Luka 19 - O Mikanda Ikola

Jezú ni Zakeu dia mukua lubhaku

¹ Jezú anga u bokona mu Jedikó, u kangeleka o mbanza.

² Muenhomo hé mu kala diiala, mukua-itadi, dijina diê Zakeu. Muène dikota dia akua kutambula lubhaku.

³ Anga u sota kumona Jezú, se u kala kiebhi, maji ka tena, mukonda dia kifuẋi, kuma muène u buta o kitala.

⁴ Anga u lengela ku pholo, hé u sambela mu mulemba, phala ku mu mona, kuma Jezú bhene bha-nda kubhita.

⁵ Jezú-phe kia tula bhenhabha, u zambula mesu bhulu, uixi: Zakeu, lenguluka, u tuluke; mukonda nga mesena lelu kukala ku bhata dié.

⁶ Muène anga u lenguluka, u tuluka, anga u mu tambulula mʼonzo iê kiambote muene ni kusanguluka.

⁷ Ene oso-phe kia ki mono, a kala mù fueta-fueta, exi: Ialʼú uaii mù di langeka mʼ onzo ia mukua ituxi!

⁸ Bhenhobho Zakeu anga uimana bhu pholo ia Ngana, u mu ambela, uixi: Ngana, kaxaxe ka jimbongo jami, ngi ka bhana jingadiama. Se bhuala muthu nga mu-di mangonha, mu kubhana o lubhaku, ngi mu fute-kiu mu luuana.

⁹ Jezú anga u mu ambela, uixi: Lelu o kubhuluka kueza ku dibhata didi; kuma iú ue monʼ a ngene a Mbalahamu.

¹⁰ Mukonda Monʼ a Muthu ueza mu kusota ni kubhulula kioso kia jimbidila.

Kifika kia kuinhi dia abhika ni kuinhi dia saku ia kitadi

¹¹ Ene kia kala mù kuívua im, iii, Jezú muene, u ta-ku o ku a tela kifika, mukonda muène ua zukama kiá mu Jeluzaleme, mukonda ue ene a fika kuma o Utuminu ua Nzambi, ua-nda kutukuluka kiá.

¹² Jezú uixi: Sai muadiakime, monʼ a ngana, ukala mu kuia oxi ia dikanga mu kutambula usobha, phala kuiza dingi.

¹³ Anga uixana o kuinhi dia abhika a mu tokala, u a bhana kuinhi dia saku ia kitadi, uixi: Endenu ni kufuna ni kitadʼiki katé ki ngiza.

¹⁴ Maji o akua ʼxi iê-phe a mu zembe, anga a tumikisa jiphunga ku dima diê mu kuamba: Etu muthu iú nguetu-nê kukala sobha mu ku tu tumina etu.

¹⁵ Muène-phe kia zubha kuiza, kuila o usobha ua u tambula kiá, u tuma kuixana abhika ió ua a bhele o kitadi, phala kuijiia se ate na-kiu uenji uahi.

¹⁶ Ua dianga anga u tula bhu pholo iê, uixi: Ngana, saku ié ia bhange kuinhi dia saku dia mukuá.

¹⁷ Muène u mu ambela, uixi: Tana-ku! Eie u mubhika uambote! Mukonda nga ku mono ni ufiiele mu kima kiofele, ngi ku bhana kutumina kuinhi dia sanzala.

¹⁸ Kaiadi ue ueza, uixi: Ngana, saku ié i ua ngi bhele, ia bhange saku jitanu ja mukuá.

¹⁹ Ngana iê u mu ambela ue muène, uixi: Nga ku bhana ue kutumina sanzala jitanu.

²⁰ Mukuá anga uiza, uixi: Ngana, saku ié iíi, nga i lundile iòfute bhu dilesu.

²¹ Mbata nga ku kuatela uôma, mukonda eie u muthu uatema. U katula ku akuenu o kima ki kia ku tokala, u kanza bhuma kua kuinine-bhu idima.

²² Ngana iê uixi: U mubhika ua bhukumuka! Ngi ku belesela mu kanu dié muene. Eie ua ngʼijiia ngi muthu ua tèma, ngi katula ku akuetu o kima ki kia ngi tokala, ngi kanza idima bhuma ki nga kunine-bhu.

²³ Ihi-phe kia ku fudisa o kuta kitadi kiami mu bangu, o ki ngezʼiki, hé ngi ki tambula kia di vuala?

