Loma 4 - O Mikanda Ikola

Mbalahamu ua lungidile mu kuxikana

¹ Kiki-phe o Mbalahamu dia tatʼ etu mu xitu, tu mu zuela kiebhi? Tuila tuexi ua bongʼ Ohi?

² Kuma se Mbalahamu ua lungile mu ikalakalu ia bhangele, muène uala ni nzabala iê; maji bhu pholo ia Nzambi, kana.

³ Mukonda o Mikanda Ikôla-phe iambe iexi: Mbalahamu ua xikana Nzambi, o kuxikana kuê anga a mu kitila na-ku kuma kulunga, mbata Nzambi ua mu xikina kuma muthu uaiuka.

⁴ Uoso-phe ua kalakala, a mu futa. O futu iê ka i bhange konda kala kiadi, maji kala dikongo, kuma kia mu fuama.

⁵ Uoso-phe ka kalakala, maji ua xikana kua Nzambi ió ua tena kulungisa muthu uabhumu, nʼa mu tange kuila ua-di-zele, o kuxikana kuê a ku bhange konda kuma kulunga.

⁶ Kienʼiki ue kiene Davidi kia mesenene kuzuela, kia tange o kuzediua kua muthu ió a mu bhange konda kuala Nzambi kala ua lungu, hè u mu xikina kuma muthu uaiuka, sé kukala ni ikalakalu ia bhange, uixi:

⁷ Azediua athu ió oso Nzambi ua a loloka ikuma iâ, Ituxi iâ iòlambe, kuma a i tambuila kiá o muloloko uê!

⁸ Muthu ua zediua ió Ngana se ka mu bhange konda ia ituxi iê.

⁹ Manhi o kuzediua kuku-phe kua tange Davidi kua tokala ngó iá ala mu kifua kia kusaia? Kana! Kua tokala ue ni iá a kambe kifua kia kusaia. Kuma tuambe, tuixi Mbalahamu ua xikanene Nzambi, o kuxikana kuê anga a ku bhanga konda, Nzambi iú ua mu xikina kuma muthu uaiuka.

¹⁰ A ku bhangele kiebhi-phe o konda? Kia kexile kiá mu kifua kia kusaia, inga kia kexile hanji ku kanga? Ki mu kusaia, kana. Kia kexile hanji ku kanga.

¹¹ Kuma muene a mu saie kiá kueza kunu. O kifua kia kusaia ua ki tambula kuma kijimbuete, kidimbu kiedikiza o kulunga kuê kua muena mu kuxikana, kuila hanji-phe iú ku kanga, kiluua a mu saia. Kia bhiti kieniki phala Mbalahamu a kale mu nzumbi, tata ia oso a xikana Nzambi, né ku kanga kú ala, ka a saie, a a bhanga konda kuma alungu.

¹² A kale ue tata ia ene oso akua kifua kia kusaia. Ki mukonda ngó dia kuila a a saie, maji mukonda a kaiela ue mu manhanhu ma kuxikana kuoso kua kexile na-ku Mbalahamu, thembuʼ oio kuila hanji iú-uê ku kanga, kiluua a mu saia.

O Kikutu kia kusaia

¹³ Kuma Nzambi o kikutu kia bhele kua Mbalahamu ni luvalu luê, kuma hinu ene a lundula oxi, ki kiejila mukonda uaiuka o Kitumu, maji kiejila mu kulunga kua kuxikana, o Nzambi iú ua mu xikina kuma ua lungu.

¹⁴ Mbata o ki kala a tokala ni Kitumu ene ngó a kala tubhinganu tua kikutu kia Nzambi, o kuxikana kua biluka kingoho, o kikutu kia Nzambi kia tumbuluka.

¹⁵ Mukonda o Kitumu ki bhekela njinda. Maji bhua kambe o Kitumu kana-bhu ue kikuma kia kutondala Kitumu.

¹⁶ Mukonda dia kiki, kueza o kuxikana, o kikutu kia polomesa ia Nzambi ni ki naminina ku kuxikana phala ni ki kuate, ni ki kale kia kiadi ku luvualu lua Mbalahamu, Kuma o polomesa ki i tokala ngó a mu kualuka o Kitumu, maji ni ió ue oso a xikana mukuâ ni kia xikanene Mbalahamu. Mukonda mu Nzumbi muene tata ia etu-ene oso.

¹⁷ Kala ki ambe o Mikanda Ikôla, iexi: Eie nga ku bhange u tata ia ifuẋi iavulu. Kala kiki, o polomesa a i kuatesa kuala Nzambi, ió a mu xikana kuala Mbalahamu—Nzambi, mukua kuphaphumuna athu afu kiá, hé u bhangesa kukala ku muenhu o ima kiluua i kala-ku, anga i di bhanga muene.

¹⁸ O Mbalahamu ua kexile ni kuxikana ni kudielela, né mu ithangana ia kuila kana-bhu mutue u mu bhana kudielela; kiene kia mu bhekesa kudibhanga tata ia ifuẋi ia nzungule. Kala ki ambe o Mikanda Ikôla, kuila: O luvualu luê lua kà kala ndumba dia athu.

¹⁹ Sumbala muène ua zukamene kiá ku hama ia muvu, o kuxikana kuê ki ku toloka, kia xinganeka ue kuila o mukutu uê uene uedi kala uafuʼê kiá, mba kia lembalala jinga kuila o Sala ue ka tena dingi kuvuala ana.

²⁰ Inda o Mbalahamu kia talesa ku kikutu kia Polomesa ia Nzambi, nguê ku teketa ni phata, maji ua suina ni kuxikana, ni kubhana fuma kua Nzambi.

²¹ Mbata muẋima uê ua mu tetuluka, kuma kima kia tange Nzambi muene, ua soko-bhu o ku ki bhanga.

²² Mukonda dia kiki, mu kuxikana, Mbalahamu a mu xikina kuala Nzambi kuma muthu uaiuka.

²³ Kieniokio ka ki soneka ngó mukonda dia Mbalahamu muene, kuila a mu bhangele-kiu konda.

²⁴ Maji mukonda dietu etu ue, a tu bhanga-kiu konda, se tu kala tu athu a kuxikana Ió uoso ua fukunuine Jezú, Ngana ietu, mu ʼalunga.

²⁵ Muene a mu bhakuile mu kufuila o itondalu ietu, iá a mu fukunuine dingi mu ku tu bhana o kulunga, ni a tu xikine kua Nzambi.