Luka 22 - O Mikanda Ikola

O kikutu kia ufe

¹ Kienhókio o Fesa ia Jimbolo ja kamba kithûthume, a ixana ue Phasu, ia zukama.

² O makota ma jinganga, ni asoneki, anga a kala mù sota ndunge ia kujibha Jezú, mukonda ala ni uôma ua mundu.

O ufe ua Juda dia mukua Kadiota

³ Satana anga u bokona mu mukutu ua Juda, a mu ixana mukua Kadiota, ua tokala mu kuinhi ni kiiadi.

⁴ Bhenhobho Juda anga uia, u zuela ni makota ma jinganga ni ji kabhitangu, kioso kia tena kubhana Jezú bhu maku mâ.

⁵ Ene anga a sanguluka, hé ata-nê kikutu kia ku mu bhana kitadi.

⁶ Juda muene u xikana, anga u kala mù sota o kithangana kia ku mu bhakula sé kavanza.

O Phasu iasuku-ku

⁷ Anga kizuua kia Fesa ia Jimbolo ja Kamba Kithûthume ki bhixila. Kioso o Jijudé kia kexile mu kujibha o tumbudi tua kuimununa o Phasu,

⁸ Jezú anga u tuma Phetele ni Nzuá, uixi: Ndenu kà iudikienu o Phasu nda tu i die.

⁹ Ene a mu ibhudisa, exi: Uandala tu i iudikila kuebhi?

¹⁰ Muène ua ambela, uixi: Ki muandu bokona mu mbanza, mua kà takana ni diiala uambata disanga dia menha. Muenhó muène mu mu kaiela katé mʼonzo muoso mua kà bokona.

¹¹ Enu anga mua kʼambela mukua ʼnzu iê, muixi: Mesene ua tumu ku kuambela, kuila; Inzu ia usonhi iebhi? Ngi dile-mu o Phasu ni jixibulu jami.

¹² Muène-phe ua kà mʼidikisa sala iònene, ia thandu, muòiudike kiá. Mua kà i bhangela muenhomo.

¹³ Ene anga aia mu mbonge, a sanga kioso kia ambelele Muène. Kienhókio anga a iudika o Phasu.

O seialu ia Ngana

¹⁴ Kutula bhu ola Jezú u xikama ku meza, kumoxi ni Jipoxolo.

¹⁵ Anga ua ambela, uixi: Nga Seme ni vondadi iavulu kúdia o Phasu iíi ni enu, kiosuʼ iki kiluua ngi mateka kubhita ni jingongo ji nga-nda kumona!

¹⁶ Mukonda ngi mi ambela kuila, o Seialu ia Phasu ki nga-nda ku i dia dingi, katé kia i kumbidila mu Utuminu ua Nzambi.

¹⁷ Anga u tambula o kopho, o kia zubha kusakidila Nzambi, uixi: Tambulenu iíi, mu i uane mudienu.

¹⁸ Mukonda eme ngi mi ambela: Tunde lelu, eme ki ngi-nu dingi ku ibundu ia muvide, katé kʼiza o Utuminu ua Nzambi.

¹⁹ Anga u katula o mbolo, u sakidila Nzambi, anga u i uana, u i bhana o maxibulu, uixi: Iú uene o mukutu uami, [uòbhane mukonda dienu. Bhangenu jinga kienhiki mu ku ngi banza eme.

²⁰ Ni kopho ue kiene kimoxi, kia zubha o kuseiala, uixi: Dikáu didi, kiene o Kikutu kiòbhe bhukaẋi ka Nzambi ni athu, kiòkolese ni manhinga mami, manda kubhubha mukonda dienu.]

²¹ Talenu-phe, lúkuaku lua ió uoso ua-nda ku ngi bhana ku jinguma, luala kumoxi ni eme ku meza!

²² Kuma o Monʼ a Muthu iu uʼió mu kúfua kala kia mu lekelela Nzambi. Muthu ió-phe lamba diê, uoso ua-ndu mu bhana ku jinguma!

²³ Anga a kuata ku dʼibhudisa, mba mukua-hi mudiâ ua-ndu bhanga kiki.

Dikota a di bhange ndenge

²⁴ Maxibulu anga a kuata phata ia dikota mudiâ, mba nanhi ua tokala kukala o dikota.

²⁵ Jezú anga ua ambela, uixi: Jisobha ja matumbu, ku mundu iú, jene mu ku a bhikisa; oso jinguvulu, a a tumina a ela, exi: Abhanduludi a Ifuẋi.

