Loma 7 - O Mikanda Ikola

Afi a Kitumu; athu a muenhu kua Nzambi

¹ Enu phange jami, ngʼ ejiia kuma enu oso mu ivua kiambote kioso ki nganda kuzuela, kuma ngala kuzuela ni athu ejiia o Kitumu. Kuma o Kitumu ki tumina ngó muthu kia kala ku muenhu, katé bhuoso bhu suka o muenhu uê.

² Kala muhatu uoso uala ni munumiʼ ê, o Kitumu, kia mu kuika kua munumiʼ ê, kioso muene kiala hanji ku muenhu. Maji o munumiʼ ê-phe se uafu, muene ua jituka ku Kitumu kia mu kuikile kua munumiʼ ê.

³ Kienʼiki, kioso kiala munumiʼ ê ku muenhu, se muene u sakana ni diiala diengi, a mu ixana kuma mukua phanda. Maji o munumiʼ ê-phe ki afua, muene ua jituka ku Kitumu; ki mukua phanda dingi, némbe ua sakana ni diiala diengi.

⁴ Kala kiki-phe, kiene kimoxi ni enu, phange jami. Enu uenu a mi bhange mu afi a Kitumu, mukonda mu mbandu kiá ku mukutu ua Kristu. Kiki Muène mua mu tokala, muenʼió ua fukunuka mu ʼalunga, ni tu kale tu luvalu lua ngene lua Nzambi.

⁵ Kuma ki tua kexile mù laiela mu kikexilu kia xitu, jihanji ja ituxi, mukonda dia Kitumu, ja suinine dingi kiavulu mu idiandu ietu, phala ji kale luvualu lu tu bhekela kalunga.

⁶ O kikiphe tua jituka ku Kitumu, kuma tuala tu afi ku ioio ioso ia tu kuatele. Uila kiki, tua jituka phala ni tu kale mù bhikila Nzambi mu muenhu uobhe ua Nzumbi ia Nzambi, kana dingi ku ukulu ua mixinda ia Kitumu.

O Kitumu ni Kituxi

⁷ Kiki-phe, tuila kiebhi? Tuila kuma o Kitumu ituxi? Ki ki xikina! Maji-phe ki ngeji kuijiia ituxi, se Kitumu kia kambele-ku. Kuma luimbi ki ngeji ku lu ijiia, se o Kitumu kia kambele kuila: Kana ku kala ni luimbi.

⁸ Maji o ituxi-phe ia katula nguzu ku Kitumu, íii ia ngi vunza moxi o maluimbi moso. Kuma bhua kambe Kitumu, o ituxi iafu.

⁹ Mukonda mʼokulu, ki nga kambele kuijiia o Kitumu, eme nga kexile ku muenhu. Maji kieza o kijila, eme nga kʼijiia, ituxi ia phaphumuka, eme ngafu.

¹⁰ O ki ngeza-ku, kijila kia tokalele ki bhana muenhu, kia ngi bhekela kufua.

¹¹ Kuma ituxi ia bokuena mu kijila, iii ia ngi bhombo. O mu kijila, ituxi ia ngi jibha.

¹² O Kitumu-phe kia zele muene, o kijila ue kia zele, kia iuka, kia uabha.

¹³ O kima kiauabha-phe, manhi kiene kia ngi fuisa? Ki ki xikina! Ituxi-phe iene ia bhange kiki. Kuma ituxi ia katula nguzu iê ku kima kiauabha, íi ia ngi fuisa, phala o kikexilu kiê ni ki tena ue kutukuluka. Maji kienʼ iki, mukonda dia kijila, o kituxi ue kia beta dingi kusuina kiengi.

Ni nzumbi ni xitu a di kuata.

¹⁴ Kuma etu tuejiia kuila o Kitumu kima kia nzumbi. Maji eme-phe ngi muthu ua kufua, a ngi sumbisa ku ituxi.

¹⁵ Kuma ioso i ngi bhanga ki ngi ijiia, kuma íii i nga solo ki iene i ngene kubhanga. Inda o iii-phe i nga zembe, iene i nga mu bhanga.

¹⁶ O ima-phe ki nga i solo, se iene i ngi bhanga, kia lomboloka kuila o Kitumu nga ki xikana kuma kia uabha.

¹⁷ Kiki kiedikiza ue kuila-phe ki eme dingi ngala ku i bhanga, maji o ituxi ia ngi tungu moxi diami.

¹⁸ Kuma nga kʼ ijiia kuila moxi diami, ngambe mu xitu iami, ki mu tungu kima kia uabha. Mbata né-mbé o kusola kubhanga o ima iambote eme na-ku, maji kubhanga o ima iauabha nga ku tokoka.

¹⁹ Mukonda o ia uabha i nga solo, ki iene i nga mu bhanga, maji íii-phe ia iibha ki nga i solo, iene i ngene mù bhanga.

²⁰ O ki ngedi kiki, ima ki nga i solo iene i ngi bhanga, kuabhu-phe, ki eme dingi ngala ku i bhanga, maji o ituxi kiá ia ngi tungu moxi diami.

²¹ Kiki-phe nga sange kuila moxi diami muedi kiki: Kioso eme ki ngi sola kubhanga iauabha, iaiibha iene ia ngi zukama.

²² Ngejiia kuma moxi diami nga sangulukila o Kitumu kia Nzambi.

²³ Maji nga mono kuila Kitumu kiengi kia mu tumina mu idiandu iami, kiala ku di lua ni kitumu kia ngi kala mu kilunji kiami, kiene kí kiala ku ngi kutila mu ubhika ua kitumu kia ituxi kia ngi kala mu idiandu iami.

²⁴ Kokolo diami dia kuxixima kiki! Nanhi u ngi kudila ku mukutu iú ua mu ngi bheka mu kalunga.

²⁵ Nga sakidila-phe Nzambi, kuma sai-ku kubhanduluka mua Jezú Kristu, Ngana ietu! Ki tualʼ iki-phe ngedi kiki: Ni kilunji kiami, kidi muene, nga mu bhikila o Kitumu kia Nzambi; maji o kikexilu kia xitu iami-phe, kia mu bhikila o kitumu kia ituxi.