Luka 13 - O Mikanda Ikola

Akua Ngalileia a jibha kuala Pilatu, ni ià a a xina kuala o sa bhalalu ia Silôua

¹ Bhenhobho bhu bhixila athu hé a tangela Jezú o maka ma akua Ngalileia a a jibha kuala Pilatu, iú ua fungisa o manhinga mâ kumoxi ni manhinga ma jisata jâ ja satela Nzambi.

² Muène anga u vutula, uixi: Mua fika kuila o akua Ngalileia enhó, ene ngó avulu ituxi, akua Ngalileia amukuá ndenge, mukonda a bhiti ni jingonguʼojo?

³ Nga mi ambela, kana! Enu uenu se mu kamba-phe kudiela, enuʼ enu oso mua-nduʼ fua kiòmuene.

⁴ Mba o kuinhi dia muthuʼ odio ni nake, diafu ku sabhalalu ia Silôua, ki ia a lundumukina, mua fika kuma enhó a beta kutondala, akuá oso mu Jeluzaleme ndenge?

⁵ Nga mi ambela, Kana! Enu uenu se mu kamba-phe kudiela, enʼuenu oso mua-nduʼfua kiòmuene.

Kifika kia mufiku u kamba o kuima

⁶ Anga Jezú u ta kifikʼiki: Sai muthu u kala ni muxi ua jifiku uòphaphe mu dibhia diê. Anga uiza mú sota-ku jifiku, maji ka ji mono.

⁷ Anga uambela o kidimakaji kiê, uixi: Tala, mivu itatu kiá i ngene mu kuiza mu sota ibundu ku mufiku iú, maji ki nga i mono. Koka-u bhoxi! Ua xitila-hi ngó o kididi, se o uene ki ua mu kuima ibundu?

⁸ Kuala o kidimakaji: Ngana, ambula-u hanji muvu iú. Ngi u dimina mu jimbandu, ngi u ta mbosa.

⁹ Ku muvu uiza-mu, ki tu mona ua bhana ibundu, kia uabha. O ki u kamba-phe kubhana, kiene eie ngana, ki u tuma ku u kokela bhoxi.

Kia Sábhalu, Jezú u saka muhatu ua kotama

¹⁰ Jezú anga u kala mú longa mu dilombe diâ, kia Sábhalu.

¹¹ Anga bhu kala muhatu a mu katesa kuala nzumbi mu kuinhi dia muvu ni nake. O ki enda, u kala ua kotama, katena ngó kubhetuka.

¹² Jezú kia mu mono, u mu ixana, hé u mu ambela, uixi: Muhatu, nga ku jituna ku uhaxi ué.

¹³ Anga u mu tula maku ku mukutu, kithanganʼokio, anga u iuka, hé u kala mu ximana Nzambi.

¹⁴ Dikota dia dilombe-phe, u futuluka, mukonda Jezú ua sake kia Sábhalu. Anga uambela o kifuẋi, uixi: Sai izuua isamanu ia tokala o kukalakala. Iene izuua i muiza jinga, nʼa mi sake. Mu kizuua kia Sábhalu, kana.

¹⁵ Ngana-phe ua mu kumbulula, uixi: Mu akua makutu! Manhi bhuala muthu mudienu u kamba kujituna o ngombe iê, mba bulu iê mu kibhanga, ni a i bheke mu kunua?

¹⁶ O muhatu iú-phe, monʼ angene a Mbalahamu, a mu kuika kuala Satana mu kuinhi dia muvu diosuʼidi ni nake, kifua ki kia fuama ku mu jituna bhu mikolo ue, kizuua kia Sábhalu?

¹⁷ Muène kia zuela kiki, jinguma jê joso, jisonhi ja a kuata. Maji o kifuẋi-phe ki kala mú sanguluka, mukonda dia madiuanu moso ma uabha ma-la kubhanga muène.

Kifika kia mbutu ia mostarda

¹⁸ Jezú, uixi dingi: Utuminu ua Nzambi ua di fangana kiebhi? Ngi u sokesa ni kima kiahi?