²⁶ Enu-phe mudienu, ki kiene ki ki kala. Mudienu uoso ua beta o ukota, a kale kala muène o ndenge; o uoso u tumina, a kale kala muène ala ku mu tumina.

²⁷ Mukonda nanhi ua beta o ukota? Iú ua xikama ku meza, inga iú ua mu xibhidila? Ua xikama ku meza, ki muène kota? Eme-phe ngala mu ʼaxaxe kenu, kala muthu ua kuxibhidila.

²⁸ Enu-phe, enʼuenu mua xala ni eme mu kuxikamena o jiphaxi jami.

²⁹ Mu kienhiki, nga mi bhana o ungana ua kutumina, kala eme ue kia ngi bhana-u Tata iami.

³⁰ Phala enu uenu mu-die, mu-nue, ku meza mami mu Utuminu uami, hé mua kà xikama ue ku iandu, phala mu fundise o kuinhi dia miji ni iiadi ia Izalaiele.

Phetele a mu dimuna

³¹ Ngana uixi dingi: Ximá, Ximá, ivua kiambote: Satana ua mi binghi mbé ni a mi lole. Muène ua-nda ku mi bhiata mukuâ ni kidimakaji kia bhiata o tiliku mu ku i uanununa ni ibhiate.

³² Eme-phe nga ku diondela, Ximá, phala o kuxikana kué ki kúbhue ni ku lémbue. Eie-phe, hinu ki u vutuka dingi kokuami, kolokotesa jiphange jé.

³³ Phetele-phe, uixi: Ngana, eme ngala polondo kuia ni eie, ni mu, aleia, ni ku ʼalunga.

³⁴ Jezú u mu vutuila, uixi: Ngi kuambela, Phetele, kuma lelu muene o dikolombolo ki dia-ndu kokola, katé eie ua ngi di tunu lutatu, kuma kua ngʼijiia.

O xibhata, o mbuenge, ni muxila

³⁵ Kienhókio Jezú uixi dingi: Eme ki nga mi katuile sé hutu, sé mbuenge, sé jisabhatu, mua tatele ni kima? Exi; Kana.

³⁶ Muène-phe ua ambela, uixi: Kikiphe uoso uala ni hutu ni mbuenge ue, a i ambate. O uoso ue ua kambe o mukuale, a sumbise o dibeka diê ni a u sumbe.

³⁷ Mukonda ngi mi ambela, kima kiosonekeʼ okio mu Mikanda Ikôla, kia bhingi ki bhita muene, kuma exi: Muène a mu bundu kumoxi ni ingumba. Eme-phe, ngi mi ambela kuma, ima ioso iíi ia bhingi ngi bhita na-iu, mbata iene ioso ia ngi tokala, iòsoneke, ia-nda ku di kumbidila.

³⁸ Maxibulu mê, exi: Ngana, jixibhata jiiadi jiji. Uixi: Kuabhu!

Jezú mu Ngetesemane

³⁹ Jezú anga u tunda, uia ku mulundu ua Midiva, kala kiene kubhanga. O jixibulu ue ja mu kaiela.

⁴⁰ Kia zubha ku bhixila bhu kididi kia solo, ua ambela, uixi: Sambenu, phala ki mu di bhale mu tendasá.

⁴¹ Anga u axa kadikanga ngó ka kuila ditadi u di takula-bhu. U fukama, anga u kala mù samba, uixi:

⁴² Tata, eie se ua ki andala, dikáu dia phaxi dienhidi, ngi katule-diu. Maji-phe ki ngindi kuamba o vondadi iami iene i bhita, ki kale ngó o vondadi ié. [

⁴³ Anga bhu mu tukulukila anju ia tundu mu diulu, hé i mu suinisa.

⁴⁴ Malamba mê anga u kumbama na-u, anga u samba dingi ni nguzu. O suualu iê anga i biluka kala matoxi ma makota ma manhinga, ma-la kuenda ni kumbomba bhoxi.]

⁴⁵ O kia balumuka mu kusamba, uiza bhuala o jixibulu, u a sanga aii ku kilu ni mukondo uònene, anga ua ambela, uixi:

⁴⁶ Enu-phe mua zekela-hi? Balumukenu, mu sambe, phala ki mu di bhale mu tendasá.

Jezú a mu kuta

⁴⁷ Jezú muène kia kexi hanji mù zuela, bhenhabha bhu tukuluka kifuẋi kia athu, ni xibulu iê imoxi a mu ixana Juda, ua a tuamenena. Juda muenhú, umoxi ku kuinhi ni kiiadi, anga u zukama kua Jezú phala ku mu bejala.