²⁴ Anga uambela iá emenabhu mbandu iê, uixi: Saku mu tambudienu-iu, mu i bhane ió uala ni dikuinhi. [

²⁵ Ene a mu ambela, exi: Ngana, ió uala kiá ni dikuinhi dia saku!]

²⁶ Muène-phe, uixi: Ngi mi ambela kuma, uoso uala ni kiavulu, muène a mu bhana dingi kia nzungule. Uoso-phe kala, katé ni kiofele kia mu xala-bhu, a mu tambula-kiu.

²⁷ Jinguma jamiʼ ojo-phe, kʼ andalele eme ni ngʼ a tumine, ngi bhekedienu-nâ bhabha, mu a jibhile bhu pholo iami!

Jezú u bokona mu Jeluzaleme ni ku mu tanesa kuma Muenexi

²⁸ Kia zubha kuzuela kiki, Jezú u tuamenena dingi mu kuia ku Jeluzaleme.

²⁹ Kia bhixila bhua zukama ni bhu Betefaji, ni bhu Betanha, ku mulundu a uixana kuma ua Midiva, u katula jixibulu jê jiiadi, uixi:

³⁰ Ndenu mu sanzala iná ku pholo. O ki mu bokona muenhomo, mua kà sanga kajumendu kôkuike, kiluua ka tulama muthu. Ka kà jitunienu, mu ngi bhekele na-ku.

³¹ Se bhu kala muthu u mi zuelesa, kuila: Mu ka jituina-hi? Mua kèla: Ngana ua ka bhindamena.

³² Enhá a a tumu, anga aia, hé a sanga kala ioso ia ambela Jezú.

³³ O kia kala mù jituna o kajumendu, oso jingana jê a ambela, exi: Kajumendu mu ka jituina-hi?

³⁴ Ene exi: Ngana ua ka bhindamena.

³⁵ Anga a ka bheka kua Jezú. Anga a takula izuatu iâ ku thandu dia kajumendu, Jezú u tulama koko.

³⁶ O Jezú ki aia ni kuenda, a mu zalela izuatu iâ mu njila.

³⁷ Kuila a zukama kiá mu Jeluzaleme, mu kukulumuka o Mulundu ua Midiva, kifuẋi kioso kia jixibulu ni mundu uavulu uala ku mu kaiela, ki kuata kusanguluka ni kuximana Nzambi ni mázui ma suina, mukonda dia ikalakalu iònene ia mono, exi:

³⁸ A taneku, muenexi ueza mu dijina dia Ngana! Uembu ku diulu, fuma mu madimbinza mònene kua Nzambi!

³⁹ Jifalizeu-phe jamukuá ja kexile mu ʼaxaxe ka kifuẋi, jʼ ambela Jezú, exi: Mesene, bazela jixibulu jé, a di xibhe!

⁴⁰ Muène anga u a vutuila, uixi: Nga mi ambela kuma, iá se a di xibha, o matadi ma di kola!

Jezú u dila mu kumona Jeluzaleme

⁴¹ Mu kuia mu kubhiẋila, u mona o mbanza, anga u i dila, uixi:

⁴² Ai-ué! Se ua kʼijidile ngó ki ualʼ okio, mu kizuua kiki, ima ia tokala ku ku bhekela o kutulukuka. Kiki-phe iòsueke ku mesu mé!

⁴³ Kuma izuua ia-ndu kuiza, jinguma ji ku kandeia jimbonge mu jimbandu, ji ku konda, ji ku xita matundilu moso,

⁴⁴ ji ku lundumuna, ni eie ni anʼé moxi dié. Bhenhabha kà kaxia-bhu ditadi ku thanduʼ a ditadi, mukonda eie ua kambele kuijiia o kithangana Nzambi kia ku zungidile, phala ku ku bhulula.

Jezú u zelesa mu Tembulu

⁴⁵ Jezú anga u bokona mu Tembulu, u kuata kukaia-mu oso ala mu kusumbisa mauenji, uixi:

⁴⁶ Kiosoneke mu Mikanda Ikôla, kuma Nzambi uambe, uixi: Inzo iami a kà ixana inzo ia ku sambela. Maji enu-phe mua i bhange ngenda ia disuamenu dia míi!

⁴⁷ Izuua ioso Jezú anga u kala mú longa mu Tembulu. Makota ma jinganga-phe, ni asoneki, ni adiakimi ku mundu, a mu kanena ku mu jibha.

⁴⁸ Maji ka mono kioso kia ki bhanga, mukonda o mundu uoso a mu nhenganana ni ku mu ívua.