Loma 3 - O Mikanda Ikola

¹ O Judé-phe kuzediua kuê kuahi? O kusaia muthu kuala ni kubhanduluka kuahi?

² Sai-ku muene kubhanduluka mu ikexilu iavulu! Kima kia dianga-phe o kuila kuma o Jijudé ene Nzambi a a bhakesele o Njimbu iê.

³ O kieneʼokio? Né-mbé amoxi-mu a kambele kuxikana, o kukamba kitongola kua ene, kuene ku selukisa o kukumbidila kua Nzambi?

⁴ Ki ki xikina! Nzambi a kale mukua kidi, né-mbé athu oso a kala akua makutu. Kala kia ki soneka mu Mikanda ia Ngana, exi: Eie phala u lunge ki u zuela mu kufunda, u belese, ki u kuata ku mulonga.

⁵ Maji se o kutondala kuetu-phe kua sedivila phala kulondekeza o kuiuka kua Nzambi, tuila kiebhi? Manhi tuila Nzambi ua tondala mukua ku tu beta ni njinda? (Bhabha eme nga ki ambe ngó mu uzuelelu ua athu).

⁶ Ki ki xikina! Mukonda hé kiene, Nzambi mukua kidi hadia u fundisa kiebhi o mundu?

⁷ Maji-phe se o makutu mami ma bhangesa o kidi kia Nzambi ku mu vudisa dingi o fuma, eme u ngʼ êleselahi kala ngi mukua ituxi?

⁸ Ki tuidila-hi tuixi; Tu bhangienu iaiibha, mbé mu iaiibha hinu mu tunde iambote? Ni kidize, amoxi-mu ene ku ngi tatela kuila kiene muene ki nga mu zuelʼ okio. Enʼió-phe o kuêla kuâ hádia kuà kala kua kidi muene.

Athu oso o ituxi ia a bhiti ku thandu

⁹ O ki tualʼ iki-phe, tuedi kiebhi? Kifua etu tu Jijudé tua beta kuuabha, o ió ki Jijudé ndenge? Né ngó! Kuma nga londekeza kiá kuila ni Jijudé ni ió ki Jijudé ene oso ala bhoxi dia ituxi.

¹⁰ Kala kia ki soneka mu Mikanda Ikôla exi: Uaiuka ka moneka, né muthu umoxi;

¹¹ kana-ku muthu uejiia, kana-ku muthu u sota Nzambi.

¹² Ene oso Nzambi a mu sanduka, ene oso abhuka mu njila, a sekalela kumoxi. U bhanga o mbote u mu tokoka-mu, né umoxi ngó!

¹³ Bhu xingu iâ kala mu mbila mua jikuka; madimi mâ mejidila o kutanga makutu aiibha, ni mazui a kalunga, mukuâ ni ikolakola ia jinhoka itunda ku mizumbu iâ

¹⁴ makanu mâ mezala kuxinga ni kulula.

¹⁵ Inama iâ i lenga mu kubhubhisa manhinga ni kujibha.

¹⁶ Muoso mua bhita, a xisa kubuika ni kubhondalala.

¹⁷ Njila ia kutululuka a lémbua ku ijiia.

¹⁸ Ku mesu mâ ki ku moneka uôma ua Nzambi.

¹⁹ Kiki-phe tuejiia kuma kioso ki ambe o Kitumu, a ki ambela ió oso ala bhoxi dia Kitumu. Phala o makanu moso ma xite, ehe o maditatu, mbé mundu uoso a bele mu kufundisa kua Nzambi.

²⁰ Mukonda mu ikalakalu i xinda o Kitumu, kana muthu u tena kulungila-mu ku mesu ma Nzambi. Kuma mu Kitumu, muene muthu muejidila kuila mukua ituxi.

O kubhuluka kikala ngó mu kuxikana

²¹ Kiki-phe sai kulunga kua Nzambi, o kuene kua tukuluka kiá, ki ku tokala ni Kitumu. Maji a ku bhela umbangi mu Kitumu kia Mozé ni mu Jipolofeta.

²² Kuene o kulunga kua Nzambi ku ijila mu kuxikana Jezú Kristu. Muène u bhanga kiki kua oso muene a xikana, kuma kana-ku muthu ua di tungula-mu.

²³ Mukonda ene oso ituxi a i te, a bhondalala, o bhu fuma ia Nzambi, i bhulula, ka tena-bhu.

²⁴ Maji Nzambi mu kiadi kiê u a lungisa, kia vutuka, sé ku a bhinga kima, mukonda dia Jezú Kristu u tena ku a bhulula.

²⁵ Nzambi ua bhakula Kristu mu kukala sata, phala mu kufua kuê, Kristu a biluke muène diluuluilu dia athu nʼa tambule o muloloko ua ituxi, mu ku mu xikana muène. Nzambi ua bhange kiki, mù ku idikiza kuila muène uaiuka. Kuma Nzambi mukua muanu, o ituxi ia ta jinga athu mʼ ukulu ua i somboka mu kulenduka kuê.

²⁶ Maji mu kindala kiki muène ua bhakula Kristu phala kulondekeza kuila muène ua lungu. Uila kiki, Nzambi ua lungu, phala a lungise ue athu oso a xikana Jezú.

²⁷ Manhi o ki tualʼ iki, tu di zangeleka na-kiu? Ki ki xikina! Ki ki xikina, phala-hi? Kifua ki ki xikina mukonda tua tumaka o Kitumu? Kana, maji mukonda tua xikana Kristu.

²⁸ Uila kiki-phe, tua xinganeka kuma muthu a mu xikina kua Nzambi mu kuxikana, sé ngó kubhanga o ikalakalu i xinda o Kitumu.

²⁹ Kifua o Nzambi ua tokala ngó ni Jijudé kuabhu? Nzambi ka tokala ue ni akua jixi jengi? Kiene muene! Nzambi ia akua jixi jengi ue.

³⁰ Kuma o Nzambi imoxi ngó iene ialaku, o ió akua kifua kia kusaia, u a lungisila mu kuxikana; o a kambe kifua kia kusaia, kiene kimoxi, u a lungisila ue mu kuxikana.

³¹ O ki tua zuelʼ iki, manhi o Kitumu tua ki tumbulula mukonda dia kuxikana? Kana, ki ki xikina! Inda o Kitumu tua ki bhana dingi nguzu.