Luka 17 - O Mikanda Ikola

Maka a ku bhukanesa

¹ Jezú anga uambela jixibulu jê, uixi: O ibhukanu i tesa athu ituxi, ki i kambe kuiza muene. Maji kokolo dia muthu uoso u i bheka, anga u bhangesa kuila ima iíi i bhita.

² Ki fuama o ku mu nhenga kiditadi kia ku huhila mu xingu, ni ku mu takula mu ʼalunga; kuma ki ki fuama kuila ku tuana tutu u bhangesa-ku kamoxi ngó ku di bhukana, anga u ta kituxi.

³ Di langienu! Phangʼié se ua ku te kituxi, u mu bazela. Se ua diela, u mu loloka.

⁴ Né ua ku te kituxi lusambuadi ku kizuua, anga uiza kó-kuê lusambuadi, uixi: Nga diela, u mu loloka.

O kuxikana

⁵ Jipoxolo anga jʼ ambela Ngana, exi: Tu vudise dingi o kuxikana kuetu.

⁶ Ngana uixi: Se mua kexile ni kuxikana kua soko ni lumbundu lua masangu, mueji kuambela muxi iú ua mukuzu: Tukuka bhabha, ua kà di phaphe mu ʼalunga! Uene-phe uejú mi tumaka.

Kia tokala o kubhikila

⁷ Nanhi-phe mudienu, se uala ni ngàmba iê uala mù dima, mba uala mù kuinga ibhaku, o kia-nda kutunda mu mukáu, u mu ambela uixi: Bhixila kiá, u xikame ku meza?

⁸ Ki ki xikina, lémbua! Kikale u muila: Ngi bhangele hanji kùdia, ngi Seiale, eie u di kute, u ngi xibhidile, katé ki ngi zubha kúdia ni kúnua; eie ue kiene kiua ki udia anga unua.

⁹ Manhi ngàmbʼoio u i sakidila mukonda ua bhange kioso eie ki ua mu tumu?

¹⁰ Kiene ue enu, se mua bhange kiá ima ioso ia mi tumu, mu ila kuma: Tu akalakadi a iximba! Mukonda tua bhange ngó o ima ia tu tokala o ku i bhanga.

Mukua kikunzu umoxi ngó ua sakidila

¹¹ Mu njila ia kuia ku Jeluzaleme, Jezú u bhita mu ʼaxaxi ka Samádia ni Ngalileia.

¹² O kia bokona mu sanzala ia mukuá, u takana ni kuinhi dia muthu a kate kikunzu, ene-phe emana dikanga.

¹³ Anga a zangula mázui, exi: Jezú, Mesene! Tu kuatele henda!

¹⁴ Muène kia a mono, uixi: Ndenu kà dʼ idikisienu ku jinganga, phala ene a mi kengelele kiambote. Akua kikunzu kia katuka mù kuia, o kutula mu njila, eluka.

¹⁵ Muthu umoxi, mukua Samádia, kia di mono kuma ueluka, u vutuka kua tundu, hé u kala mù ximana Nzambi ni dízui dia zangumuka.

¹⁶ Anga uiza u fukama ni pholo bhoxi, bhu inama ia Jezú, hé u mu sakidila.

¹⁷ Jezú anga u kumbulula, uixi: Abha, o dikuinhi dioso ki dieluka? O dívua-phe, dia xala kuebhi?

¹⁸ Kífua kana-bhu muthu u vutuka mù ximana Nzambi, kikale muenhú ngó mukua ʼxi iengi?

¹⁹ Anga Jezú u mu ambela, uixi: Balumuka, uié. O kuxikana kué, kuene kua ku bhana o ku di sanza.

O kuiza kua Monʼ a Muthu kua kutukumuka

²⁰ Jifalizeu anga ji mu ibhudisa, exi: O Utuminu ua Nzambi, hinu uiza kumbi diahi? Muène anga ua ambela, uixi: O Utuminu ua Nzambi, ki kima kia kuila kiza ni kumoneka ku mesu.

²¹ Kà kela, exi: Iú kuku! Mba, Iú koko! Mukonda o Utuminu ua Nzambi uala moxi dienu.

²² Anga uambela jixibulu jê, uixi: Hádia kua-nda kuiza izuua, mua kà inda ku mona kizuua kimoxi ku izuua ia Monʼa Muthu, maji ki mu i mono.

²³ A kà mi ambela, exi: Iú kuku! Mba Iú koko! Ki muie-ku, ki mua kaiele.

²⁴ Mukonda, kala o nzaji ki i telaka ku mbandu imoxi ia diulu, hé itajima katé ku mbandu iamukuá ia diulu, kiene ue kia kà kala Monʼ a Muthu mu kizuua kiê.

²⁵ Maji kua mu bhingi hanji-phe kubhita ku jiphaxi javulu, ni ku mu di tuna kuala o muiji iú ua lelu.

²⁶ Kala ki kia bhitile mu izuua ia Noué, kiene ue kia kà bhita mu izuua ia Monʼ a Muthu.

²⁷ Athu oso à kala mú kúdia, à kala mu kúnua; mala ni ahatu a sakana, a bhana mu kusakana, katé kizuua kia bokona Noué mu álaka. Anga dilúviu diza, di a buidisa ene oso.

²⁸ Kala ki kia bhitile ue mu izuua ia Lote. Athu oso a di jimbi, a-dia, a-nua, a sumba, a sumbisa, a dima, a tunga.

²⁹ O kizuua-phe kia tundile Lote mu Sodoma, ku noka túbhia ni xofidi ia diulu, hé tu a buidisa ene oso.

³⁰ Kiene kimoxi kia kà bhita mu kizuua ki tukuluka o Monʼa Muthu.

³¹ Kizuua kienhókio, uoso uala ku thandu dia ʼnzo, a lenge lusolo aie kuengi, o imbamba iê iíi mʼonzo, ka tuluke dingi mu ku i katula. O uoso uala ku mukáu, ka vutuke dingi ku dima mu kuia ku bhata.

³² Lembelalenu mukajiʼ a Lote!

³³ Uoso u sota kukondeka o muenhu uê, ua-nda ku u texi. O uoso-phe u texi o muenhu uê, ua kà u bhulula.

³⁴ Ngi mi ambela: Usuku uenhʼó kua kà kala mala aiadi a zeka hama imoxi, o iú a mu ambata, mukuá a mu-xa.

³⁵ Kua kà kala ahatu aiadi ala mú huhila kumoxi, iú a mu ambata, mukuá a muxa. [

³⁶ Kua kà kala mala aiadi ku mukáu mu kudima ku mábhia, iú a mu ambata, mukuá a mu-xa.]

³⁷ Jixibulu ji mu kumbulula, exi: Imíʼii ia-nda kubhita kuebhi, Ngana? Muène ua ambela, uixi: Bhuoso bhuala o kimbi, bhene bhu bhongoloka o jiholokoko.