⁴⁸ Jezú-phe, u muambela, uixi: Juda, kífua Monʼa Muthu u mu bhakula ni beju?

⁴⁹ Maxibulu ala kumoxi ni Jezú, kia mono kia-nda ku mu bhanga, exi: Ngana, o iá tu a kaia ni jixibhata jetu?

⁵⁰ Xibulu imoxi anga u kuama mubhika ua dikota dia jinganga, u mu batula o dítui dia kadilu.

⁵¹ Maji Jezú ua a vutuila, uixi: Ambulenu, kuabhu! Anga u babata o dítui dia diialʼodio, hé u mu ilula.

⁵² Jezú anga u ambela o makota ma jinganga, ni ji kabhitangu ja pudíxa ia Tembulu, ni adiakime a Jijudé, eza ku mu kuata, uixi: Kifua enu mua tundu ni jixibhata ni jihunha phala ku ngi kuata kala ngi kifumbe?

⁵³ Izuua ioso, eme i nga kexile kumoxi ni enu mu Tembulu, enu ki mu ngi tula maku. Maji o didi, kumbi dienu kiá, ni dia kusuina kua kitombe.

Jezú a mu kuika. Phetele u di tuna Jezú

⁵⁴ Jezú anga a mu kuika, hé aia-nê, a mu bheka ku onzo ia dikota dia jinganga. Phetele anga u kaiela, ua xala dikanga ku dima.

⁵⁵ O kia uika túbhia mu ʼaxaxi ka lumbu, anga enhoso a xikama kumoxi mu kuota, Phetele ue u xikama-nâ.

⁵⁶ Anga bhu kala kahatu ka mu mono, ua xikama bhu túbhia, anga u mu tonginina kiambote, ua muixi sûi, uixi: Muenhú ue ua kexile mú kuenda ni Jezú.

⁵⁷ Phetele anga u di tuna, uixi: Muenió, eme ki nga muijiia, muhatu-a kime!

⁵⁸ Kubhanga kithangana, diiala dimoxi ue ua mu mono, uixi: Eie ue ua tokala-nâ. Phetele uixi: Èhé, ialʼé! Eme ki ngi tokala mudiâ.

⁵⁹ Ki bhua bhiti dingi ola, muthu uamukuá u jijila dingi ku ki zuela, uixi: Kidi muene! Muenhú ua kexile-nê, mukonda mukua Ngalileia.

⁶⁰ Phetele-phe, uixi: Èhé! Eie ialʼé, eme ki nga kʼijiia kioso ki ua mu zuela! Kindala kienhokio-phe, kioso ki ala hanji mú zuela, dikolombolo di kokola.

⁶¹ Bhenhobho Ngana anga u biluka, hé u ta mesu kua Phetele ni ku mu tonginina. Phetele anga u lembalala o maka ma Jezú, kia mu ambela, uixi: Dikolombolo ki dia-ndu kokola lelu, katé eie ua ngi di tunu lutatu.

⁶² Bhenhobho Phetele anga u tunda bhu kanga, hé u ẋikujuka ni kudila.

Jezú a mu beta

⁶³ Mala iá a kuata Jezú, anga a kala ku mu bhanga kasèkelu, a mu beta.

⁶⁴ Anga a mu futa o mesu, a mu ibhula, exi: Sakela, mba mukua-hi ua ku beta.

⁶⁵ Anga a mu âmba dingi ima iavulu ia malebhu.

Jezú bhu pholo ia Kionge kia Jitata

⁶⁶ Ki kuákie-phe, o Kionge kia jitata joso ja mundu ki bhongoloka, ni makota ma jinganga, ni asoneki, muène anga a tuma ku mu bheka bhu ʼaxaxe-kâ.

⁶⁷ Anga a mu ibhula, exi: Se eie-muène u Kristu, tu ambele. Muène-phe ua ambela, uixi: Né nga mi ambela, kuila eme-muène, enu ki mu xikina.

⁶⁸ Se ngi mʼibhudisa, ki mu xikina ku ngi vutuila, mba mu ngi jituna.

⁶⁹ Maji tunde lelu kiá, Monʼ a Muthu ua-ndu xikama ku madilu ma Nzambi Uatena Ioso.

⁷⁰ Bhenhobho anga ene oso muene a zuela, exi: Mbebhu eie u Monʼa Nzambi muene? Muène ua ambela, uixi: Kidi kiene, enuʼenu mua ki tange.

⁷¹ Ene anga exi: Umbangi uahi dingi, u tua bhindamena? Etu-ene tua kivu mu kanu diê!