Loma 8 - O Mikanda Ikola

Kana-ku dingi kuêla mua Kristu Jezú. O muenhu mua Nzumbi Ikôla

¹ Kiki kiá kana-ku dingi kuêla kua ió ala mua Kristu Jezú.

² Kuma o Kitumu kia Nzumbi ia Nzambi kia tu bhekela muenhu mua Kristu Jezú, kia ngi bhana ufolo ku kitumu kia ituxi ni kalunga.

³ Kima kia lémbua o Kitumu kia Mozé mukonda dia kubhuila kuê mu xitu, Nzambi ua ki bhange muène mu kikexilu kia xitu, ituxi ua i êlesa mu kutumikisa Monʼ ê muène, mu kidifua kia xitu ia ituxi, mu kufuila o ituxi, mbé ituxi na tene ku i zubha-ku.

⁴ Nzambi ua bhange kiki phala kioso kia iuka kia xindi o Kitumu, tu ki kumbidile etu oso tua kambe kukaiela o xitu mu kuenda kuetu, maji tua kaiela o Nzumbi ia Nzambi.

⁵ Kuma oso a tokala ku xitu, a suua imbamba ia xitu, mukonda o ilunji iâ a mu i tumina ku kikexilu kieneʼ okio. Maji oso-phe a tokala ku Nzumbi, a suua imbamba ia Nzumbi, kuma o ilunji iâ a mu i tumina kuala o Nzumbi ia Nzambi.

⁶ Kuma o kukala ni kilunji kia mu tumina kuala o hanji ia xitu, kubhekela kalunga. O kukala-phe ni kilunji kia mu tumina kuala o Nzumbi, ki bhekela muenhu ni kutululuka.

⁷ Uila kiki, o muthu u di zemba ni Nzambi, kioso o kilunji kiê kia kala mù ki tumina kuala o kikexilu kia xitu. Mukonda ka xikina kubelesela Kitumu kia Nzambi, ni kidi muène, ka tena ku ki belesela.

⁸ O ió oso ala mù tumaka o kikexilu kia xitu, ka tena muene kuuabhela Nzambi.

⁹ Enu-phe ki muala dingi mù laia kala ki ambe o kikexilu kia xitu, maji kala kiandala o Nzumbi ia Nzambi, se ni kidi kiene o Nzumbi ia Nzambi ua tungu moxi dienu. Muthu-phe se ua kambe o Nzumbi ia Kristu, ka mu tokala muène.

¹⁰ Maji Kristu-phe se iuué moxi dienu, kia lomboloka kuila, suke o mukutu uanda kufua kidi muene mukonda dia ituxi, phala enu-phe o Nzumbi ia Nzambi uene o muenhu, mbata enu a mi lungisa kiá kua Nzambi.

¹¹ Maji se o Nzumbi ia Nzambi ua fukunuine Jezú mu ʼalunga, ua tungu moxi dienu, uoso ua fukunuine Kristu Jezú mu ʼalunga hadia ua kà phaphumuna ue o mikutu ienu ia kumbama, mukonda dia Nzumbi iê ia tungu moxi dienu.

¹² Kala kiki-phe, jiphange, ki mu fuama dingi kulaiela xitu, mukonda o xitu ki mua di dikongo diê, kuila mu kaiela xitu.

¹³ Kuma se mua kaiela xitu, mua kinga kufua. Maji mu nguzu ia Nzumbi, se mua fuisa o imbamba i bhanga o mukutu, mu tambula muenhu.

¹⁴ Kuma oso a endesa kuala o Nzumbi ia Nzambi, ene anʼ a Nzambi.

¹⁵ Mbata enu ki mu tambula Nzumbi ia ubhika, kuila mu kala dingi ni uôma. Maji mua tambula Nzumbi ia uana i mi bhangesa kukala mu anʼ a Nzambi, o mu nguzu ia tu bhana o Nzumbi, ki tu bhana kudikola kua Nzambi: Abha, Tata!

¹⁶ O Nzumbi ia Nzambi muene u bhana umbangi ni nzumbi jetu, kuma tuala tu anʼa Nzambi.

¹⁷ O ki tu kala tu ana, tuala tu alundudi a mabesá oso a bhakela o mundu uê. Kristu mulundudi ni mukuetu, etu uê tua kà lundula-nê kumoxi mu ima ioso ia mu bhakela Nzambi. Kabasa tu bhita-nê kumoxi mu hadi, tua kà kala-nê kumoxi mu fuma iê.

Ibhangelu iamukuâ ia Nzambi hadia ia kà bhandulukila kumoxi ni anʼ ê. O kudielela, o kusamba, o ku tu sola

¹⁸ Kuma eme nga xinganeka kuamba o jihadi ja thembu ia kindala ji tua mu bhita na-ju mu ngongʼ umu, ki ji fuama ku ji fikisa ni fuma ioio hadia ia kà tu tukulukila.

