Luka 20 - O Mikanda Ikola

Jezú a mu ibhula kuoso kuatundu o kutena kuê. O batizu ia Nzuá

¹ Kizuua kia mukuá mu izuua muenhomo, kioso ki ala Jezú mù longa athu mu Tembulu, ni ku a tangela o Njimbu Iambote, makota ma jinganga ma tukulukila-bhu ni jimesene ja kulonga o kitumu, ni adiakime ku mundu.

² Anga a mu zuelesa, exi: Tu ambele hanji; eie kijingu kiahi ki uala na-kiu, mu kubhangesa o im ʼiii? Nanhi ua ku bhana o kijingu kienhiki?

³ Muène ua a kumbulula ue, uixi: Eme uami ngi mʼ ibhula kima kimoxi. Ngʼ ambedienu hanji:

⁴ O batizu ia Nzuá ia tundile ku diulu kua Nzambi, inga ku athu?

⁵ Ene anga a kala mù xinganeka moxi diâ exi: Tua-nda ku mu vutuila kiebhi? Se tuila kuma: Kua Nzambi ku diulu; muène uanda kuila: Enu-phe Nzuá mua kambela-hi ku mu xikana?

⁶ Se tuila tuexi: Athu a mu bhele o ukota ua ku batizala, o mundu iú a tu ta matadi; mukonda ene a xikana kuma Nzuá polofeta.

⁷ Anga a vutula, exi: Ki tuejiia uoso ua tumine Nzuá kubatizala.

⁸ Bhenhobho Jezú ua ambela, uixi: Eme uami nga di tunu ku mi tangela kuoso kua tundu o kijingu kioso ki ngala na-kiu, kia kubhanga o imʼ iii.

O kifika kia idimakaji iaiibha

⁹ Anga Jezú u kala mù tela o mundu kifika kiki, uixi: Sai muthu ua dimine dibhia dia ji-uva, anga u di bhana ku idimakaji enda ni ku mu bhakuila; muène anga uia oxi iengi mù bhanga kithangana kiavulu.

¹⁰ Mu izuua ia kubhongolola, anga u tumikisa mubhika ku idimakaji, phala a mu bhane o mbandu iê ku idima ia tundu mu díbhia. Maji o idimakaji-phe i mu beta, hé i mu kaia ni maku a hatu.

¹¹ Anga u tuma-ku mubhika uamukuá. Ene-phe a mu beta ue, a mu bhanga ufusa, hé a mu kaia ni maku a hatu.

¹² Anga u tuma-ku dingi ua katatu. Maji muène ue a mu kuama, anga a mu kaia.

¹³ Ngana ia díbhia diê, anga uzuela, uixi: Ngi bhanga kiebhi? Ngi tuma-ku kiá monʼ ami ua kazola. Nga ki dielela kuila muéne a mu xila.

¹⁴ Idimakaji-phe kia mu mono, a di longesa mudiâ, exi: Iú muène kiá o monʼa ngana ia díbhia. Muène o mulundudi. Tu mu jibienu, undu-ndu uê ua díbhia u kale uetu.

¹⁵ Anga a mu tubhula mu díbhia, hé a mu jibha. O kiki, mukua-díbhia, uanda ku a bhanga kiebhi?

¹⁶ Ua-nda kuiza mu ku buidisa o idimakaji ieneʼoio ni a bhane díbhia ku athu engi. Ene ki evu kiki, exi: Ai-uê! Thamanu ki ki bhite.

¹⁷ Muène-phe u a tala kiambote suí uixi: Makʼ ama-phe a a soneka kiebhi mu Mikanda Ikôla kuila: Ditadi dia di tunu o jimesene diene dia kuatesa bhu thungi?

¹⁸ Uoso u laukila ku thanduʼ a ditadi didi, u bukujuka. O uoso-phe di mu lundumukina muène, di mu bhanga fufutila.

Sézalu o kiê, Nzambi o kiê

¹⁹ O jimesene ja kulonga o Kitumu ni makota ma jinganga, anga a sota ku mu ta maku kumbi dienhódio, maji ala ni uôma ua mundu, mukonda a mono kuma kifika kiki ua a tela-kiu ene.

²⁰ Anga a kala ku mu batamena, hé a tuma-ku jiphombi ja futila kitadi, ja di fikisa kala athu aiuka, phala ku mu kuatela mu kuzuela kuê, ni a mu bhane ni mulonga kua nguvulu.

²¹ Anga phombi jenhiji jiza, ji mu ibhudisa, jexi: Mesene, tuejiia kuma Eie o ima i u zuela, i u longa, ia kidi. Tuejiia ue kuila ku suu jipholo ja athu, maji u longa o njila ia Nzambi ku athu ni ku a londekeza o vondadi iê mu kidi.

