zubha-phe kuxikama ni ene ku meza, muène u tambula o mbolo, hé u sakidila Nzambi. Anga u i bukula, u a bhana-iu.

³¹ Bhenhobho mesu mâ anga ma jikuka, a mu ijiia kuila Jezú. Muène-phe anga u jimuka ku mesu mâ.

³² Anga a di ambela mudiâ, exi: Manhi kiene o miẋima ki ia kexile mu ku tu lema moxi, muène kia kexi ku tu zuelesa mu njila, ni ku tu jimbuila o maka mòsoneke mu Mikanda ia Ngana?!

³³ Anga a balumuka mu ola ienhoio, a vutuka ku Jeluzaleme, hé a sanga o kuinhi dia xibulu ni imoxi a bhongoloka, ni amukuá aia-nâ kumoxi, ala mù zuela, exi:

³⁴ Kidi kiene, Ngana ua fukunuka! Ua tukulukila Ximá!

³⁵ Ene ua anga a a kundila ioso ia bhiti na-iu mu njila, ni kioso ene Ngana Jezú kia mu ijidila mu kubukula o mbolo.

Jezú u tukulukila bhuʼ axaxe ka Jixibulu

³⁶ Ene kioso ki ala mù zuela kiki, Jezú muène u tukulukila bhu ʼaxaxi-kâ, anga ua ambela, uixi: O uembu u kale ni enu.

³⁷ Ene-phe, ni kimbuua, ni kisasu, a fika kuma nzumbi ia mono.

³⁸ Jezú anga ua ambela, uixi: Mukonda diahi, mua sasumuka? Mu kuatela-hi jiphata, mu miẋima ienu?

³⁹ Talenu maku mami ni inama, kuma eme-muène, muene. Ngi babatienu, nda mu mone, phala mu xikane. Kuma o nzumbi ki i kala ni xitu ni ifuba, kala ki muala kumona eme ngala na-iu.

⁴⁰ [Kia zuela kiki, ua edikiza o maku-mê ni inama.]

⁴¹ Ene-phe ki edi hanji ala ni jiphata, mukonda dia madiuanu ni kisambu, muène ua ambela, uixi: Muala-bhu ni kakúdia?

⁴² Anga a mu bhana kiẋimbu kia mbiji iozuze, ni kisela kia uiki.

⁴³ Anga u i tambula, anga u dia bhu pholo iâ.

⁴⁴ Anga ua ambela, uixi: Ene o makʼ ami u nga mi ambelele ki nga kexile hanji ni enu, kuma ima ioso ia bhingi i bhita, iòsoneke mu Kitumu kia Mozé, ni mu madivulu a Jipolofeta, ni mu Jisalamu, ia ngi tokala eme.

⁴⁵ Bhenhobho anga u a jikula o ilunji, mu kutetulukila o kuívua kiambote o Madivulu a Ngana, uixi:

⁴⁶ Kiene kia soneka, kuma Kristu u tokala u bhita mu jiphaxi, hé u fukunuka ku ʼalunga mu kizuua kia katatu.

⁴⁷ Ni kuila ue o Njimbu ia kudiela o ituxi, ni ku i tambuila o muloloko, a i fumanese mu dijina diê mu jixi joso, tunde kiá mu Jeluzaleme.

⁴⁸ Enu-phe mu jimbangi ja ima ienhiʼii.

⁴⁹ Talenu, nga-nda ku mi tumikisa o kikanenu kia Tata. Xikamenu-phe mu mbanza mumu, katé kia mi zuika ni nguzu i tunda bhulu.

Jezú u banda bhulu

⁵⁰ Jezú anga u tunda-nâ ku kanga, hé aia katé bhua lulama bhu Betanha. Bhenhobho anga u zangula maku mê, ua a benzela.

⁵¹ Kiene-phe ki ala mu ku a benzelʼ iki, u songoloka bhu mbandu iâ, anga a mu zangula katé ku diulu.

⁵² Ene anga a mu bheza, hé a vutuka mu Jeluzaleme ni kusanguluka kuavulu.

⁵³ Anga a kala jinga izuua ioso mu Tembulu mu kuximana Nzambi.