Loma 2 - O Mikanda Ikola

O kuxibhaka kua Jijudé; o kulunga kua Nzambi.

¹ Kienʼ iki, eie u muthu ua kime, uala mù kuêlesa akuenu? Kiosokioso ki u kalé, eie-muène ue ku lungu. Mukonda kioso ki u êlesa mukuenu, eie ue anga u kuata kubhanga ima iene imoxi, ua di êlesa eie-muène.

² Etu-phe tuejiia kuma Nzambi kia fundisa o athu a bhanga ima kala íii, o kufundisa kuê kua kidi.

³ Maji eie u muthu ua kime uaka mù kuêlesa o athu a bhanga imʼ íii, eie-muène ue iene i ualù bhanga! Ua fika kuma eie-muène u bhulaka mu kufundisa kua Nzambi?

⁴ Inga eie ua mu tobhesa o jinzungule ja kulenduka, ni kudixibha, ni kuxididika kua Nzambi? Eie ua kʼ ijiia kiambote kuma o Nzambi ua lenduka, ni kuila muène ua mesena ku ku sunga mu kudiela.

⁵ Maji eie-phe mu kukola kuê kua muẋima ni kuxibhaka, mu kubhanga kiki, eie ua kuata ku di lundila dingi njinda katé bhu kizuua kia njinda, kia kà tukuluka o kufundisa kualuka kua Nzambi.

⁶ Kuma muène ua kà uanena athu oso kala kia tokala mu imbamba iâ ia bhanga jinga.

⁷ Ua kà bhana muenhu ki uabhua kua oso a kuata kinhenge mu kubhanga o mbote, a bhindamena o fuma ni ujitu ni muenhu ua kamba dizubhilu.

⁸ Maji ua kà lunduluila o njinda iê ni kaxtiku kê ku thandu dia oso-phe akua luimbi, o kubhanga o mbote a ku tokoka, anga enda ni kukaiela ioso iaiibha.

⁹ Kua kà kala njinda ni kutema, jiphaxi ni ngongo ku thandu dia muenhu uoso ua muthu mukua kubhanga kiaiibha, ku dianga o Judé, hé ku kaiela ió ki Judé.

¹⁰ Maji Nzambi ua ká bhana o fuma ni ujitu, ni kutululuka kua uoso mukua kubhanga kiambote, ku dianga o Judé, hé ku kaiela ió ki Judé.

¹¹ Mukonda kua Nzambi ki kuene katungu ka athu.

¹² Kuma oso ki Jijudé, o Kitumu kia Mozé kala na-kiu. Uila kiki, ene ate ituxi bhua kambe o Kitumu, iá a texika ue sé Kitumu. O Jijudé-phe jala ni Kitumu. Ene ate ituxi bhuala o Kitumu, o Kitumu kiene kia êlesa.

¹³ Kuma oso evui a Kitumu, ki ene a lunga kua Nzambi; maji oso atumaka, a bhanga kia tumu o Kitumu, ene a lunga.

¹⁴ O ió akua jixi jengi a kambe o Kitumu, ki ela mu kikexilu kiâ ʼokio a bhanga o ima ia tumu o Kitumu, ene kiá a di kala Kitumu kiâ.

¹⁵ Kuma mu ima iâ ia bhanga, o ufunu ua Kitumu a uidikiza kuila uòsoneke kiá mu miẋima iâ. Ni kitongoluelu kiâ ki bhana umbangi kuma kidi, mukonda o mabanzelu mâ ma mu kuila hinu ma a lungisa, hinu ma êlesa.

¹⁶ Kiene ue ki kia kà kala mu kizuua kia kà fundisa Nzambi ikutu ioso ia sueka athu, kua Jezú Kristu, kala ki ngambe mu Njimbu Iambote i ngene mù tula.

Jijudé ki ja lungu, o kusaia kua kidi

¹⁷ Ihi ia ku kuata? Eie-phe uala ni dijina dia kukala u Judé, eie ua xamenena ku Kitumu kia Mozé, uala ni ukumbu mukonda dia Nzambi i uala na-iu.

¹⁸ O vondadi ia Nzambi eie ua ijiia, ua tena kutungula o ima iambote, kuma a ku longo-io kiá kuala o Kitumu.

¹⁹ Eie ua di fika muene kuila u muendexi a ifôfo, u mukengeji ua athu ala mua vundu,

²⁰ u mulongixi a iximba, u mesene ia minzangala. Eie ua mu di xinganeka kuila mu Kitumu, eie uala ni kuijiia kuoso ni kidi.

²¹ Ki ualʼ okio-phe, eie u longesa akuenu, ku di longela-hi eie-muene? U mukua kuboka, uixi muthu ka nhane, eie-muene u nhana?

²² Eie uene mù kuamba uixi muthu ka te phanda, eie-muène phanda u i ta? Eie o iteka ia ku ibhila kiavulu, manhi u bhunda o ima mu jitembulu?

²³ Eie ua di fiiala o kukala ni Kitumu kia Nzambi, maji mu kutondala o Kitumu u lebhukisa Nzambi?

²⁴ Kala kia ki soneka mu Mikanda Ikôla, exi: Mukonda dienu, enu mu Jijudé, o dijina dia Nzambi a di xingi muʼaxaxe ka matumbu.

²⁵ Kuma o kusaiʼ oko sai ni kubhhanduluka kuê, se eie u Judé uala u mutumaki a Kitumu. Ki u kala-phe u mutondadi a Kitumu, né a ku saie, ua biluka kala ka ku saie.

²⁶ O ió ki Jijudé, a kambe ku a saia-phe kia bhaka o ijila ia Kitumu, né ka a saie, Nzambi, manhi kanda ku a kita kala a a saie?

²⁷ Kala kiki enu mu Jijudé, a kà mi êlesa kuala ió ki Jijudé! Mukonda enu o Kitumu mua mu ki bula, sumbala a mi sonekena-kiu, o kusaia, a mi saie. O ió ki Jijudé a mu tumaka o Kitumu, sumbala ku mukutu kà a saie.

²⁸ O ki tualʼ iki-phe, uebhi-bhu o Judé a mu saie muene mu kidi? Kʼ o muthu ió uala ngó Judé ku kanga, iá a mu saie ngó ku mukutu.

²⁹ Inda o Judé ia kidi, ió uala Judé moxi, iú uala ni muẋima uòsaie. O kikiphe kima ki bhanga o Nzumbi ia Nzambi; o Kitumu kiòsoneke ki ki tena ku ki bhanga. O muthu-phe u kala kiki, diximanu diê di tunda kua Nzambi, ki di tundu ku athu.