¹⁹ Kia soko ni mbùndu ia mbutu ia mostarda, ia katula muthu, anga u i kuna mu díbhia diê. Anga i sabhuka, i biluka muxi, o jinjila ja diulu anga jiza ji tula mu jithangu jê, anga ji tunga-mu o ikalanga iâ.

O kifika kia felemendu

²⁰ Uixi dingi: Utuminu ua Nzambi ngi u sokesa ni kima kiahi?

²¹ Kia soko ni felemendu, muhatu u i tambula, hé u i sueka mu izongelu itatu ia fuba, katé iene ioso ia thuthuma.

O muelu ua phophama

²² Jezú anga u bhita mu jimbanza ni ku mabhata mu kulonga, mu njila ia kuia ku Jeluzaleme.

²³ Muthu uamukuá anga u mu ibhula, uixi: Ngana, o kuila athu a bhuluka a tolo? Muène ua ambela, uixi:

²⁴ Bangamenenu o kubokuena bhu muelu ua phophama. Mukonda ngi mi ambela, sai-ku avulu a kà sota kubokona, maji a kà ki lémbua.

²⁵ Hádia mukua dibhata kia balumuka, anga u jika ku dibhitu, enu mu kuata kuimajana bhu kanga ni kubunda ku dibhitu, muixi: Ngana, tu jikuile! O muéne u mi vutuila, uixi: Ki nga mʼijiia kuoso ku mua tundu!

²⁶ Enu anga mu kuata kuila: Etu ki tua dia jinga, ki tua nua jinga, bhu mesu mé? Eie kua longa jinga bhu makanga metu?

²⁷ Muène anga uila: Nga mi ambela kiá: Ki nga mʼijiia kuoso ku mua tundu. Ngi tundidienu bhabha, enu oso mu a-ti-a-ituxi.

²⁸ Bhenhobho bhene bhua-ndu kala o kudila ni ku di kokota ku mazu, ki mu mona Mbalahamu, ni Izake, ni Jakobo, ni jipolofeta joso, ala mu kifuẋi kia Nzambi, enu-phe a mi texi bhu kanga.

²⁹ Ku thunda ni ku uômbe, ku suku ni ku sulu, ku tunda athu a kà xikama ku meza mu Ungana ua Nzambi.

³⁰ Talenu-phe, sai-ku kiki iá a sukinina, hádia a kà dianga; sai-ku kiki iá a dianga, hadia a kà sukinina.

Jezú uandu fuila mu Jeluzaleme

³¹ Kizuua kienhókio bhu bhixila jifalizeu jimoxi-mu, anga a mu ambela, exi: Kunu tunda-ku, uie kuengi. Mukonda Helode ua-la kuinda ku ku jibha.

³² Muène-phe, ua ambela, uixi: Ndenu, kà mu ambedienu, o mukenge muenhó, muixi: Talesa eme ngi tundisa madimonho, eme ngi saka jihaxi, ni lelu ni mungu, o kizuua kia katatu, kiene ki ngi tenesa o kikalakalu kiami.

³³ Kiene kimoxi, kua ngi bhingi lelu ngenda hanji ni mungu, ni mungu-dinhá. Mukonda o polofeta kene kufila kuengi; ki kale mu Jeluzaleme.

³⁴ Uaué, Jeluzaleme! Jeluzaleme tata! Ua bhingi o jipolofeta u ji jibha, o akunji Nzambi a ku tumikisa, eie u a bûba ni matadi! Lukuxi luosʼulu, lu ngandalele kubhongoloka o kifuẋi kia mundu uê uoso, kala ki bhanga o sanji tuana tuê moxiʼa mabhabha, enu-phe ki mu xikina!

³⁵ Talenu, dibhata dienu hinu dia-ndu xala ngúundu. Nga mi ambela, kuma eme ki mu ngi mono dingi, katé ki muà kela: A tane-ku, uoso uiza mu dijina dia Ngana!