Loma 13 - O Mikanda Ikola

O kubelesela jinga o maungana

¹ Athu oso ende ni kubelesela o maungana. Kuma kana-ku ungana uengi, ki kale u tunda kua Nzambi; o maungana moso mala-ku, Nzambi muène ua ma tumu.

² Mu kieniiki, uoso u ẋinukina o ungana, ua ẋinukina kima kia tumu Nzambi. Oso-phe a ximika kiki, andu di bhekela kaxtiku ku thandu diâ.

³ Kuma oso a bhanga kiaiibha, ene a tokala a kala ni uôma ua atumini, kana ió a mu bhanga ima iambote. Eie ua mesena kukamba uôma ua ió a mu tumina? Bhanga-phe imbamba iambote, phala ene a ku ximane.

⁴ Mbata o atumini ala jingunza ja kikalakalu kia Nzambi phala ku ku bhanga eie mbote. Maji se u bhanga imbamba iaiibha, a kuate uôma, mukonda ene ala ni kutena kua ku ku bhana kaxtiku. Mukonda ene ala jingunza ku kikalakalu kia Nzambi, phala kubheka o kaxtiku kê ku thandu dia oso a bhanga kiaiibha.

⁵ Uila kiki, mua bhingi mu belesela, ki mukonda ngó dia kaxtiku ka Nzambi, maji mukonda dia muẋima muene ue o ku mi tuma-kiu.

⁶ Mukonda dia kiki ue, kiene ki muene kubhela ue o lubhaku. Kuma ene ala akunji a sedivisu ia Nzambi, se a kumbidila kiambote o ungunza uâ.

⁷ Kala kiki, bhanenu-phe kua ene oso kioso ki mua tokala ku a bhana: Lubhaku kua ió ua tokala o lubhaku; dijimu kua ió ua tokala o dijimu; uôma kua ió ua tokala uôma; ujitu kua ió ua tokala o ujitu.

O kuzola mukuenu

⁸ Kana kudievela kima ku muthu uoso-uoso. O dikongo dimoxi di mu kala na-diu ngó, dia ku di zola mudienu. Kuma uoso u zola mukuâ, ua kumbidila (ua tumaka) o Kitumu.

⁹ Kuma o ijila ki iedi: Kana kuta phanda, Kana kujibha, Kana kunhana, Kana kukala ni luimbi, mba ioso dingi ijila ia dite-ku, ia di bundu mu kizuelu kimoxʼ iki: Mukuenu u mu zola kala ki ua di zola eie-muène.

¹⁰ O uoso uala ni henda, ka tena kubhanga mukuâ phulu. Uila kiki, uoso ua zolo, ua kumbidila o Kitumu kioso.

¹¹ Nga ki ambe kuila enu mua fuama mu bhanga kieniiki, mukonda o thembu i tuala mua ijiia. Kumbi diezabhu kiá, dia kubalumuka ku kilu. Mukonda, kiki o kubhuluka kuetu kua zukama dingi kiengi, ki ki soko ni ki tua mateka o kuxikana.

¹² O usuku iú batuka, kua kambe ngó kuma kukia. Kala kiki, tu ehiʼenu kubhanga o imbamba ia usuku. Tu maneke o mata ma kulua-nâ mu muanha.

¹³ Tuendienu kiafuama o kuzela kala ki bhanga oso ala mu mukengeji ua muanha. Kana kuenda mu masemba ni mauhôlua, kana mu maundumbu ni maufusa, kana mu jimvunda ni mafuba.

¹⁴ Maji kuatenu o mata a Ngana Jezú Kristu, o xitu ki mu i te dingi muẋima, kuila mu kaiela ngó kubhanga o jihanji jê.