¹⁹ Kuma o ibhangelu ioso ia xibhidila ni ku kinga o kithangana kia kutukuluka kua anʼ a Nzambi.

²⁰ Kuma o ibhangelu ioso ia buakuluka, kana mu vondadi iê, maji mukonda Nzambi muene ua ki bhangesa. Maji hanji-phe ia dielela.

²¹ Mukonda ni ibhangelu ioso hadia ia kà jituka ku ubhika ua kubola, hé ia kà bokona mu ufolo ua fuma, ua anʼ a Nzambi.

²² Kuma tua kʼ ijiia kuila o ibhangelu ioso hanji ia kuata kukema mu misusu kala ia kuvuala katé kindala.

²³ Ki iene ngó, maji ni etu uetu, tua nomona-ku kiá ku Nzumbi ia Nzambi, tuala kikema moxi dietu kiosuʼ iki tuala kukinga Nzambi ku tu bhanga tu anʼ ê, ni ku tu kula o mukutu uetu uoso.

²⁴ Kuma tua bhuluka mu kudielela. Maji se tua mono kiá kioso ki tua mu bhinga, o kudielela-phe kua moneka kiá, ki kudielela, dingi. Kuma kima ki ua mono kiá, u ki dielela dingi kiebhi?

²⁵ Maji ue se tua dielela kima kiluua tu ki mona, tu ki kinga ni kinhenge.

²⁶ Kiene kimoxi ue, o Nzumbi ia Nzambi uiza ku tu kuatekesa mu kubhuila kuetu. Kuma etu ki tuijiia kusamba kioso kia tokala. Maji o Nzumbi muene u tu diondela kua Nzambi ni kukumba ki ku xikina ku ku lombolola ni izuelu.

²⁷ O Nzambi-phe mukua kutekula o miẋima ia athu, uejiia kioso ki sola Nzumbi. Mukonda muène u tena kudiondela athuʼ ê angene, kala ki ala mu vondadi ia Nzambi.

²⁸ Kuma tua kʼ ijiia kuila mu ima ioso Nzambi u kalakala mu kubhanga o mbote kua iá oso a mu zola, oso kiá a exana mu vondadi ia muène.

²⁹ Kuma oso Nzambi a diangele ku ejiia, ua a tungula ukulu, phala a kituke mu kidifua kia Monʼ ê. Muène ua bange kieniiki phala o Mona nʼ a kale thungunu mu jiphange javulu.

³⁰ Kala kiki, Nzambi oso ua a tungula ukulu, uedi ue ni ku a exana. O oso ua exana, uedi ni ku a lungisa, iú ua a xikina. Muène-phe ka a xikina ngó, maji ua a bhana ue kukala ni mbandu ku fuma iê.

Muimbu ua kikoue. Nzambi ku mbandu ietu

³¹ O kiki-phe, imʼ iii tu ila kiebhi? Nzambi se uala ku mbandu ietu, nanhi u tena ku tu tolola?

³² Nzambi uedile ni Monʼ ê muène ka mu fikixila, maji ua mu bhakuile mukonda dia etu-ene-oso! Nzambi se ua tu bhana Monʼ ê, u kamba kiebhi ku tu bhana mu ngoho, kumoxi ni muène, o ima ioso kiá?

³³ Nanhi u ta mulonga ua kima kua athu a Nzambi òsole? Muène Nzambi ua a lungisa kuamba kala ni kikuma.

³⁴ Nanhi dingi u tena kua êlesa? Muène Kristu Jezú ua fuile, mba inda ngambe ngixi, ua fukunuka mu ʼalunga, kiki iú uala ku madilu ma Nzambi muène, mu ku tu diondela.

³⁵ Nanhi-phe ua kà tu batukisa ku henda ia Kristu? Ngongo, inga phaxi, inga izudidiku, inga nzala, inga tuẋi, inga dibhulubhulu, inga xibhata?

³⁶ Kala kia ki soneka mu Mikanda Ikôla, exi: Mukonda diê Eie tuala bhu kibhidi kia kalunga kumbi dioso dia kambamba. A tu kita tu jimbudi jiia bhu matadolo.

³⁷ Né ngo! Mu ima ioso íii tuala tu atolodi, maji atolodi ndenge, mu nguzu ia Ió uoso ua tu zola!

³⁸ Mukonda eme nga tetuluka kuila kana-ku kima ki tu batula ku henda ia Nzambi. Né kalunga, né muenhu; né ji-anju, né atumini mba makota ma ji-anju; né ima ia kindala, né ima ia hadia; né kusuina,

³⁹ né o mundu uala ku thandu dietu, né ima iala bhoxi-elele. Né kima dingi kioso-kioso kia di bhange, kana-ku kima ki tena ku tu batukisa ku henda ia Nzambi, iene mua Kristu Jezú.