Luka 16 - O Mikanda Ikola

O kimbadi kia mangonha

¹ Jezú anga uambela dingi o jixibulu jê, uixi: Bhua kexile mvuama u kala ni kimbadi kiê. Anga bhu kala ue athu, aia, hé a mu tanga kua mvuama muenhú kuma muène ua-lu zanga jimbongo jê.

² Anga u mu ixana, u mu ambela, uixi: Ngala ku kuívua kiebhi? Ima iala ku kutanga ia kidi? Bhana konda ia umbadi ué, mukonda kutena dingi kukala u kimbadi kiami.

³ Kimbadiʼokio uixi ku muẋima uê: Ngi bhanga kiebhi? Ngana iami uala ku ngi tambula o umbadi. Ki ngala ni nguzu ia kudima; o kubhinga ngó ku athu, jisonhi ji ngi kuata.

⁴ Ah! Ngejiia kiá kioso ki ngi bhanga, phala kia ngi katula o ufunu, athu a ngi tambulule ku mabhata mâ.

⁵ Anga uixana akua makongo ma muadiʼê, hé uambela iú ua dianga kuiza, uixi: Kikuẋi ki ua dievela muadiʼami?

⁶ Uixi: Hâma ia ithu ia maji. Kuala kimbadi: Tambula o mukanda ué; xikama malusolo, u soneke makuinhi atanu.

⁷ Anga uambela ua mukuá, uixi: Eie ue, kikuẋi ki ua dievela? Uixi: Midi ia izongelu ia masa. U muambela, uixi: Tambula o mukanda ué, u soneke hama-nake.

⁸ Ngana iê anga u ximana o kimbadi kia mangonha, mukonda dia kudimuka kuê. Mbata anʼa mu ngongo a beta o kudimuka mu kikexilu kiâ, anʼ a mukengeji ndenge.

⁹ Eme uami ngi mi ambela: Kuatenu makamba a tunda mu itadi ia mangonha ma mundu iú, phala ki i mi kamba, ene a mi tambulule mu mabhata mâ ma nanga.

¹⁰ Uoso u bhanga kidi mu kama kòfele, u bhanga ue kidi mu kima kiónene. O uoso u bhanga mangonha mu kama kòfele, u bhanga ue mangonha mu kima kionéne.

¹¹ Kuma enu se mua kambe kubhanga kidi mu umvuama ua mangonha ma mundu iú, nanhi u mi dielela mu umvuama ua kidi?

¹² Se mua kambe kukala mu akua kidi ku ima iangene, mukua-hi u mi bhana o kima kienu?

¹³ Kana-ku ngàmba u tena ku kalakela ngana jiiadi. Kuma u zemba ngana imoxi, hé u zola ia mukuá; mba u di tuma ni ngana imoxi, hé u tènda iamukuá. Enu uenu ki mu tena kubhikila kumoxi ni Nzambi ni Mamunu.

Jezú u tanga ima imoxi-mu

¹⁴ Jifalizeu kuma ja zola kiavulu o kitadi, a muivu kuta makʼama, anga a kala ku mu olela.

¹⁵ Jezú-phe anga ua ambela, uixi: Enuenu mu akua kudiuabhesa bhu pholo ia athu, Nzambi-phe ua mijiia o miẋima. Kuma sai ni kima a ki ximana mu ʼaxaxe ka athu, kua Nzambi-phe ufusa.

¹⁶ O Kitumu kia Mozé ni ulongelu ua jipolofeta, ua kexile kate kieza Nzuá dia Batizu. Tunde kiókio-phe o Njimbu Iambote ia Utuminu ua Nzambi ala ku i kola; kala muthu-phe kikale u ta nguzu phala kubokona-mu.

¹⁷ Ki lenguluka-phe o diulu ni oxi kubhua-ku, ki ki lenguluka kutunda kapondo ku kizuelu kimoxi ngó kia Kitumu.

¹⁸ Se diiala u senga mukajiʼê, anga u sakana muhatu uengi, uate phànda. O uoso ue u sakana muhatu a mu senge kuala munumiʼê, uate phànda.

Kifika kia Lázalu ni mvuama

¹⁹ Jezú hé ua ambela dingi, uixi: Kua kexile mukua-itadi, u zuata jinga izuatu i kusuka ni linhu ia fina, izuua ioso u kala mu kúdia kiambote muene, ni kubhanga fesa ja makota.

²⁰ Bhu kala ue ni muthu, ngadiama, uezala jifidila, dijina diê Lázalu. Muène anga aia ni ku mu zekesa bhu muelu ua mvuama.

²¹ Lázalu-phe u mesena u dia jisesekenha ja lalumuka ku meza a mukuaitadi; ni jímbua ji kala mu kuiza ku mu lesa o jifidila.

²² Ngadiamʼ iii anga i fua, anga a mu ambata kuala ji-anjo bhu jihata ja Mbalahamu, ku mbanza, ku fesa. Mvuama ue ifua, anga a mu fûnda.

²³ Ku ʼalunga ki a mu kuata o jiphaxi javulu, u zambula mesu, anga u mona Mbalahamu uala dikanga, ni Lázalu bhu jihata jê.

²⁴ Anga u di kola uixi: Tata Mbalahamu! Ngi kuatele henda! Tuma Lázalu a bondeke mútue ua mulembu uê mu menha, eze a ngi talalese bhu dimi, mukonda nga xixima kiavulu mu mulengʼumu!

²⁵ Mbalahamu ua mu kumbulula-phe, uixi: Mona, lembalala kuma ku muenhu ué, eie ua tambuile ngó jimbote, mu jimbote. O Lázalu ue ua tambuile o jiphaxi. O kiki-phe muène kunu ua tululuka, kuma ua tambula ima iosuʼiii i ua di muena; eie-phe ua xixima.

²⁶ O kia mukuá dingi, bhu kaxi ketu, ni enu ni etu, bhua bhiti kidikungu kiònéne; oso edi a tunda kunu, aia ku mualʼoko, ka tena, o ió koko, ka tena ue kutunda ku mualʼoko ni eza kunu.

²⁷ Kuala mvuama: Nga ku diondo-phe, tata Mbalahamu, tuma Lázalu ku bhata dia tatʼetu;

²⁸ mukonda ngala-ku ni jiphange jitanu. Muéne aie phala a kà a dimune, mbé keze dingi kunu, ku kididi kiki kia phaxi.

²⁹ Mbalahamu-phe, uixi: Jiphange jé ala kiá ni Mozé ni jipolofeta, mbé kuia ni ku a dimuna. A évue.

³⁰ Muène, uixi: Kana, tata Mbalahamu! Kiókio ki ki soko! Maji se ku athu à-fua, ku vutuka muthu, a xikina kudiela.

³¹ Mbalahamu u mu ambela, uixi: Kia kamba kuívua Mozé ni jipolofeta, kiene kimoxi, ka xikina, né-mbé ku athu a-fua ku vutuka muthu.