²² O kiki, tu tangele: Kala ki ala mu Kitumu kietu, tua tokala tu bhana o lubhaku kua Sézalu dia mukua Loma, inga Kana?

²³ Jezú-phe ua mono o ndunge iâ, anga ua ambela, uixi: Ngi bhekedienu hanji denádia.

²⁴ O kídifua kiki, ni kusoneka kuku kuala-ku, kua nanhi? Exi: Kua Sézalu.

²⁵ Anga ua ambela, uixi: Sézalu-phe mu bhakuidienu ima iangene ia Sézalu, o Nzambi, ima iangene ia Nzambi.

²⁶ Ene bhenhobho ka tena kukuata o kizuelu kiê bhu pholo ia athu. Anga a mu diuana kia vutula, hé a di xibha.

O phata ia sambuadi dia sakana o muhatu umoxi

²⁷ Amoxi ku jisaduseu, ió a fika kuma ki kuala kufukunuka, a mu kana bhenhobho, há

²⁸ a mu ibhudisa, exi: Mesene, Mozé ua tu sonekena, iu ua tu xila o kijila kuma: Diiala se diafu, iu uaxi muhatu, maji ka moneka mona, phangʼ iê ia diiala, a tambule o muhatu, a sokolole jíndunda ja phangʼiê.

²⁹ Kua kexile-phe sambuadi dia phange, mala oso. O dikota anga u sakana muhatu, hé ufua sé ku-xa mona.

³⁰ O kaiadi anga u mu sakana.

³¹ Ni katatu, ni sambuadi dioso kiómuene, áfua, ki bhuala muthu ua-xi-nê mona.

³² Ku pholo kunu, ni muhatu muène ue uáfu.

³³ O kiki-phe, mu kufukunuka, o muhatu uà kala muhatu a nanhi? Kuma sambuadi dioso dia mu sakanene?

³⁴ Jezú ua ambela, uixi: Anʼa kikexilu kiki kia ngongo, a sakana ni mala ni ahatu.

³⁵ Oso-phe a kà fuama mu kikexilu kiókio kia diulu, ni mu kufukunuka kua afi, kà sakana dingi, né mala, né ahatu.

³⁶ Ka tena dingi ue kúfua, a kà kala mukuâ ni ji-anju. A kala anʼa Nzambi, mukonda anʼ a difukunukinu.

³⁷ O kuila athu afu a kà fukunuka, ni Mozé ue ua kʼidikiza kiambote mu maka ma kisasa kia uama, bhu exanene Ngana, uixi: Nzambi ia Mbalahamu, Nzambi ia Izake, Nzambi ia Jakobo.

³⁸ O Mozé mu kuzuela kiki, uambe kuila o Nzambi-phe ki Nzambi ia afi, maji Nzambi ia athu a muenhu. Mukonda ene oso muene, ku mesu ma Nzambi, iá-uâ ni muenhu.

³⁹ Amoxi ku asoneki, anga a mu kumbulula, exi: Mesene, ua vutula kiambote!

⁴⁰ Bhenhobho ka bhumina dingi ku mu ibhudisa kima kioso-kioso.

Kristu monʼ a Davidi

⁴¹ Jezú muène anga ua ebhudisa, uixi: Ala kuzuela kiebhi, kuma Kristu monʼa Davidi?

⁴² Mukonda o Davidi muène, mu divulu dia Jisálamu uambe, uixi: Ngana uambela Ngana iami, Xikama ku madilu mami,

⁴³ Katé ki ngi ku bhanga kuila o jinguma ji kala kibaka kié kia inama.

⁴⁴ Davidi kia mu ixana Nganʼiki, u kala kiebhi-phe monʼ ê?

Jezú u êlesa asoneki (jimesene ja Kitumu)

⁴⁵ Bhenhobho Jezú kioso mundu uoso ia a muívua, uambela jixibulu jê, uixi:

⁴⁶ Di langienu ni asoneki, kuma a uabhela kuenda ni izuatu ialebhelela, ni ku a menekena ni ujitu uoso bhu jisoki ni bhu itanda, bhu ezala o mundu. A sola ididi ia dianga mu jinzo ja kubhezela Nzambi, ni ididi ia ukota mu jifesa.

⁴⁷ A tobhesa atudi a ahatu anga a hábula o mabhata mâ. O mu kusueka o mangonha mâ, a bhana misambu ialebha. Enhá a-ndu beta kuêla mu kizuua kia kufundisa.