Loma 9 - O Mikanda Ikola

O malamba ma Phaulu mukonda dia kuxibhaka kua Jijudé

¹ Nga mu tanga kidi, kuma eme nga tokala Kristu, ki ngi te makutu. Mukonda ni kitongoluelu kiami kia ngi bhela umbangi mua Nzumbi Ikôla, kuma ki ngala ku ta makutu.

² Ngala ni malamba mavulu muene, o kukata kuê ki kuene kubhua mu muẋima uami, mukonda dia akua muiji uami, a di bhange xitu iami ni manhinga!

³ Ngeji kuinda kuila eme-muene a ngi ta mazui kua Nzambi ni ku ngi kaia kua Kristu, bhu kididi kiâ ene jiphange jami, jindandu jami mu xitu.

⁴ Ene akua Izalaiele, o muiji uòsole kua Nzambi iú ua a bhange anʼ ê, iú ua a bhana ue ku fuma iê. Uate-nâ o ikutu iê, iú ua a bhana o Kitumu. O kubheza kua kidi ala na-ku ene, iá a tambula o jipolomesa ja Nzambi.

⁵ Ku muiji uâ kuene kua tokala o jitata. Kuene ue kua tundu Kristu, se tu mu tanga mu kidifua kiê kia xitu. O muène-phe muene Nzambi ua mu tumina oso, a mu ximane sé dizubhilu. Amén.

⁶ Ki tu fike-phe kuila o kizuelu kia Nzambi kia lémbua. Kuma a tokala Izalaiele, ene oso ki akua Izalaiele osole kua Nzambi.

⁷ Sumbala ene oso luvalu lua Mbalahamu, maji ene oso ki anʼ a Nzambi. Mukonda Nzambi uambelele Mbalahamu, uixi: Anʼ a Izake ene ngó à kèxana kuma luvalu luê.

⁸ Kifua-phe uambe kiki, kuma: Anʼa xitu ki ene anʼa Nzambi. Maji ana à vualela mu kixuelu kia kikutu kia Nzambi ene a ejiia kuma luene luvalu luê lua kidi.

⁹ Kuma o kizuelu kia bhele Nzambi, kieniiki: Bhu kumbi uila bhabha, nga kèza dingi, Sala ua kà kala ni mona.

¹⁰ O kiokio ngó ki kiene, maji ni Bebeka kia zubhile kuimita ni muadi uê uomxi, tatʼ etu Izake;

¹¹ o ana ene kiluua a a vuala, kiluua a bhanga kima kiauabha mba kiaiibha, phala o vondadi ia Nzambi ia kusola nʼ a ijiie kuila kana mu imbamba ia kubhanga, maji mù kuixana kua Nzambi muene,

¹² Bebeka a mu ambelele, exi: O dikota ua kà bhikila o ndenge.

¹³ Kiene kia ki soneka, exi: Jakobo nga mu zola, Ezaú-phe nga mu zemba.

¹⁴ Kiki-phe tuila kiebhi? Manhi tuila Nzambi mukua mangonha? Ki ki xikina!

¹⁵ Mbata muene ua tangelele Mozé, uixi: Eme ngi lendukila uoso ngandala ku mu lendukila, ngi kuatela henda uoso ngandala ku mu kuatela henda.

¹⁶ Kieniiki kima ki ki tundu ku muthu ua solo, mba ku muthu ua tena o kukibhanga, maji kua Nzambi mukua kulenduka.

¹⁷ Kala kia ki soneka mu Mikanda Ikôla kuma Nzambi ua tangela Falaó, uixi: Kiene ki nga ki bhangela o ku ku zangeleka ku usobha, phala o nguzu iami ni i monekene ko-kué, mbé dijina diami ni di fumane mu ngongo ioso.

¹⁸ Uila kiki, Nzambi u lendukila uoso ua mu andala, o ka mu andala u mu kolesa o muẋima.

O kaxtiku ni kulenduka kua Nzambi

¹⁹ Sai-phe muthu mudienu uanda kuila: Se kieniiki ki kiala, Nzambi-phe u tatela kiebhi o muthu? Nanhi u ẋinukina ioso iandala o kubhanga Nzambi?

²⁰ Maji eie nanhi, kamba diami, eie u muthu u kuata phata ni Nzambi? Manhi o imbia ia utuma ibhula ió ua i bhange, kuila: Eie ua ngi bhangela-hi kiki?

²¹ Manhi o mumbiʼó kala ni kidi kiê, kia kuata utuma ni kubhanga kioso kiandala? Muene mu mbumbi imoxi u katula-mu kitutu kimoxi kia beta ujitu, ni kitutu kiamukuá kioso-kioso.

²² Nzambi ue kiene kimoxi kia bhange. Muène kia solo kuidikiza o njinda iê, ni kuijidisa nguzu iê. Ni muanu uavulu, ua xididikila eniʼó a tokalele kiá o ku a bhana kaxtiku, iá eji ku a jima o mbutu.

²³ Kuma muène ua solo ue kuidikiza o unéne ua fuma iê ia lunduluila ku thandu dietu etu, a tu lendukila kuala muène, iú ua bhange mʼ ukulu munhá, phala ni tu tambule o fuma ienʼ ii.

²⁴ Mukonda etu-ene oso, Nzambi ua tu ixana; kana ngó o Jijudé, maji ue ni akua jixi jengi, ki Jijudé.

²⁵ Kala kia tange ue mu Ozeia, uixi: Nga kà exana: Mundu uami, oso ka kexile Mundu uami. Ngi mu ila: Kazola kami, o muiji uoso ka kexile Kazola.

²⁶ O ku pholo ku muia, bhuoso bhua kà mi ambela exi: Ki mu mundu uami, kana! Bheniobho bhene bha kà mʼ ixana mu anʼ a Nzambi ia muenhu.

²⁷ Ni Izaia ue ua zuela ku mbandu ia Izalaiele, uixi: Né-mbe o mundu ua anʼ a Izalaiele u vula kala kisekele bhu mbanduʼ a kalunga, tumbalu-mbalu tuâ, tuene ngó tua kà bhuluka.

²⁸ Kuma Ngana uandù bhitisa kizuelu kiê mu ngongo, u ki zubha, u ki lenguluisa.

²⁹ O Izaia ue ua ki zuela, uixi: O Ngana dia ifuẋi se ua kambele ku tu xia mbutu, hinu tueza bhua Sodoma, hinu tua bhiluka kala Ngomola.

O Njimbu Iambote, ni muiji ua Izalaiele

³⁰ O kiki-phe, tuila kiebhi? Kuma ió ki Jijudé, o akua jixi jengi, ka sotele o kulunga kua Nzambi, kulunga a ku mono, kuene-phe kua kulungila mu kuxikana.

³¹ Izalaiele-phe, o muiji uòsole kua Nzambi, a sotele o Kitumu ki tena ku lungisa, maji o kia kexi mù sota a ki tokoka.

³² Mukonda diahi? Mukonda ka ki sotele mu kuxikana, maji ene a ki sota jinga mu ikalakalu iâ. Mu kiki ene a di bhukana ku Ditadi dia kidibhukanu,

³³ kala kia ki soneka mu Mikanda Ikôla: Talesenu, nga tula mu Ziione ditadi dia kidibhukanu, ndanji ia iẋanju ku a di bhela ibhalu. Maji uoso-phe u mu xikana Muène, ka kà kuata jisonhi.