Loma 14 - O Mikanda Ikola

Ku di endesa kiambote ni jiphange ja bhuila

¹ Uoso ua bhuila mu kuxikana kuê, mu tambuludienu mu ʼaxaxe kenu, maji ki mu mu kuatese jiphata mu kuxikana kuê.

² Kuma sai ni muthu uala ni kuxikana kua kudia ima ioso, sai-phe ni muthu ua bhuila mu kuxikana kuê, udia ngó idima.

³ Uoso-phe udia, ima ioso, ka tobhese ió u kamba kudia. O ió u kamba kudia, kelêse ió mukua kudia; mbata Nzambi ua mu tambulula.

⁴ Eie-muene, eie nanhi uala mù kuelêsa o selevende iangene? Ngana iê muene uanda kumona o phangu, se muène u tolola mba uanda kubhubhuka-ku. Maji-phe u tolola muène, kuma Ngana uala ni nguzu ia ku mu bhangesa kutolola.

⁵ Sai muthu u fika kuma sai kizuua kia tundu akuá. Sai dingi muthu ua fika kuila izuua ioso ia sokela. Kala muthu a tetuluke ku muẋima uê-muène mu ioso ia banza.

⁶ Uoso u xila o kizuua, kuma ua ki mono kia beta kota, Ngana muène a mu ẋidila-kiu. O ió udia ima ioso, ua dila Ngana, kuma ua sakidila Nzambi ua mu bhana o kudia. O ua kambe kudia ima imoxi-mu, ua ki bhangela o kubhana ujitu kua Ngana, anga u sakidila Nzambi.

⁷ Mukonda kana-ku muthu mudietu ua di kalela ngó muène ku muenhu, kana-ku muthu ue ua di fuila ngó muène.

⁸ Kixi tu laia, tua laiela Ngana; kixi tu fua, tua fuila Ngana. Uila kiki, kixi tu kala ku muenhu, kixi tu fua, tu athu angene a Ngana.

⁹ Mukonda kiene kia bhangesele Kristu kufua ni kuphaphumuka, phala a kale Ngana ia athu afu ni athu a muenhu.

¹⁰ Eie-phe uelêsela-hi phangʼ iê? Mba phangʼ iê, u mu tobhesela-hi? Kuma etu-ene-oso hádia tua kèmana bhu pholo ia Nzambi, phala Muène ku tu fundisa.

¹¹ Kuma a ki soneka mu Mikanda Ikôla, exi: Kala ki ngala ku muenhu, eme ngi Ngana, phuna joso ja kà ngi fukamena. O madimi moso ma kà fisala kuila eme muène ngi Nzambi.

¹² Mu kieniiki, kala muthu mudietu, ua kà di bhela konda iê kua Nzambi.

Muthu, né kala ni kijila, ka tondalese akuâ

¹³ Uila kiki, ki tu kuate-phe dingi ku di longolola mudietu. Inda mu di tetulula kiki, kana muthu u ta kidibhukanu mu njila ia phangʼ iê, mba kima ki mu di bhalesa mu kituxi.

¹⁴ Eme ngejiia, kuma kia ngi tetulukila mua Ngana Jezú, kuila kana-ku kima kia di xidila ngó kiene. Maji se bhu kala muthu uoso u kita kima o kuxila, phala muène kia xidi muène.

¹⁵ Mukuenu se ua mu kenanesa mukonda dia kudia kué, eie kua mù bhanga dingi ima ia henda. Mukuenu kana ku mu texikisa mu kudia kué ku ua mù dia, mbata muène ue muthu a mu fuila kuala Kristu.

¹⁶ O ufolo uenu ki u mi bongese malebhu ku akuenu, mu ima ioso i mua mono kuiuka.

¹⁷ Kuma o Utuminu ua Nzambi ki ua kudia ni kunua, maji ua kuiuka, ni kutululuka, ni kusanguluka ku bhana o Nzumbi Ikôla.

¹⁸ Kuma uoso u bhikila Kristu kala kiki, Nzambi u mu uabhela, o athu a mu ximana kuila mukua ujitu.

¹⁹ Uila kiki, tu kaiedienu o ima i bheka paze, ima i bhekela kutungiua mudietu.

²⁰ O kudia ki ku ku bhangese kumuanga o ialakalu iangene ia Nzambi. Makudia oso a tokala ku a dia muène; maji kiaiibha kudia kima ki bhekela mukuenu kudibhala mu kituxi.

²¹ Kima kiauabha o kukamba kudia xitu, mba kukamba kunua vinhu, mba kukamba kubhanga kima kioso-kioso ki bhangesa phangʼ iê kudibhala mu kituxi.

²² Kala kiki, o kuxikana kuoso ku uala na-ku, ku kale ku muẋima ué eie-muène ngó ni Nzambi. Muthu ió ua zediua, uoso muẋima uê ki u mu belêsa, mu kubhanga kia fika muène kuila kiauabha!

²³ Maji uoso-phe uala mu phata ia kioso ki adia, se uadi, Nzambi u mu êlesa, mukonda uadi ni kukamba o kuxikana. Kima kioso-phe kiobhange ni kukamba kuxikana, kituxi.